REGİONLAR


Lənkəranda ümumi məhsul istehsalı 2,1 faiz artıb

Lənkəran, 13 oktyabr, Bağır Əliyev, AZƏRTAC

Lənkəran şəhərindəki Heydər Əliyev Mərkəzində bu ilin doqquz ayında rayonun sosial-iqtisadi inkişafı sahəsində görülmüş işlər və qarşıda duran vəzifələr müzakirə edilib.

AZƏRTAC xəbər verir ki, toplantıda çıxış edən Lənkəran Şəhər İcra Hakimiyyətinin başçısı Taleh Qaraşov hesabat dövründə ölkəmizin bütün bölgələri kimi, Lənkəranın da sosial-iqtisadi və mədəni həyatında bir sıra uğurların qazanıldığını qeyd edərək rayon ərazisində genişmiqyaslı abadlıq və quruculuq işlərinin həyata keçirildiyini, irihəcmli layihələrin vaxtında icra edildiyini və yeni layihələrin icrasına başlanıldığını bildirib.

Hesabat dövrünün ən əlamətdar hadisəsi kimi sentyabrın 2-də Prezident İlham Əliyevin Lənkəran şəhərinə səfərinin əhəmiyyətini yüksək dəyərləndirən T.Qaraşov dövlətimizin başçısının yeni obyektlərin açılışında iştirakının və əməkçilərlə iş başında səmimi görüşünün hər bir rayon sakininə böyük sevinc bəxş etdiyini vurğulayıb.

T.Qaraşov çıxışında, həmçinin, sentyabrın 3-də Prezident İlham Əliyevin sədrliyi ilə Lənkəranda çay, çəltik və sitrus meyvələri istehsalının inkişafı məsələlərinə dair respublika müşavirəsinin keçirildiyini diqqətə çatdıraraq ölkə başçısının müşavirədə söylədiyi dərin məzmunlu, proqram xarakterli nitqinin lənkəranlılar qarşısında mühüm vəzifələr qoyduğunu bildirib.

Qeyd olunub ki, hesabat dövründə rayonda ümumi məhsul buraxılışı 2,1 faiz artaraq 310,5 milyon manat təşkil edib. Kənd təsərrüfatında işlərin daha da sürətlənməsi hesabına məhsul istehsalının həcmi artıb. Yeni çay və sitrus plantasiyaları salınıb, çəltik zəmiləri genişləndirilərək 526,5 hektara çatdırılıb, çəltik emalı zavodu tikilib istifadəyə verilib. Cari ildə rayonda 1443 ton çəltik məhsulu tədarük olunub və hazırda yığım davam etdirilir. Sahibkarlığa kömək Milli Fondunun xəttilə sahibkarlara və iş adamlarına 352 min manat güzəştli kreditlər verilib.

Bu dövrdə rayonun Təngivan kəndində 36 yerlik yeni modul məktəb binası, Moloja kəndində 100 şagird yerlik əlavə tədris korpusu, evləri qəzalı vəziyyətdə olan ailələr üçün rayonun ayrı-ayrı yaşayış məntəqələrində Fövqəladə Hallar Nazirliyi tərəfindən 5 fərdi ev tikilib istifadəyə verilib.

Göyşaban yol dairəsindən Heydər Əliyev prospektinə qədər məsafədə 10 min kvadratmetr sahəyə asfalt döşənib. Şəhərdaxili küçələrdə 14,7 min kvadratmetr sahə əsaslı təmir edilərək asfaltlanıb.

Hesabat dövründə şəhərdəki 21 çoxmərtəbəli yaşayış binasının dam örtüyü dəyişdirilib, 5 çoxmənzilli yaşayış binasının pilləkən qəfəsləri təmir olunaraq rənglənib. Park və bağlarda 37 min ağac, dekorativ ağac və gül kolları əkilib. Magistral yollar boyunca və küçələrdə 15 min kvadratmetr hasar təmir edilib rənglənib və 3 min paqonniy metr bardür, 3,7 min kvadratmetr tamet döşənib.

Ötən müddətdə rayonda ümumilikdə 2858 yeni iş yeri açılıb. Onlardan 2134-ü daimi iş yerləridir.

Şura iclasında çıxış edənlər bu ilin doqquz ayında rayonun aqrar sektorunda və xidmət sahələrində görülmüş işlər barədə ətraflı məlumat verərək qarşıda duran vəzifələrdən danışıblar.

Çıxışlarda, həmçinin Lənkəran şəhərində qəzalı vəziyyətdə olan çoxmənzilli yaşayış binalarında əsaslı təmir və bərpa işlərinin aparılması, Olimpiya İdman Kompleksinin tikintisinin davam etdirilməsi, sitrus meyvələri, çay və çəltik istehsalının inkişafı ilə bağlı əlavə tədbirlər barədə Azərbaycan Prezidentinin imzaladığı Sərəncamların rayonda əhali tərəfindən minnətdarlıq hissi ilə qarşılandığı qeyd olunub.

İcra hakimiyyətinin başçısı şura iclası yekunlaşdıraraq qarşıdakı dövrdə nəzərdə tutulmuş vəzifələrin icrasından ötrü bütün imkanların səfərbər olunması ilə bağlı müvafiq tapşırıqlarını verib.

Şura iclasında müzakirə olunan məsələ ilə əlaqədar müvafiq qərar qəbul edilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.