Bakı, 28 sentyabr, AZƏRTAC

Lökbatan qəsəbəsi Heydər Əliyev Mərkəzində 27 Sentyabr - Anım Günü ilə əlaqədar ümumrayon tədbiri keçirilib. Tədbirdə Qaradağ Rayon İcra Hakimiyyətinin başçısı, şəhid ailələri və qazilər, rayon icra hakimiyyətinin rəsmiləri, Milli Məclisin deputatları, YAP Qaradağ rayon təşkilatının sədri və ictimaiyyət nümayəndələri iştirak ediblər.

AZƏRTAC xəbər verir ki, ölkəmizin ərazi bütövlüyünün təmin edilməsi, torpaqlarımızın işğaldan azad olunması uğrunda döyüşlərdə şəhidlik zirvəsinə ucalan Vətən övladlarının xatirəsi bir dəqiqəlik sükutla yad edilib. Azərbaycanın Dövlət Himni səsləndirilib.

Anım Gününə həsr olunmuş tədbirdə Qaradağ Rayon İcra Hakimiyyətinin başçısı Süleyman Mikayılov 2022-ci il sentyabrın 27-də başlayan Vətən müharibəsinin Azərbaycanın tarixi Qələbəsi ilə başa çatdığını, noyabrın 10-da Azərbaycan, Rusiya prezidentlərinin və Ermənistan baş nazirinin imzaladıqları üçtərəfli Bəyanatla münaqişəyə son qoyulduğunu, bu sənədin, həmçinin Ermənistanın kapitulyasiya aktı olduğunu, Azərbaycanın öz torpaqlarını işğaldan azad edərək həm tarixi ədaləti, həm də ərazi bütövlüyünü bərpa etdiyini diqqətə çatdırıb. Azərbaycan Prezidenti İlham Əliyevin 2020-ci il 2 dekabr tarixli Sərəncamı ilə hər il sentyabrın 27-sinin Azərbaycanda Anım Günü kimi qeyd edilməsi qərara alınıb.

Qeyd edilib ki, Ali Baş Komandan İlham Əliyevin rəhbərliyi ilə aparılan əks-hücum əməliyyatlarında qaradağlılar da böyük şücaət və əzmkarlıq nümunələri göstəriblər. Vətən müharibəsində Qaradağ rayonu üzrə 2514 nəfər iştirak edib, onlardan 46 nəfəri şəhidlik zirvəsinə yüksəlib, 157-si isə yaralanıb, 65 nəfər əlillik dərəcəsi alıb. Torpaqlarımızın işğaldan azad olunması zamanı hərbi əməliyyatlarda iştirak edərək igidlik və şücaət nümayiş etdirmiş, vəzifə borcunu ləyaqətlə və vicdanla, döyüş tapşırıqlarını uğurla yerinə yetirmiş Azərbaycan Silahlı Qüvvələrinin hərbi qulluqçuları Prezident İlham Əliyevin sərəncamları ilə “Vətən Müharibəsi Qəhrəmanı” adı, müxtəlif orden və medallarla təltif olunublar.

Bildirilib ki, Prezident İlham Əliyev Vətən müharibəsində şəhidlik zirvəsinə ucalanların ailə üzvlərinə, qüdrətli Azərbaycan Ordusunun hərbçilərinə, qazilərə daim xüsusi diqqət və qayğı göstərir. Bu qəbildən olan vətəndaşlarımızın sosial müdafiəsinin möhkəmləndirilməsi, o cümlədən mənzil, fərdi ev və avtomobillərlə təmin edilməsi istiqamətində həyata keçirilən kompleks tədbirlərin bunun bariz nümunəsi olduğu qeyd edilib.

Bu şanlı Qələbənin Azərbaycanın dövlətçilik tarixində yeni bir mərhələnin, yeni dövrün başlanğıcı olduğunu bildirən rayon icra hakimiyyətinin başçısı vurğulayıb ki, Prezident İlham Əliyevin qeyd etdiyi kimi, bu dövr inkişaf, təhlükəsizlik, tərəqqi dövrüdür. Prezident İlham Əliyevin Şuşa şəhərinə və işğaldan azad olunmuş digər şəhər və rayonlarımıza səfərləri, həmin səfərlər çərçivəsində çox mühüm tədbirlərdə iştirakı, açılış və təməlqoyma mərasimlərinin keçirilməsi bir daha Azərbaycan dövlətinin gücünü və qüdrətini hər kəsə nümayiş etdirir. Əlbəttə, zaman ötdükcə dövlətimizin və Ordumuzun Qələbəsinin bütün tariximizi, milli varlığımızı, dövlətçilik ənənələrimizi, fiziki və mənəvi dünyamızı necə dəyişdiyinin daha çox fərqində olacaq, bunu daha ətraflı dərk edəcəyik. Vətəni canından əziz tutanlar heç vaxt unudulmayacaq.

Tədbirdə Milli Məclisin deputatı Aydın Hüseynov çıxış edərək bildirib ki, 2020-ci il sentyabrın 27-də Azərbaycan Prezidenti, Müzəffər Ali Baş Komandan İlham Əliyevin 30 il davam edən erməni işğalına qarşı başlatdığı Vətən müharibəsi 44 gün sonra Zəfərlə başa çatıb. Prezident İlham Əliyevin düşünülmüş strategiyası, siyasi iradəsi və qətiyyəti sayəsində Azərbaycan Ordusunun canı-qanı bahasına torpaqlarımız işğaldan azad olunub, Azərbaycan Vətən müharibəsində böyük Zəfər qazanıb, regionda yeni reallıq yaradıb. Vətən müharibəsi Azərbaycanın tam Qələbəsi və Ermənistanın kapitulyasiyası ilə nəticələnib.

Sonra şəhid Türkay Hüseynlinin atası Nizami Hüseynov çıxış edərək bildirib ki, Vətən müharibəsinin ilk günlərindən hərbi əməliyyatlarda övladı da iştirak edib, igidlik, şücaət nümayiş etdirərək şəhidlik zirvəsinə ucalıb. O, Müzəffər Ali Baş Komandan İlham Əliyevin Vətən müharibəsi iştirakçılarına, o cümlədən şəhid Türkayın xidmətlərinə yüksək qiymət verdiyini diqqətə çatdırıb. Prezident İlham Əliyevin müvafiq sərəncamları ilə “Vətən Uğrunda”, “Cəbrayılın azad olunması” medalları ilə və “Rəşadət” ordeni ilə təltif olunub.

Daha sonra şəhid Səməndər İsmayılzadənin anası Fəridə İsmayılova çıxışında ölkəmizin digər yerlərində olduğu kimi, Qaradağ rayonunda da Prezident İlham Əliyev tərəfindən şəhidlərin ailə üzvlərinə və qazilərə diqqətin hər zaman yüksək səviyyədə olduğunu qeyd edib, dövlət qayğısını həmişə hiss etdiklərini bildirib. Vətənə böyük sevgiləri olan belə qəhrəmanların ömür yolu gənclərin vətənpərvərlik ruhunun formalaşmasında müstəsna rol oynayır. Qəhrəmanlıqları ilə dastan yazan igid oğullarımızı yad etməyin, xatırlamağın, gələcək nəsillərə çatdırmağın hər birimizin üzərinə düşən ən müqəddəs vəzifə olduğunu qeyd edib.

Tədbirdə Vətən müharibəsi qazisi Cavid Hüseynov çıxış edərək bildirib ki, Azərbaycan tarixinin şanlı səhifəsi olan 44 günlük Vətən müharibəsi nəticəsində 30 illik həsrətə son qoyulub. Ordumuz işğal altındakı torpaqları düşməndən azad edib. Tarix yazan qəhrəman Ordumuz, əsgər və zabitlərimiz Azərbaycanın haqq yolunda mübarizə aparmaq əzmini, əsl döyüş ruhunu bütün dünyaya nümayiş etdirib. O, müharibənin ilk günlərindən hərbi əməliyyatlarda Füzuli, Cəbrayıl, Xocavənd rayonu istiqamətində düşmənə qarşı döyüşdüyünü və hərbi əməliyyatlar zamanı Xocavəndin azad olunması uğrunda gedən döyüşlərdə ağır yaralandığını qeyd edib. Cavid Hüseynov Prezident İlham Əliyevin müvafiq sərəncamları ilə “Vətən müharibəsi iştirakçısı”, “Cəbrayılın azad olunmasına görə” və “Xocavəndin azad olunmasına görə” medalları ilə təltif olunduğunu bildirib.

Sonra Lökbatan qəsəbəsindəki Şəhidlər xiyabanını ziyarət edən tədbir iştirakçıları şəhidlərin məzarları önünə əklil və gül dəstələri qoyub, ruhlarına dualar oxuyublar.

Qaradağ Rayon İcra Hakimiyyətinin başçısı Süleyman Mikayılov, müavinlər, şöbə müdirləri və icra hakimiyyətinin əməkdaşları qəsəbələrdə dəfn olunmuş bütün şəhid məzarlarını ziyarət ediblər.