REGİONLAR
Heydər Əliyevin şərəfli ömür yolu Vətənə xidmət nümunəsinə çevrilib
Ölkəmizin cənub bölgəsində Milli Qurtuluş Günü təntənə ilə qeyd olunub
Masallı-Lənkəran-Lerik-Cəlilabad, 15 iyun, Bağır Əliyev, AZƏRTAC
Ölkəmizin hər yerində olduğu kimi, cənub bölgəsində də Milli Qurtuluş Günü böyük təntənə ilə qeyd olunub.
AZƏRTAC-ın bölgə müxbiri xəbər verir ki, iyunun 15-də Masallı şəhərindəki Heydər Əliyev Mərkəzində Milli Qurtuluş Gününə həsr olunmuş ümumrayon tədbirinin iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər.
“Tariximizin qurtuluş zirvəsi” mövzusunda keçirilən konfransda çıxış edən Masallı Rayon İcra Hakimiyyətinin başçısı Rafil Hüseynov rayon sakinlərini əlamətdar bayramlar - Milli Qurtuluş Günü və Ramazan bayramı münasibətilə təbrik edərək, ölkəmizin düçar olduğu bəlalardan dahi şəxsiyyət Heydər Əliyevin xalqın təkidi ilə yenidən rəhbərliyə qayıdışından sonra qurtulduğunu, Azərbaycanda uğurlu gələcəyin təməlinin qoyulduğunu bildirib.
Qeyd olunub ki, ümummilli lider Heydər Əliyevin Azərbaycana rəhbərlik etdiyi dövrdə milli-mənəvi dəyərlərimiz bərpa edilib, onun apardığı qətiyyətli, uğurlu daxili və xarici siyasət sayəsində ölkəmiz xaosdan xilas olub, demokratik inkişaf yolu ilə inamla irəliləyərək böyük nailiyyətlər qazanıb. Heydər Əliyevin yenilməz iradəsi, uzaqgörənliyi və fədakarlığı, şərəfli ömür yolu doğma xalqımız üçün Vətənə xidmət nümunəsinə çevrilib.
Ulu öndər Heydər Əliyevin şərəfli ömür yolunun bütün nəsillərə örnək olduğunu, onun adının xalqımızın mənəvi bütövlüyünün və birliyinin rəmzinə çevrildiyini, xatirəsinin qəlbimizdə əbədi yaşayacağını vurğulayan R.Hüseynov bu gün Prezident İlham Əliyevin uğurlu fəaliyyəti nəticəsində doğma Azərbaycanımızın gündən-günə çiçəkləndiyini, inkişaf etdiyini, bütün sahələrdə dünya dövlətlərinin etibarlı tərəfdaşına çevrildiyini bildirib.
Konfransda Bala Kolatan kənd tam orta məktəbinin tarix müəllimi Uğur Ağayevin mövzu ilə bağlı məruzəsi dinlənilib.
Tədbir digər çıxışlarla davam etdirilib.
X X X
Milli Qurtuluş Günü Lənkəranda da bayram sevinci ilə qeyd olunub.
Ümumrayon tədbirinin iştirakçıları əvvəlcə Heydər Əliyev Xatirə Parkında Ümummilli Liderin abidəsi önünə gül dəstələri düzərək xatirəsini ehtiramla yad ediblər.
Lənkəran Şəhər İcra Hakimiyyətinin başçısı Taleh Qaraşov rayon sakinlərini əlamətdar bayramlar - Milli Qurtuluş Günü və Ramazan bayramı münasibətilə təbrik edib. T.Qaraşov 1993-cü ilin iyun ayında xalqın təkidli tələbi ilə ikinci dəfə hakimiyyətə qayıdan Heydər Əliyevin gərgin səyi ilə ölkəmizdə daxili və xarici siyasət sahəsində qazanılan uğurlardan, iqtisadiyyatımızın dirçəldilməsindən, bütün sahələrdə aparılan uğurlu islahatlardan danışıb.
Ümummilli Liderin parlaq dühası ilə qurulmuş və Prezident İlham Əliyevin rəhbərliyi ilə sürətlə inkişaf edib gündən-günə qüdrətlənən müstəqil Azərbaycan dövlətinin hər bir ölkə vətəndaşı üçün qürur mənbəyi olduğunu vurğulayan T.Qaraşov Azərbaycanın bütün bölgələri kimi, Lənkəranın da sürətlə inkişaf etdiyini, rayonun sosial-iqtisadi və mədəni həyatında köklü dəyişikliklərin, bütün sahələrdə inkişafın baş verdiyini bildirib.
Ümumrayon tədbiri Heydər Əliyev Xatirə Parkında respublikanın tanınmış incəsənət ustalarının ifasında bayram konserti ilə davam edib.
X X X
Milli Qurtuluş Günü ilə bağlı Lerik Rayon İcra Hakimiyyətində keçirilən ümumrayon tədbirində idarə, müəssisə və təşkilatların rəhbərləri, yaşlı nəslin, gənclərin və ictimaiyyətin nümayəndələri iştirak ediblər.
Toplantıda çıxış edən rayon icra hakimiyyətinin başçısı Rövşən Bağırov rayon sakinlərini əlamətdar bayramlar 15 İyun - Milli Qurtuluş Günü və müqəddəs Ramazan bayramı münasibətilə təbrik edib, onlara ən xoş arzularını çatdırıb.
1993-cü ilin 15 iyun gününün xalqımızın mübarizələrlə dolu şanlı tarixinə yeni dövrün başlanğıcı kimi daxil olduğunu vurğulayan R.Bağırov həmin günün, eyni zamanda, Heydər Əliyevlə Azərbaycan xalqının sarsılmaz birliyinin, həmrəyliyinin rəmzinə çevrildiyini bildirib.
Diqqətə çatdırılıb ki, ümummilli lider Heydər Əliyevin sağlam təməllər üzərində qurduğu siyasətin Prezident İlham Əliyev tərəfindən uğurla davam etdirilməsi nəticəsində Azərbaycan dünyada söz-nüfuz sahibinə çevrilib.
Tədbir Lerik Rayon İcra Hakimiyyəti başçısının müavini Arzu Vəliməmmədovanın Milli Qurtuluş Günü ilə bağlı məruzəsi və digər çıxışlarla davam etdirilib.
X X X
Cəlilabad şəhərindəki Heydər Əliyev Mərkəzində 15 İyun - Milli Qurtuluş Günü münasibətilə keçirilən ümumrayon tədbirinin iştirakçıları əvvəlcə ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad edib, rayon uşaq incəsənət məktəbinin rəssamlıq şöbəsinin şagirdləri - Əminə Əhmədova və Elmar Abdullazadənin əl işlərindən ibarət rəsm sərgisi ilə tanış olublar.
Tədbirdə çıxış edən Cəlilabad Rayon İcra Hakimiyyətinin başçısı Namiq Zeynalov rayon sakinlərini Milli Qurtuluş Günü və Ramazan bayramı münasibətilə təbrik edib.
Namiq Zeynalov çıxışında 1993-cü il iyunun 15-dən ötən dövrdə Azərbaycanın keçdiyi inkişaf yolundan, əldə olunan uğurlardan danışıb.
Ulu öndər Heydər Əliyevin hakimiyyətə qayıdışı ilə Milli Qurtuluş Günündən başlayan inkişaf yolumuzun 2003-cü ildən yeni liderin – Prezident İlham Əliyevin rəhbərliyi ilə yeni yüksəliş mərhələsinə qədəm qoyduğunu vurğulayan icra hakimiyyətinin başçısı bu gün ölkəmizdə Heydər Əliyev ideyalarının və siyasətinin uğurla davam etdirildiyini diqqətə çatdırıb.
Tədbirdə çıxış edən Prezident Administrasiyasının ictimai-siyasi məsələlər şöbəsinin əməkdaşı Bəhruz Həsənov bildirib ki, ulu öndər Heydər Əliyevin gənclərə diqqət və qayğısı Prezident İlham Əliyev tərəfindən uğurla davam etdirilir. 1993-cü ildə Azərbaycanın ən çətin vaxtlarında xalqın istəyi ilə hakimiyyətə gələn Ümummilli Lider gənclərin vətənpərvər ruhda tərbiyə edilməsinə, müasir biliklərə yiyələnməsinə böyük önəm verib, gənclər üçün əlverişli şəraitin yaradılması dövlət siyasətinin prioritetlərindən biri olub.
Ümumrayon tədbirində çıxış edənlər dövlətçilik tariximizə şərəfli və qürurverici səhifə kimi daxil olmuş Milli Qurtuluş Gününün tarixi əhəmiyyətindən danışıblar.
Tədbir Heydər Əliyev Mərkəzinin qarşısında respublikanın tanınmış incəsənət ustalarının konserti ilə davam edib.