REGİONLAR


Gəncədə “Xalqların qədim irsinin qorunması və təbliğində kitabların rolu” adlı konfrans keçirilir

Gəncə, 16 noyabr, Rauf Hacıyev, AZƏRTAC

Noyabrın 16-da Gəncədə “Xalqların qədim irsinin qorunması və təbliğində kitabların rolu” adlı ikigünlük konfrans işə başlayıb.

AZƏRTAC xəbər verir ki, “Gəncə Müstəqil Dövlətlər Birliyinin Mədəniyyət Paytaxtı-2017” layihəsi çərçivəsində keçirilən elmi-praktik konfransda Rusiya, Belarus, Qazaxıstan, Qırğızıstan, Moldova, Özbəkistan və Tacikistan milli kitabxanalarının nümayəndə heyətləri iştirak edir.

Əvvəlcə konfrans iştirakçıları Heydər Əliyev Mərkəzində Azərbaycan xalqının Ümummilli Liderinin abidəsi önünə gül dəstələri qoyub, xatirəsini ehtiramla anıblar.

Qonaqların Heydər Əliyev Mərkəzi ilə yaxından tanışlığı onlarda böyük təəssürat yaradıb.

Konfransı açan Gəncə Şəhər İcra Hakimiyyəti başçısının müavini Sevda Qurbanəliyeva iştirakçıları Azərbaycanın dahi şairi Nizami Gəncəvinin yurdunda görməkdən məmnun olduğunu bildirib. Gəncənin qədim tarixə, mədəniyyətə malik olduğunu deyən S.Qurbanəliyeva şəhərin elm, təhsil və mədəniyyət xadimləri, onların həyat və yaradıcılığı barədə məlumat verib.

Vurğulanıb ki, Gəncə özünün tarixi-mədəni inkişafı ilə tanınmaqla yanaşı, həm də son illərdə bir sıra beynəlxalq layihələrə uğurla ev sahibliyi edib.

Müstəqil Dövlətlər Birliyinin üzvü olan dövlətlərin Dövlətlərarası Humanitar Fondunun müşaviri Kamal Rəhimov bildirib ki, “Gəncə Müstəqil Dövlətlər Birliyinin Mədəniyyət Paytaxtı-2017” layihəsi çərçivəsində bir sıra tədbirlər keçirilib. Bu tədbirlər MDB üzvü olan dövlətlərin öz mədəniyyətlərini nümayiş etdirmələrinə geniş imkanlar yaradıb. Kamal Rəhimov vurğulayıb ki, bu ilin dekabr ayında layihənin təntənəli bağlanış mərasiminin keçirilməsi nəzərdə tutulub.

Azərbaycanın Mədəniyyət və Turizm Nazirliyinin kitab dövriyyəsi sektorunun müdiri Lətifə Məmmədova qonaqlara ölkəmizdə kitabxanaların fəaliyyətinə dövlətimizin başçısı tərəfindən göstərilən diqqət və qayğıdan danışıb, ulu öndər Heydər Əliyev və Prezident İlham Əliyev tərəfindən bu sahənin inkişafı ilə bağlı imzalanmış fərman və sərəncamlara nəzər salıb.

Sektor müdiri Gəncə Şəhər İcra Hakimiyyətinə Azərbaycan kitabxanalarının fəaliyyətinə dair ikicildli kitab hədiyyə edib.

Rusiya Dövlət Kitabxanasının Rusiya və MDB kitabxanaları ilə Əlaqələr Departamentinin rəhbəri Qalina Raykova konfransın təşkilinə və səmimi münasibətə görə həmkarları adından şəhər rəhbərliyinə minnətdarlığını bildirib. O, konfransın kitabxana sahəsində çalışan insanlar üçün faydalı olacağını vurğulayıb.

Çıxışlardan sonra “Kitabları hədiyyə edək” aksiyasının təqdimatı olub. Aksiya çərçivəsində Gəncənin mədəniyyət və təhsil müəssisələrinə rus dilində nəşr edilmiş müxtəlif kitablar hədiyyə edilib.

Konfransın rəsmi hissəsinin ardından Azərbaycan, Rusiya, Belarus, Qazaxıstan, Qırğızıstan, Moldova, Özbəkistan və Tacikistanın milli kitabxanalarının nümayəndə heyətlərinin iştirakı ilə məruzə və çıxışlar dinlənilib.

Beynəlxalq tədbir işini sabah davam etdirəcək.

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.