İDMAN
Jose Miguel Mateus: Avropa Oyunları Azərbaycan çimərlik futbolu üçün böyük təbliğat olacaq
Çimərlik futbolu üzrə Azərbaycan milli komandasının baş məşqçisi Jose Miguel Mateus “affa.az” saytına müsahibə verib.
AZƏRTAC həmin müsahibəni təqdim edir.
- Artıq bir neçə gündür Dubayda təlim-məşq toplanışındasınız. Hazırlıq prosesi necə gedir?
- Dubaya yeni mövsümün hazırlıqları üçün gəlmişik. İnterkontinental Kubokundan əvvəl bir neçə milli komanda ilə yoxlama oyunları keçirdik. Yüksək reytinqə malik Rusiya, Birləşmiş Ərəb Əmirlikləri (BƏƏ) yığmaları və BƏƏ-nin “Əl-Əhli” klubu ilə qarşılaşdıq. “Əl-Əhli” dünyada ən güclü klublardan biri hesab olunur. Dünyanın 3 ən yaxşı futbolçusu – portuqaliyalılar Macer, Benşot və Cordon məhz bu klubda çıxış edirlər. Təlim-məşq toplanışının da əsas məqsədi məhz daha çox oyun keçirmək istəyimizdir. Komandaya yeni futbolçular cəlb olunub. Yoldaşlıq oyunlarında onların nəyə qadir olduqlarını nəzərdən keçirdim.
- Futbolçuların hazırlıq səviyyəsi sizi qane edirmi?
- Son doqquz ayda bu futbolçularla birlikdə hazırlıq keçirik. Dünya və Avropa reytinqində yaxşı yerdə qərarlaşmışıq. Moskvada Avropa Liqasında uğurla çıxış edib Superfinala vəsiqə qazandıq. Superfinalda “B” divizionunda yer alan komandalarla mübarizədə ilk üç pillədə yer aldıq. Həmçinin çimərlik futbolu üzrə Avropa Kuboku – “Bakı-2014” turnirində iştirak etdik. Nəticə əldə edə bilməsək də, komandamız baxımlı oyun nümayiş etdirdi. Avropa Kubokunda “A” divizionunda yer alan komandalarla mübarizə aparırdıq. Seçmə mərhələdə isə 28 komanda arasında 13-cü yeri tutduq. Komandamızın üzvü Sabir Allahquliyev beş ən məhsuldar futbolçudan biri oldu. Komandanın orta səviyyəyə çatması üçün bir pillə qalıb. Daha çox inkişaf etmək, reytinqi yüksəltmək üçün geniş seçim imkanı olmalıdır.
- Gələn il ilk dəfə təşkil olunacaq Avropa Oyunlarına Azərbaycan ev sahibliyi edəcək. Avropa Oyunlarının proqramına daxil olan idman növləri arasında çimərlik futbolu da var. Komanda bu məsul yarışa nə dərəcədə hazırdır?
- Bu, bizim üçün çox böyük məsuliyyətdir. Həmin yarışda “A” divizionunda yer alan yeddi ən güclü komanda ilə mübarizə aparacağıq. Bilirik ki, çox çətin mübarizə olacaq. Hazırda “B” divizionunda yer alan Azərbaycan yığma komandası özünün inkişaf mərhələsini keçir. Söz veririk ki, yaxşı mübarizə aparacağıq. Məqsədimiz azarkeşlərə yaxşı, keyfiyyətli oyun göstərməkdir. Bütün oyunlara qələbə əzmi ilə çıxacağıq.
- Hazırda ölkəmizdə çimərik futbolu üzrə çempionat keçirilmir. Bunun üçün hansı təklifləriniz var?
- Milli çempionatı səmərəli keçirmək üçün layihələrimiz var. Regionlarda və ali təhsil müəssisələri arasında çempionat təşkil etməyi düşünürük. Planda, həmçinin U-19 və U-21 liqalarını keçirmək də var. Məqsəd odur ki, çimərlik futbolunun daha çox təbliğatını aparaq, yeni futbolçular cəlb edək. Çimərlik futbolunun inkişafını davam etdirmək üçün yeni nəsil yetişməlidir. Avropa Oyunlarından sonra çimərlik futboluna olan marağın daha da artacağını düşünürəm. Çimərlik futbolunun kütləviliyi üçün məktəblərdə də müvafiq işlər aparmaq lazımdır. Ümid edirəm ki, gələn il baxımlı milli çempionat keçiriləcək.
- Milli komandanın gələcək planları nədən ibarətdir?
- Yeni mövsümün hazırlıq planı üzərində işləyirik. Fikrimiz var ki, beynəlxalq yarışlarda iştirak edək, yüksək səviyyəli komandalarla yoxlama oyunları keçirək. Belə oyunlar futbolçuların inkişafı üçün lazımdır.
- AFFA baş məşqçinin planlarına müvafiq qaydada kömək edə bilirmi?
- Bəli, AFFA və Çimərlik Futbolu Federasiyası milli komandanın inkişafı üçün daim bizə dəstək olub. Ötən mövsüm 14 təlim-məşq toplanışı keçirmişik. Təlim-məşq toplanışı təşkil etmək istədikdə müsbət yanaşıblar, bizə hər cür şərait yaradıblar.
Təbii ki, əsas məsələ, ölkə çempionatının təşkili üçün addımların atılmasıdır. Hazırda çimərlik futbolu üzrə səkkiz komanda var. Həmin komandaların hər birində 10-12 futbolçu olsa, bizim daha çox seçim imkanımız yaranar. Təəssüf ki, həmin komandalar müntəzəm məşq etmirlər. Bu sayı daha da artırmaq lazımdır. Artıq hər bir milli komanda bizimlə hesablaşır, hörmətlə yanaşır. Biz öz oyunumuzla bunu bacarmışıq. Bunun məntiqi nəticəsi kimi, bir çox ölkə bizi yoldaşlıq görüşü keçirmək üçün dəvət edir. Hazırda millinin heyətində 18 futbolçu var. Qələbə arzusu ilə yaşamalı, qalib gəlməyi daha çox istəməliyik.
- Azərbaycan futbolunun ən yaralı yerlərindən biri son dəqiqələrdə qol buraxmaqdır. Bunu çimərlik futboluna da aid etmək olar. Bu çatışmazlığı aradan qaldırmaq istiqamətində hansı işlər görülür?
- Bu, daha çox əvvəllər belə idi. Oyuna daha yaxşı başlayırdıq, ancaq sonradan sanki “oyundan qopurduq”. Bunun da əsas səbəbi arxayınlıq idi. Komandanı həm fiziki, həm də psixoloji cəhətdən start fitindən sonuncu dəqiqəyədək hazır vəziyyətə gətirmək lazımdır. Bu istiqamətdə məşqlərdə futbolçularla daim söhbət edirəm. Məşqlərdə olan nizam-intizam oyunlarda da əksini tapmalıdır. Biz doğru yoldayıq. Gələn il keçiriləcək Avropa Oyunlarında dünyanın yeddi ən güclü komandası iştirak edəcək. Heç bir rəqibdən çəkinmədən layiqli mübarizə aparacağıq. Güman edirəm ki, Azərbaycan xalqı Avropa Oyunlarından sonra çimərlik futbolunu daha çox sevəcək. Bu, Azərbaycan çimərlik futbolu üçün böyük bir təbliğat olacaq.