SİYASƏT


İraq qəzeti Azərbaycanın azad edilmiş torpaqlarında aparılan yenidənqurma işlərindən yazıb

Tehran, 21 iyun, AZƏRTAC

İraqdakı “Azzaman” qəzetində və saytında, həmçinin “Non 14.com” portalında Azərbaycanın bu ölkədəki səfirliyinin müvəqqəti işlər vəkili Nəsir Məmmədovun “İşğaldan azad edilmiş Azərbaycan torpaqlarında yenidənqurma və inşaat işləri həyata keçirilir” sərlövhəli məqaləsi dərc olunub.

AZƏRTAC xəbər verir ki, məqalədə Qarabağın işğaldan azad edilməsindən sonra bu ərazilərdə həyata keçirilən quruculuq işlərindən bəhs olunur.

Diqqətə çatdırılır ki, Füzuli rayonunda hava limanı tikilir, yeni elektrik stansiyaları quraşdırılır, su və qaz xətləri çəkilir. Lakin azad edilmiş ərazilərdə Ermənistan tərəfindən yerləşdirilmiş çoxsaylı minaların xəritələrinin hələ də Azərbaycan tərəfinə verilməməsi bu proseslərin sürətlənməsinə mane olur.

Eyni zamanda, qeyd edilməlidir ki, 2020-ci il 10 noyabr tarixli üçtərəfli Bəyanata uyğun olaraq Ağdam, Laçın və Kəlbəcər rayonlarından çıxarkən Ermənistan Azərbaycana mümkün qədər çox ziyan vurmaq, yenidənqurma və bərpa işlərinə mane olmaq, məcburi köçkünlərin öz torpaqlarına qayıdışına əngəl yaratmaq üçün də bu rayonların ərazisinə əlavə minalar yerləşdirib.

Yazıda Avropa İnsan Hüquqları Məhkəməsinin 2021-ci il 8 iyun tarixli qərarı xatırladılıb. Bildirilib ki, Ermənistan tərəfi Azərbaycan Respublikasının Cinayət Məcəlləsinin konkret maddələri ilə təqsirləndirilən 11 nəfərin azad edilməsi tələbi ilə Avropa İnsan Hüquqları Məhkəməsinə (AİHM) müraciət edib. Məhkəmə iyunun 8-də Ermənistanın tələbini Azərbaycan tərəfinin məsələ ilə bağlı təqdim etdiyi məlumatlar kontekstində dəyərləndirib və qeyd edilən 11 şəxsin azad olunması tələbini rədd edib. Məhkəmənin qərarı Ermənistan və havadarlarının iddialarının hüquqi baxımdan əsassızlığını göstərir.

Azərbaycan tərəfi təhvil verdiyi və saxlanılan digər ermənilərlə normal davranır. Onlar zəruri qidalarla təmin olunur, Beynəlxalq Qırmızı Xaç Cəmiyyəti (ICRC) tərəfindən bu şəxslərə baş çəkilməsinə, eləcə də qohumları ilə əlaqə saxlamalarına şərait yaradılıb.

Diplomat bildirib ki, Azərbaycan ilə Ermənistan arasında hərbi fəaliyyətlərin dayandırılmasını nəzərdə tutan 2020-ci il 10 noyabr tarixli Birgə Bəyanatın imzalanmasından sonra azad edilmiş ərazilərimizdə minaya düşmələri nəticəsində 144 azərbaycanlı hərbçi və ya mülki şəxs həlak olub.

Sonda diplomat dost İraq Respublikasını beynəlxalq hüquqa və beynəlxalq təşkilatlar qarşısında götürdüyü öhdəliklərə əsaslanaraq, Ermənistanı Azərbaycan Respublikası ərazisində yerləşən mina xəritələrini təqdim etməyə çağırış edəcəyinə əminliyini bildirib.

Rabil Kətanov

AZƏRTAC-ın xüsusi müxbiri

Tehran

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.