DÜNYA


İndoneziyada Semeru vulkanının püskürməsi nəticəsində ölənlərin sayı 22 nəfərə çatıb VİDEO

Tokio, 7 dekabr, AZƏRTAC

İndoneziyanın Yava adasında yerləşən Semeru vulkanının püskürməsi nəticəsində ölənlərin sayı azı 22 nəfərə çatıb. Daha 20 nəfərin itkin düşdüyü bildirilir.

AZƏRTAC xəbər verir ki, bu barədə Təbii Fəlakətlərin Qarşısının alınması Agentliyinin nümayəndəsi məlumat verib.

“Xilasedicilər əməliyyat zamanı daha bir neçə cəsəd aşkar ediblər və beləliklə ölənlərin sayı 22-yə çatıb”, - deyə agentliyin nümayəndəsi bildirib. O, həmçinin ölənlərdən beşinin şəxsiyyətinin müəyyən edilmədiyini də deyib.

Bu ərəfədə agentliyin nümayəndələri dekabrın 4-də baş verən vulkan püskürməsi nəticəsində yerli sakinlərdən 27-sinin itkin düşdüyünü bildirmişdilər. Həmçinin 50 nəfərin müxtəlif dərəcəli yanıq xəsarətləri aldığı qeyd edilirdi.

İndoneziya hökuməti təbii fəlakətin nəticələrini aradan qaldırmaq üçün hazırda həm yerli, həm də qonşuluqda yerləşən əyalətlərin imkanlarından istifadə etməyə çalışır. Əraziyə elektrik enerjisinin verilməsi üçün də işlərə başlanılıb.

Dekabrın 7-də İndoneziya Prezidenti Coko Vidodonun zərərçəkmiş ərazilərə səfər edəcəyi və yerli sakinlərlə görüşəcəyi də bildirilir.

Əlavə olaraq qeyd edək ki, Semeru Yava adasında yerləşən ən hündür yüksəklikdir və ölkə ərazisində yerləşən təqribən 130 vulkanın ən fəalı hesab olunur.

 

Vüqar Ağayev

AZƏRTAC-ın xüsusi müxbiri

Tokio

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.