REGİONLAR
Kəngərli rayonunun torpaq-iqlim şəraiti əkinçiliyin inkişafına geniş imkanlar yaradır
Kəngərli, 13 dekabr, AZƏRTAC
Muxtar respublikanın Kəngərli rayonunun torpaq-iqlim şəraiti burada əkinçiliyin bütün sahələri üzrə, əsasən də taxılçılığın inkişafına geniş imkanlar yaradır. Ona görə də hər il olduğu kimi, cari ilin payız əkinlərində də taxıl əkini üstünlük təşkil edir.
Naxçıvan Muxtar Respublikası Kənd Təsərrüfatı Nazirliyinin mətbuat xidmətindən AZƏRTAC-ın Naxçıvan bürosuna bildirilib ki, bu sözləri Kəngərli Rayon İcra Hakimiyyətinin Qıvraq qəsəbəsi üzrə nümayəndəliyində “Kənd təsərrüfatı bitkilərindən yüksək məhsul götürülməsində yeni texnologiyaların tətbiqi və torpaq xəritələrindən istifadənin əhəmiyyəti” mövzusunda keçirilən müşavirədə rayon icra hakimiyyətinin əməkdaşı Rəhim Abutalıbov deyib.
Muxtar respublikanın Kənd Təsərrüfatı Nazirliyinin əməkdaşı Xaliq Abbasov Naxçıvanda əkinçiliyin inkişafında Kəngərli rayonunun torpaq mülkiyyətçilərinin də əməyinin olduğunu vurğulayıb. Payızlıq taxıl sahələrinin şırım üsulu ilə aparılmasının əhəmiyyətindən danışaraq bildirib ki, şırım üsulunun tətbiqi suvarma sularından maksimum səmərəli istifadə olunmasına şərait yaradır, sonrakı aqrotexniki tədbirlərin aparılmasında texnikaların işləməsini asanlaşdırır, torpaqların şoranlaşmasının qarşısı alınır. Dəmyə ərazilərdə əkilən taxıl sahələrində şırımların çəkilməsi ərazidə yağış sularının toplanmasına şərait yaradır, qarın küləklə sovrulmasının qarşısını alır, bu da əkinlərdə vegetasiya ərzində torpaqda nəmliyin və rütubətin saxlanmasına kömək edir.
Daşınmaz Əmlak və Torpaq Məsələləri üzrə Dövlət Komitəsinin əməkdaşı İntizar Həziyev vurğulayıb ki, muxtar respublikanın coğrafi iqlim şəraiti və torpaq tipləri nəzərə alınaraq əkin atlasları hazırlanıb. Əkin atlaslarında muxtar respublikanın hər bir bölgəsi üçün xarakterik rayonlaşdırılmış sortların əkilməsi, torpaq-iqlim şəraitinə görə becərmə texnologiyasının tətbiqi qeyd olunub.
“Fermerlər yüksək məhsuldarlığa nail olmaq üçün öz torpağının strukturunu, mineral gübrələrə tələbatını bilməlidir”, - deyən Akademik Həsən Əliyev adına “Araz” Elm İstehsalat Birliyinin əməkdaşı Fazilə Fərəcova bildirib ki, əkindən öncə torpaq analizi götürülməli, onda çatışmayan mikroelementlər müəyyənləşməli, lazım olan qida maddələri üzvi və mineral gübrələr vasitəsilə torpağa verilməlidir. Torpaqların analizinin aparılması üçün “Araz” Elm İstehsalat Birliyində quraşdırılmış yeni avadanlıqlar mövcuddur. Mülkiyyətçilər müraciət etdikdə torpaq nümunələri analiz olunaraq yekun rəy verilir.
Sonda sahibkarları maraqlandıran suallar cavablandırılıb, Şahtaxtı, Xok, Qarabağlar icra nümayəndəliyinin əməkdaşlarına tərtib olunmuş kartoqramlar verilib.