Rusiyanın Avropa hissəsi müsəlmanlarının Ruhani İdarəsində müqəddəs Quranın rus dilinə gənc soydaşımız Elmir Quliyev tərəfindən edilmiş məzmunca tərcüməsinin təqdimat mərasimi keçirilmişdir. Dini Qurumlarla İş üzrə Dövlət Komitəsinin böyük mütəxəssisi Elmir Quliyev Quranı rus dilinə çevirən ilk və yeganə Azərbaycan alimidir. Kitabın təqdimatı Rusiyanın Avropa hissəsi müsəlmanlarının Ruhani İdarəsinin və şəxsən Rusiya Müftilər Şurasının sədri şeyx Ravil Qaynuddinin, habelə Moskva İslam Universitetinin və “Ümma” nəşriyyat evinin köməyi ilə keçirilmişdir.

Demək lazımdır ki, Rusiya quranşünaslığının zəngin ənənələri var, bu kitabı rus dilinə İ.Kraçkovski, M.-N.O.Osmanov, B.Şidfar, Valeriya Poroxova və başqaları tərcümə etmişlər. Elmir Quliyev öz tərcüməsində əvvəlki mütərcimlərin təcrübəsindən bəhrələnmişdir. Oxucuların ayrı-ayrı ayələri daha dərindən başa düşmələri üçün onlar Məhəmməd peyğəmbər haqqında diqqətəlayiq rəvayətlərə və hədislərə əsaslanan şərhlərin tərcümələri ilə tamamlanmışdır.

Tərcüməçi mərasimdə çıxış edərək demişdir ki, o, iş prosesində Quranın İslam tarixinin ən erkən çağlarında formalaşmış təfsirinin əsas prinsiplərindən kənara çıxmayaraq, onun ayələrinin mənasını çatdırmağa səy göstərmişdir. O qeyd etmişdir ki, tərcümənin səhihliyinə böyük əhəmiyyət verərək, müsəlman dünyagörüşünə və müqəddəs kitabın özünün ruhuna zidd olan səhvlərə yol verməməyə çalışmışdır.

Bütün natiqlər belə bir yekdil rəydə olmuşlar ki, Elmir Quliyev Rusiya islamşünaslığında yeni səhifə açmış və onun tərcüməsi bu sahədə layiqli yer tutacaqdır.

Elmir Quliyev Azərbaycan Tibb Universitetinin məzunudur, lakin təbabətlə vidalaşaraq, özünü müsəlman ilahiyyatını, fəlsəfə tarixini və dini öyrənməyə başlamışdır. O, ömrünün on ilini Quranın tərcüməsinə həsr etmişdir. 2002-ci ildən Azərbaycan Milli Elmlər Akademiyası Fəlsəfə və Hüquq İnstitutunun dissertantıdır və “Qloballaşma və müqəddəs Quran” mövzusu üzərində işləyir. İlahiyyata dair altı əsərin müəllifidir, müsəlman dünyagörüşünün və hüquqşünaslığın müxtəlif aspektlərinə həsr edilmiş 40-dan çox kitab və məqalənin tərtibçisi və tərcüməçisidir.