REGİONLAR
İran səfiri: Naxçıvan bu gün sosial-iqtisadi baxımdan çox sürətlə inkişaf edir
Naxçıvan, 15 noyabr, AZƏRTAC
Xəbər verdiyimiz kimi, İran İslam Respublikasının Azərbaycandakı fövqəladə və səlahiyyətli səfiri Cavad Cahangirzadə Naxçıvan Muxtar Respublikasına səfəri çərçivəsində noyabrın 14-də muxtar respublikanın mədəniyyət və istehsal müəssisələri ilə tanış olub. Cavad Cahangirzadə Naxçıvana səfəri ilə bağlı AZƏRTAC-a müsahibə verib.
Naxçıvan Muxtar Respublikasına səfərinin tanışlıq məqsədi daşıdığını bildirən səfir deyib:
– Regionun iki mühüm dövləti olan İran İslam Respublikası ilə Azərbaycan Respublikası arasındakı münasibətlər gündən-günə möhkəmlənir, əlaqələrimiz genişlənir. Təsadüfi deyil ki, üç il ərzində İran İslam Respublikasının Prezidenti Həsən Ruhani ilə Azərbaycan Respublikasının Prezidenti İlham Əliyev arasında yeddi görüş keçirilib. Ölkə rəhbərlərinin mütəmadi görüşləri, qarşılıqlı, faydalı müzakirələr aparmaları dünyada və regionda nadir hallarda rast gəlinən hadisələrdəndir. Ona görə də əminliklə deyə bilərik ki, bizim siyasi, iqtisadi əlaqələrimiz xeyli inkişaf edib.
– Hörmətli səfir, İran İslam Respublikası ilə Azərbaycan Respublikası arasındakı mövcud əlaqələri, eyni zamanda, bu əlaqələrdə Azərbaycanın Naxçıvan Muxtar Respublikasının rolunu necə qiymətləndirirsiniz?
– İranla Azərbaycan arasında bütün sahələrdə yüksək əməkdaşlıq əlaqələri mövcuddur. Biz diplomatların vəzifəsi də bu əlaqələrin daha da möhkəmlənməsinə xidmət etməkdir. Naxçıvan Muxtar Respublikası Azərbaycanın çox gözəl guşələrindən biridir. Naxçıvan həm də böyük ədəbiyyat, mədəniyyət, siyasət xadimlərinin vətənidir. Odur ki, bu gözəl diyarı görmək, muxtar respublika ilə tanış olmaq mənim üçün şərəfdir. Burada yüksək səviyyəli görüşlər keçirdim. Həmin görüşlərdə müsbət nəticələr əldə etdik.
İran ilə Azərbaycan bir sıra sahələrdə qarşılıqlı əməkdaşlıq edirlər. Hər iki ölkənin dəmir yollarını birləşdirəcək layihənin həyata keçirilməsi xüsusi əhəmiyyətə malikdir. Bu, İranla Azərbaycan arasında iqtisadi əlaqələrin daha da inkişaf etməsinə töhfə verəcək. Bundan başqa, həmin dəmir yolu xətti həm də Şimali Avropanı Cənub-Şərqi Asiya ilə birləşdirəcək. Çin, Hindistan kimi ölkələr istehsal etdiyi məhsulları əlverişli yolla Avropaya çatdıra biləcəklər. Əks istiqamətə də yüklərin daşınması həyata keçiriləcək. Bu layihə Azərbaycanın və İranın iqtisadiyyatının inkişafı baxımından da əhəmiyyətlidir.
Səfər zamanı muxtar respublikanın Ordubad rayonunda da oldum. Ordubad barədə çoxdan eşitmişdim. Bu rayon bölgənin məşhur diyarlarından biridir. Ordubad rayonu və Ordubad Rayon Tarix-Diyarşünaslıq Muzeyinin yerləşdiyi qədim “Qeysəriyyə” binası ilə tanışlıq məndə xoş təəssürat yaratdı.
Həmçinin gömrük-keçid məntəqələrinin fəaliyyəti ilə maraqlandım. Bu məntəqələr hər iki tərəfə gəliş-gedişlərin artmasına, iqtisadi münasibətlərin genişlənməsinə, turizmin inkişafına rəvac verir. Onu da qeyd edim ki, təxminən bir ay sonra Naxçıvan-Məşhəd dəmir yolu xətti fəaliyyətə başlayacaq. Bu istiqamətdə artıq işlər tamamlanmaq üzrədir. Dəmir yolu istifadəyə verildikdən sonra naxçıvanlılar rahat şəkildə Məşhədə ziyarətə gedə biləcəklər. İranlılar da qatar vasitəsilə muxtar respublikaya gələcəklər. Naxçıvan-Məşhəd dəmir yolu xəttinin fəaliyyətə başlaması gediş-gəlişin artmasına səbəb olacaq.
Bu gün Araz çayı sahilində Ordubad Su Elektrik Stansiyası tikilir. Gələcəkdə həmin stansiya Naxçıvana çox böyük fayda verəcək. Çünki muxtar respublikada istehsal müəssisələrinin sayı hər gün artır. Bu isə, öz növbəsində, enerjiyə olan tələbatı da artırır. Həmin stansiyanın tikintisi prezidentlərimizin razılığı ilə aparılır. İşlərin davam etdirilməsi üçün heç bir problem yoxdur.
– Naxçıvanla bağlı təəssüratlarınız barədə nə deyə bilərsiniz?
– Muxtar respublikadan çox xoş təəssüratlarla ayrılıram. Naxçıvanın gözəl gəzməli və görməli yerləri var. Muxtar respublika bu gün sosial-iqtisadi baxımdan sürətlə inkişaf edir. Ən əsası isə bu inkişaf davamlı xarakter alıb. Muxtar respublikanın şəhərləri ilə yanaşı, kəndləri də abadlaşıb. Arzu edirəm ki, Naxçıvan bundan sonra da sürətlə inkişaf etsin.
Mən Naxçıvan Biznes Mərkəzində olarkən muxtar respublikada istehsal edilmiş yüzlərlə çeşiddə məhsulun sərgiləndiyini gördüm. Sevindirici haldır ki, muxtar respublikada bir çox sahələr üzrə məhsul istehsal olunur. 366 növdə məhsulun istehsalı çox böyük uğurdur. Naxçıvanda çoxsaylı istehsal müəssisələrinin yaradılması da müsbət haldır. Arzum budur ki, daha böyük nailiyyətlər əldə edəsiniz.
Azərbaycanlı bacı və qardaşlarıma sülh, əmin-amanlıq, firavan həyat arzulayıram. İran xalqı həmişə Azərbaycanın inkişaf etməsini, sülh şəraitində yaşamasını istəyir. Azərbaycan və İran birlikdə yeni-yeni uğurlar qazanacaqlar.
Rauf Əliyev
AZƏRTAC-ın Naxçıvan Muxtar Respublikasındakı bürosunun rəhbəri