Gədəbəy, 15 fevral, Rauf Hacıyev, AZƏRTAC

Respublikamızda yerli icra hakimiyyəti orqanlarında ilk dəfə olaraq Gədəbəy Rayon İcra Hakimiyyəti tərəfindən göstərilən xidmətlərin asanlaşdırılması üçün vahid mərkəz yaradılıb.

AZƏRTAC-ın bölgə müxbiri xəbər verir ki, bu münasibətlə ictimaiyyət nümayəndələrinin və kütləvi informasiya vasitələri təmsilçilərinin iştirakı ilə mərkəzin iş fəaliyyəti haqqında təqdimat keçirilib.

Rayon icra hakimiyyətinin başçısı İbrahim Mustafayev bildirib ki, Prezident İlham Əliyevin vətəndaşlara daim diqqət və qayğı göstərilməsi ilə bağlı tapşırığı, habelə vətəndaş məmnunluğunun və şəffaflığın təmin edilməsi ilə bağlı verdiyi bir sıra tövsiyələri bütün dövlət qurumlarında olduğu kimi, yerli icra hakimiyyəti orqanları qarşısında da mühüm vəzifələr qoyub.

Vətəndaşların müraciətlərinə baxılması, onların qəbul edilməsi, dinlənilməsi, hər bir müraciətə həssas münasibət göstərilməsi, müraciətlərin mahiyyəti üzrə qərarların qəbulu, eləcə də açıqlıq, işgüzar mühit, rayon icra hakimiyyətini vətəndaşların etimad ünvanına çevirmək və vətəndaş məmnunluğunu yüksəltmək məqsədilə Gədəbəy Rayon İcra Hakimiyyəti tərəfindən vətəndaşlara göstərilən xidmətlər asanlaşdırılıb.

Qeyd edilib ki, həmin xidmətləri asanlaşdırmaq üçün Azərbaycan Respublikası Mülki Məcəlləsinin, Ailə Məcəlləsinin, Şəhərsalma və Tikinti Məcəlləsinin, qanunların və “Yerli icra hakimiyyətləri haqqında Əsasnamə”nin tələblərinə uyğun olaraq, 39 sahə üzrə göstərilən xidmətlərin asanlaşdırılması məqsədilə vahid mərkəz yaradılıb. Mərkəzdə rayon icra hakimiyyəti başçısı aparatında fəaliyyət göstərən hər şöbədən bir nəfər məsul işçi olmaqla, cəmi 7 nəfər daim xidmət göstərəcək. Quraşdırılmış böyük monitorda xidmət sahələrinin adları, həmin sahələrə məsul şöbələr, tələb olunan sənədlərin nümunəsi, sənədin icra müddəti, qanunvericilik bazası yerləşdirilib. Burada xidmət sahələrinin hər biri telefon və kompüter dəsti ilə təchiz edilərək, internetə çıxışı təmin olunub. Xidmət göstərən məsul işçilər quraşdırılmış böyük monitorda vətəndaşa izah etmək, sənəd nümunələrini göstərmək imkanına malikdirlər. Mərkəzdə vətəndaşın problemlərinin operativ həlli məqsədi ilə “qaynar xətt” yaradılıb. Bundan əlavə, xidmətin səmərəliliyinin artırılması məqsədilə mərkəzdə könüllülər də fəaliyyət göstərir.

Burada sənədlərin qəbulu və verilməsi, memarlıq və tikinti, hüquq, sosial-iqtisadi, humanitar, inzibati ərazi dairələri üzrə nümayəndəliklər və bələdiyyələr, yetkinlik yaşına çatmayanların işləri və hüquqlarının müdafiəsi məsələləri ilə bağlı xidmətlər göstərilir.

Mərkəzdə yaradılan şərait sənədlərin aşkarlıq şəraitində qəbul edilməsini, vaxt itkisinin, süründürməçilik və korrupsiya hallarının qarşısının alınmasını, həmçinin vətəndaşın eyni vaxtda vahid məkanda rayon icra hakimiyyətinin bütün struktur bölmələri ilə ünsiyyətdə olmasını təmin edir.

Mərkəzin könüllüləri sağlamlıq vəziyyətinə görə məhdud hərəkətli vətəndaşların hüquqlarının müdafiəsi ilə bağlı onların öz ünvanlarında ilkin sənədləşmə işlərinə kömək göstərəcək və müraciət edən vətəndaşların ərizə formalarının doldurulmasını həyata keçirəcəklər.