Bakı, 3 may, AZƏRTAC

Aprelin 30-da İstanbulda işə başlayan “IDEF-2019” XIV beynəlxalq müdafiə sənayesi sərgisi başa çatıb.

Müdafiə Sənayesi Nazirliyindən (MSN) AZƏRTAC-a bildiriblər ki, Türkiyə Prezidentinin himayədarlığı və Milli Müdafiə Nazirliyinin təşkilatçılığı ilə 1993-cü ildən İstanbulda iki ildən bir keçirilən “IDEF” beynəlxalq müdafiə sənayesi sərgisi müdafiə, təhlükəsizlik, dənizçilik, aviasiya və kosmos sənayesi sahələrində əhəmiyyətli beynəlxalq təqdimat, marketinq və iş birliyi platforması olmaqla yanaşı, iştirakçı firma və heyət sayı etibarilə dünyanın ən böyük hərbi sənaye sərgilərindən birinə çevrilib. Bu sərgidə dünyanın aparıcı müdafiə sənayesi şirkətləri iştirak edərək məhsul və xidmətlərini təqdim edirlər.

MSN birinci dəfə “IDEF” sərgisinə 2009-cu ildə qatılıb və bu sərgi nazirliyin təmsil olunduğu ilk beynəlxalq sərgi olub. Həmin sərgidə 10 kvadratmetrlik bir guşə ilə təmsil olunan nazirlik “IDEF-2019” sərgisində müxtəlif çeşidli məhsullarını möhtəşəm milli pavilyonda nümayiş etdirib.

“IDEF-2019” sərgisində 70 ölkədən 1061 şirkət və 500-dən çox rəsmi nümayəndə heyəti, o cümlədən MSN-nin nazir müavini Yəhya Musayevin rəhbərliyi ilə geniş tərkibli nümayəndə heyəti iştirak edib. Sərgidə milli pavilyonla təmsil olunan MSN əsasən ixracyönümlü məhsullarını nümayiş etdirib. Snayper tüfəngləri, avtomatlar, hücum pulemyotları, qumbaraatanlar, minaatanlar, pirotexniki vasitələr, optik sistemlər, döyüş maşınları, pilotsuz uçuş aparatları, müxtəlif çaplı döyüş sursatları və digər hərbi təyinatlı məhsullar ziyarətçilər tərəfindən maraqla qarşılanıb.

MSN-nin müəssisələrində yaradılan “QFAB-250 LG” aviasiya bombasının inert nümunəsi xaricdə keçirilən sərgidə - “IDEF-2019” sərgisində ilk dəfə nümayiş etdirilib. NATO standartlarına uyğun yaradılan “QFAB-250 LG” aviasiya bombaları 12 min metrədək məsafədən hədəfi maksimum 10 metr sapma ilə vurmaq imkanı verir. Bu məmulat daxili tələbat və eyni zamanda, ixrac üçün nəzərdə tutulur.

Sərgi çərçivəsində nazir müavini Yəhya Musayevin Türkiyənin Müdafiə Sənayesi Komitəsinin sədri İsmayıl Dəmir, Cibutinin müdafiə naziri Əli Həsən Bahdon, Ukraynanın “Ukroboronprom” şirkətinin baş direktoru Pavlo Bukin, Pakistanın “GİDS” şirkətinin icraçı direktoru Tariq Cavaid və sərgidə iştirak edən bir sıra ölkələrin nümayəndə heyətlərinin rəhbərləri, eləcə də Qətərin, Bəhreynin nümayəndələri ilə görüşləri keçirilib. Görüşlərdə hərbi-texniki sahədə mövcud əməkdaşlıqların inkişaf etdirilməsi, yeni birgə layihələrin reallaşdırılması istiqamətində müzakirələr aparılıb və ümumi razılıqlar əldə edilib.

MSN-nin stendi sərgiyə ev sahibliyi edən qardaş ölkə Türkiyənin milli müdafiə naziri Hülusi Akar, Müdafiə Sənayesi Komitəsinin sədri İsmayıl Dəmir və eləcə də tədbirdə iştirak edən ölkələrin nümayəndə heyətlərinin rəhbərləri tərəfindən ziyarət edilib və nümayiş etdirilən məmulatlar böyük maraqla izlənilib. “IDEF-2019” sərgisinə qatılan Azərbaycanın müdafiə naziri və digər güc qurumlarının nümayəndələri də milli pavilyonumuzda olub və görüşlər keçiriblər.

Müdafiə naziri, general-polkovnik Zakir Həsənovla görüş zamanı nazir müavini Yəhya Musayev MSN adından Azərbaycan Ordusuna 50 revolver tipli əl qumbaraatanı hədiyyə edildiyini bildirib. Qumbaraatanların nümunəsi general-polkovnik Zakir Həsənova təqdim olunub.

Nazir müavini Yəhya Musayev və nazirliyin nümayəndələri sərgidə iştirak edən ölkələrin stendlərini də ziyarət edərək hərbi sənaye sahəsində əldə olunan yeniliklərlə tanış olublar. Türkiyənin “ASELSAN” şirkətinin stendinə baxış zamanı MSN ilə bu şirkət arasında əməkdaşlığın inkişafına dair müzakirələr aparılıb. Əldə olunan razılığa əsasən nazirliyin Elmi-Tədqiqat İnstitutu ilə “ASELSAN” şirkəti arasında protokol imzalanıb.

Sərgi çərçivəsində 2020-ci ildə Azərbaycanda keçiriləcək “ADEX-2020“ IV beynəlxalq müdafiə sərgisi ilə bağlı nazirliyin nümayəndə heyəti tərəfindən ziyarətçilərə ətraflı məlumat verilib.