Formula 1 Niderland Qran-Prisinə hazırlıq plana uyğun olaraq davam edir

Bakı, 12 avqust, AZƏRTAC

Formula 1 Niderland Qran-Prisinə hazırlıq plana uyğun olaraq davam edir. COVID-19 xəstələrinin sayı azalır. Biz Niderland tarixinin ən böyük idman yarışını təşkil edəcəyik. Bu, xüsusi bir hissdir.

AZƏRTAC xəbər verir ki, bunu Niderland Qran-Prisinin idman direktoru Yan Lammers yarışa hazırlıqla bağlı danışarkən deyib.

O, tribunaların təxminən 70 faizinin hazır olduğunu bildirib.

Zandfortdakı yenidən qurulan trasda Niderland Qran-Prisi 2020-ci ildə keçirilməli olsa da, pandemiya səbəbindən ləğv edilib. 1985-ci ildə dünya çempionatının mərhələsinə sonuncu dəfə ev sahibliyi edən bu trasda yarış bu il sentyabrın ilk həftəsonuda təşkil olunacaq.

Avqustun 13-də ölkə rəhbərliyi epidemioloji vəziyyətlə bağlı nə qədər tamaşaçını yarışa buraxmaqla bağlı qərar verəcəyi gözlənilir.