SİYASƏT
MOSKVADA PARLAMENTLƏRARASI KOMİSSİYANIN ÜÇÜNCÜ İCLASI KEÇİRİLMİŞDİR
İclasda iştirak etmək üçün Milli Məclis sədrinin birinci müavini, komissiyanın həmsədri Arif Rəhimzadə başda olmaqla parlament nümayəndə heyəti Moskvaya gəlmişdir. Nümayəndə heyətinə deputatlar Asya Manafova, Eldar Qəhrəmanov, Mixail Zabelin, Fikrət Sadıqov, Milli Məclisin nümayəndəsi – MDB Parlamentlərarası Assambleya Şurası baş katibinin müavini Aydın Cəfərov daxildirlər. Azərbaycan nümayəndə heyətinə ilk dəfə olaraq Xarici Ölkələrdə Yaşayan Azərbaycanlılarla İş üzrə Dövlət Komitəsinin nümayəndəsi Rizvan Əliyev və Ümumrusiya Azərbaycan Konqresi prezidentinin müşaviri Eldar Quliyev də daxil edilmişlər. Komissiyasının iclasının işində Azərbaycanın Rusiyadakı səfiri Ramiz Rizayev də iştirak etmişdir.
İclası ikitərəfli parlamentlərarası komissiyanın Rusiyadan həmsədri – Federasiya Şurasının MDB işləri komitəsi sədrinin birinci müavini Konstantin Markelov açmışdır. O, çıxışında Azərbaycan və Rusiya parlamentlərarası əlaqələrinin səviyyəsini yüksək qiymətləndirərək dedi ki, qarşılıqlı əməkdaşlığın qanunvericilik bazasının təmin olunmasında parlamentlərin üzərinə xüsusi məsuliyyət düşür.
Arif Rəhimzadə çıxışında, ilk növbədə, Azərbaycanda prezident seçkilərinin nəticələrindən və cavan, enerjili, artıq dünyada tanınmış siyasi xadim İlham Əliyevin böyük üstünlüklə dövlət başçısı seçilməsindən, onun ilk addımlarından danışdı və bildirdi ki, bu addımlar dövlətlərimizin əməkdaşlıq xəttinin - əsası Heydər Əliyev və Vladimir Putin tərəfindən qoyulmuş xəttin davam etdirildiyini göstərir. İlham Əliyevin Rusiyaya ilk rəsmi səfəri ölkəmizdə Azərbaycan-Rusiya münasibətlərində irəliyə doğru böyük addım kimi qiymətləndirilir. Dövlətlərarası münasibətlərin dərinləşməsinə və genişlənməsinə parlamentlər də öz töhfəsini verməlidir”.
İclasda ”Rusiya Federasiyası Federal Məclisinin və Azərbaycan Respublikası Milli Məclisinin ikitərəfli parlamentlərarası komissiyasının 2-ci iclasının 2003-cü il 26 sentyabr tarixli qərarlarının yerinə yetirilməsinin gedişi haqqında”, “2010-cu ilədək olan dövr üçün uzunmüddətli Rusiya-Azərbaycan iqtisadi əməkdaşlıq proqramının həyata keçirilməsinin qanunvericilik təminatı tədbirləri haqqında”, “Azərbaycan Prezidenti İlham Əliyevin 2004-cü il fevralın 5-6-da Rusiya Federasiyasına səfərinin gedişində əldə edilmiş razılaşmaların həyata keçirilməsində milli parlamentlərin qarşılıqlı fəaliyyəti haqqında”, “Rusiyanın və Azərbaycanın sərhəd və gömrük xidmətlərinin fəaliyyətini tənzimləyən milli qanunvericiliklərin eyniləşdirilməsinə dair təkliflər haqqında”, “Rusiya Federasiyası Federal Məclisinin və Azərbaycan Respublikası Milli Məclisinin ikitərəfli parlamentlərarası komissiyası həmsədrlərinin Azərbaycan ilə Rusiya arasında iqtisadi əməkdaşlıq üzrə hökumətlərarası komissiyanın tərkibinə daxil edilməsi haqqında” məsələlər müzakirə olundu.
Tərəflər görülmüş işdən ümumən razı qaldıqlarını bildirərək, iki dövlətin qanunvericilik bazasının daha dərindən öyrənilməsi və araşdırılması üçün işçi qruplarının daha sıx əməkdaşlıq etməsinin vacibliyini vurğuladılar.
İclasda Azərbaycan ilə Rusiya arasında sərhədyanı əlaqə məsələsi və sərhədin keçilməsindəki çətinliklər, habelə yükdaşımaları ilə bağlı çətinliklər də müzakirə mövzusu oldu. Milli Məclisin üzvləri Rusiyanın gömrük və sərhəd xidmətlərinin ünvanına bir sıra iradlarını bildirərək dedilər ki, Azərbaycan-Rusiya sərhədində yaradılan süni maneələr Azərbaycan ilə Rusiya arasında iqtisadi əməkdaşlığa və əmtəə dövriyyəsinin iki dəfə artırılması proqramının həyata keçirilməsinə ziyan vurur.
A.Rəhimzadə Azərbaycanın işğal edilmiş ərazisi olan Dağlıq Qarabağa Rusiyanın beynəlxalq kommunikasiya kodu verməsi ilə əlaqədar narahatlığını da açıqladı. Bunun cavabında komissiyanın Rusiyadan həmsədri Konstantin Markelov dedi ki, işçi qrupu bu məsələyə müvafiq instansiyalarda baxacaqdır.
Komissiyanın iclası, ümumən uğurla keçdi, qarşılıqlı maraq doğuran bütün məsələlər üzrə açıq dialoq aparıldı. Komissiyanın irad və arzuları, o cümlədən Azərbaycan tərəfinin iradları iclasın işində iştirak edən Rusiyanın gömrük və sərhəd xidmətlərinin nümayəndələrinə çatdırıldı.
Parlamentlərarası komissiyanın növbəti, dördüncü iclasını cari ilin oktyabrında Bakıda keçirmək qərara alındı.
Komissiyanın həmsədrləri A.Rəhimzadə və K.Markelov iclasın yekunlarına dair mətbuat konfransı keçirərək, Rusiya və Azərbaycanın jurnalistlərinin suallarına cavab verdilər.