CƏMİYYƏT
İqlim dəyişməsini dayandırmaq: Ümumdünya Humanitar Yardım Günü ərəfəsində kampaniya
Bakı, 3 avqust, AZƏRTAC
BMT gecikmədən iqlim dəyişməsini dayandırmaq üçün planetin bütün sakinlərini zamanla yarışda iştirak etməyə çağırır.
Bu barədə AZƏRTAC təşkilatın saytına istinadla xəbər verir.
BMT-nin Humanitar Məsələlər İdarəsi “Strava” fiziki aktivlik üzrə populyar mobil əlavəsi ilə birlikdə iqlim dəyişməsi barədə məlumatlılığın artırılmasına həsr olunmuş və təbii fəlakətlər qarşısında ən həssas ölkələrlə həmrəyliyə çağıran kampaniyaya start verib.
#TheHumanRace kampaniyasının hashtagı – “əsas yarışdır”. Qlobal temperaturun artması irimiqyaslı təbii fəlakətlərə gətirib çıxarır. Humanitar təşkilatlar ön sıralardadır və insanlara ekstremal hava hadisələrinin nəticələrinin öhdəsindən gəlməyə kömək edirlər. Quraqlıq, güclü istilik dövrləri, meşə yanğınları və daşqınlar insan həyatına təhlükə yaradır, milyonlarla insanı evsiz və yaşamaq üçün vəsaitsiz qoyurlar. Və bu - yalnız başlanğıcdır. Alimlər xəbərdarlıq edir ki, təcili tədbirlər görülməzsə, fəlakətlər daha tez-tez baş verəcək.
Dünyanın tanınmış idmançıları və fəalları tərəfindən dəstəklənən kampaniya çərçivəsində, BMT bütün xoşməramlı insanları sevdikləri fiziki fəaliyyət növü ilə məşğul olmağa - avqustun 16-dan 31-nədək ümumilikdə 100 dəqiqə qaçmaq, üzmək, gəzmək, velosiped sürməyə çağırır. "Dövrümüzün ən vacib yarışında - planetimizin xilas edilməsinə həsr olunan yarışda iştirak edə biləcəyimə görə çox şadam”, - deyə braziliyalı idmançı Fernanda Masiel bildirir.
Kampaniyanın kulminasiyası avqustun 19-da qeyd olunan Ümumdünya Humanitar Yardım Günü olmalıdır. "İqlim böhranı hələ də uduzduğumuz zamanla yarışdır", - deyə BMT-nin Baş katibi Antonio Quterreş qeyd edib. "Odur ki, gəlin idman ayaqqabılarımızı geyinək və hər kəsin rifahı naminə bu yarışda qalib gələk".
Mobil tətbiqə abunə olan hər kəs noyabr ayında iqlim sammitində toplaşan dünya liderlərinə səslənən çağırışa səsini əlavə edəcək: iqlim dəyişməsini dayandırın və inkişaf etməkdə olan ölkələrə yardım məqsədilə hər il 100 milyard dolları təmin edin.