Bakı, 24 may, AZƏRTAC

İnnovasiya və Rəqəmsal İnkişaf Agentliyinin (İRİA) təşkilatçılığı ilə “Ecosystem Spring Meetup” tədbiri keçirilib.

Agentlikdən AZƏRTAC-a bildirilib ki, ekosistem oyunçuları, korporativ sektorun nümayəndələri, startaplar və xarici ekspertlərin iştirakı ilə baş tutan tədbirdə yerli innovasiya sahəsində imkanlar, yeni çağırışlar istiqamətində müzakirələr aparılıb. Çıxışçılar arasında İnnovasiya və Rəqəmsal İnkişaf Agentliyinin sədr əvəzi İnarə Vəliyeva, İRİA-nın Beynəlxalq Biznesin inkişafı üzrə rəhbəri Lukas Tzitzis, İRİA-nın innovasiya ekosistemi şurasının üzvü, “Diaspora Ventures” şirkətinin nümayəndəsi, investor Marvin Liao, “Uniborn” şirkətinin nümayəndəsi Sebastien Tupi yer alıb.

Tədbir zamanı İnarə Vəliyeva Agentliyin 2023-cü ilin birinci rübü ərzində innovasiya ekosistemi və startapların inkişafının təşviq olunması istiqamətində gördüyü işlərdən, dəstəklədiyi proqram və layihələrdən bəhs edib. Bildirib ki, agentlik innovasiya ekosisteminin inkişafını 6 istiqamət üzrə aparır. Bura insan kapitalının inkişaf etdirilməsi, texnoloji sahibkarlığın inkişafı, investisiya ekosisteminin təşviqi, innovasiya ekosisteminin təşviqi, qanunvericiliyin tənzimlənməsi və infrastrukturun formalaşdırılması daxildir. Onun sözlərinə görə, insan kapitalının inkişaf etdirilməsi məqsədilə həyata keçirilən “Technest” Təqaüd Proqramı 2021-ci ildə 618, 2022-ci ildə 1500-dən artıq insanı İKT üzrə təqaüdlə təmin edib. 2023-cü ilin birinci tədris rübü üzrə 1626 nəfər təhsil alır, sentyabrda daha 1500 nəfərə təqaüd veriləcək. Eyni zamanda, İsrailin “Technion” institutu ilə təsis edilən Azərbaycan Kibertəhlükəsizlik Mərkəzində 60 nəfər kibertəhlükəsizlik üzrə intensiv tədris proqramına başlayıb. Təlimlərin növbəti mərhələsinə qeydiyyat davam edir.

Eyni zamanda, innovasiya ekosistemi üzrə atılan addımlardan və perspektivlərdən söz açan İnarə Vəliyeva bu təşəbbüslərin Azərbaycanın regionda yerli innovasiya mərkəzi kimi inkişaf etdirilməsində mühüm addımlar olduğunu bildirib.

Lukas Tzitzis çıxışında Azərbaycana gəlişi, Agentliklə birgə fəaliyyət çərçivəsində yerli ekosistem üçün görüləcək işlər və potensiallardan bəhs edib. Qeyd edib ki, Azərbaycan artıq beynəlxalq aləmdə tanınır: “Bu gün hamıya məlum olmayan ən vacib məqamlardan biri yeni qanunvericiliyin gətirdiyi əhəmiyyətli üstünlüklər və ölkənin təmin etdiyi yüksək həyat keyfiyyətidir. Məhz bu amillər və güclü İRİA komandası məni bu fürsəti dəyərləndirməyə sövq etdi”.

Tədbirin davamında Sebastien Tupi ekosistemə yeni təqdim edilən “Founders Academy” proqramının mahiyyəti haqqında geniş məlumat verib.

Daha bir yeni proqram olan “Silikon Vadisi mentorluq proqramı” Marvin Liao tərəfindən görüş iştirakçılarına təqdim edilib. Bildirilib ki, bu proqram inkişaf etmək və qlobal bazara çıxmaq potensialı olan yerli startaplara dünya miqyasında təcrübəli mentorluğa və təcrübəyə çıxışı təmin edir. Startaplara müntəzəm onlayn mentorluq sessiyaları təqdim edən proqram ödənişsizdir və müraciət qəbuluna artıq başlanılıb.

Qeyd edək ki, müntəzəm keçiriləcək bu tədbirlərin əsas məqsədi ekosistem iştirakçıları və startaplar ilə Agentlik arasında əlaqələri gücləndirmək, təcrübə və bilik, nailiyyətlər və planlar mübadiləsi üçün platforma yaratmaqdır.