Milli Məclisin Avropa Şurası Parlament Assambleyasındakı nümayəndə heyətinin başçısı İlham Əliyev yanvarın 22-də Strasburqda CNN-Türk telekanalına canlı yayımda müsahibə vermişdir. 

SUAL: Cənab İlham Əliyev, Avropa Şurası Parlament Assambleyasında iddia edilir ki, Azərbaycanda siyasi məhbuslar var. Mətbuatda verilən xəbərlərə görə, siyasi məhbusların azad edilməməsi AŞPA ilə Azərbaycan arasında əlaqələrə təhlükə törədə bilər.

Cənab İlham Əliyev, siyasi məhbuslar məsələsi nədən ibarətdir? Azərbaycan AŞPA-dan nələr gözləyir?

CAVAB: Axşamınız xeyir. Düz bir il bundan öncə Azərbaycan Avropa Şurasına üzv oldu. Bu bir il müddətində Azərbaycanın Avropa strukturlarına inteqrasiya olunması prosesi çox sürətlə getmişdir. Bir il ərzində biz Azərbaycan cəmiyyətinin demokratikləşməsində çox böyük uğurlar əldə etmişik.

Sizin qeyd etdiyiniz məsələ indiki sessiyanın gündəliyinə salınmışdır. Biz hesab edirik ki, bu, Azərbaycana qarşı çox ədalətsiz mövqedir. Çünki Azərbaycanda siyasi məhbuslar yoxdur. Ümumiyyətlə, dünyada siyasi məhbus anlayışı mövcud deyildir. Ona görə də biz Azərbaycana qarşı hansısa xüsusi bir meyarla yanaşmağı ədalətsiz addım hesab edirik. Biz burada öz sözümüzü demişik, deyirik və gələcəkdə də deyəcəyik. Əgər kimsə hansısa məhbuslar barədə narahatdırsa, biz hər bir məsələni yalnız və yalnız hüquqi müstəvidə araşdırmağa hazırıq. Buna siyasi don geyindirmək düzgün deyildir.

SUAL: Hörmətli İlham Əliyev, Azərbaycan ilə Türkiyəni yaxınlaşdıran bir çox məsələlərdən biri də Bakı-Tbilisi-Ceyhan layihəsidir. Möhtərəm Heydər Əliyev bu layihə ilə bağlı maneələrin aradan qaldırılması və onun reallaşması üçün çox böyük səylər göstərmişdir. Bu maneələr bir çox ölkələr, xüsusən Rusiya tərəfindən oldu və cənab Heydər Əliyev onların qarşısını məharətlə aldı. Hazırda Rusiyanın “Lukoyl” şirkəti bu kəmərin çəkilməsində iştirak etmək istədiyini bildirmişdir. Sizcə, Bakı-Tbilisi-Ceyhan layihəsi ilə bağlı maneələrin aradan qalxdığını deyə bilərikmi? Bu barədə nə deyə bilərsiniz?

CAVAB: Mən hesab edirəm ki, Bakı-Tbilisi-Ceyhan layihəsinin qarşısında heç bir əngəl yoxdur. Azərbaycan Prezidenti Heydər Əliyev bu strateji seçimini hələ 1994-cü ildə etmişdir. O zaman bildirmişdir ki, Bakı-Tbilisi-Ceyhan neft kəməri Azərbaycanın neft strategiyasının əsas tərkib hissəsidir. Prezidentimiz 1994-cü ildən indiyədək bu istiqamətdə çox böyük işlər görür. Düzdür, müəyyən qüvvələr bu müddət ərzində müxtəlif əngəllər törətmək istəmişlər. Lakin Azərbaycanın siyasi iradəsi bütün bu əngəlləri aradan götürmüşdür. Biz indi deyə bilərik ki, Bakı-Tbilisi-Ceyhan layihəsi artıq reallığa çevrilmişdir. Bu bir gerçəklikdir və onunla hər kəs hesablaşmalıdır. İnşallah, bir neçə aydan sonra tikinti işləri başlanacaq və boru kəməri tezliklə inşa olunub istismara veriləcəkdir.

SUAL:  Cənab İlham Əliyev, siz həm Azərbaycanın, həm də Azərbaycanın üzv olduğu Avropa Şurasının siyasi aləmində xüsusi yeri olan önəmli bir şəxsiyyətsiniz. Türkiyə-Azərbaycan əlaqələrinin gələcəyi barədəqısaca nə deyə bilərsiniz?

CAVAB: Bunu bir-iki cümlə ilə söyləmək çox çətindir. Türkiyə və Azərbaycan qardaş ölkələrdir. Bizim kökümüz də, dilimiz də, dinimiz də birdir. Biz qardaşıq, bir-birimizə qardaş kimi baxırıq. Türkiyə-Azərbaycan müttəfiqliyi, strateji tərəfdaşlığı artıq reallıqdır. Sadəcə olaraq, hər bir vətəndaş, Türkiyə vətəndaşı, Azərbaycan vətəndaşı – öz vəzifəsindən asılı olmayaraq, bu münasibətləri, qardaşlığı daha da möhkəmlətməlidir.

Mən hesab edirəm ki, Azərbaycan ilə Türkiyənin bugünkü və gələcək əlaqələri daim yüksək səviyyədə olacaq və gələcək nəsillər  də bu qardaşlığı davam etdirəcəklər.

JURNALİST: Hörmətli İlham Əliyev, proqramımızda iştirak etdiyinizə, suallarımıza ətraflı cavab verdiyinizə və fikirlərinizi bizimlə bölüşdüyünüzə görə sizə çox minnətdarıq. Gecəniz xeyrə qalsın.

İLHAM ƏLİYEV: Təşəkkür edirəm, gecəniz xeyrə qalsın.