ELM VƏ TƏHSİL
Magistrlər Balaxanıda tullantıların çeşidlənməsi prosesini canlı izləyiblər
Bakı, 17 noyabr, AZƏRTAC
Azərbaycan Memarlıq və İnşaat Universiteti (AzMİU) ölkəmizdə fəaliyyət göstərən və kifayət qədər tanınmış şirkətlərlə yaxından əməkdaşlıq edir və tələbələrin bu şirkətlərdə təcrübə keçməsinə şərait yaradır.
AzMİU-dan AZƏRTAC-a bildirilib ki, tələbələr növbəti dəfə “Təmiz Şəhər” ASC-nin nəzdindəki sənaye parkında olublar. Universitetin ekologiya kafedrasının müdiri, texnika elmləri doktoru, professor Fəqan Əliyev və ekologiya ixtisası üzrə magistr təhsili alan bir qrup tələbə burada fəaliyyət göstərən zavodların iş prinsipi ilə maraqlanıblar.
"Təmiz şəhər" ASC-nin ictimaiyyətlə əlaqələr sektorunun müdiri Elmar Məlikov magistrlərə bərk məişət tullantılarının çeşidlənməsi zavodunun fəaliyyəti barədə məlumat verib, onları müəssisənin iş prosesi ilə tanış edib. E.Məlikov Bakı şəhəri üzrə toplanan bərk məişət tullantılarının bir hissəsinin zavoda təhvil verildiyini və burada çeşidlənmə prosesinin həyata keçirildiyini onların diqqətinə çatdırıb. Magistrlər zavodda tullantıların çeşidlənməsi prosesini monitor şəbəkəsi vasitəsilə izləyiblər. Onlar mərkəzdə fəaliyyət göstərən muzeylə də tanış olublar.
Daha sonra magistrlər bərk məişət tullantılarının yandırılması zavoduna yollanıblar. Zavodun PR meneceri Rövşən Babayev onları müəssisənin iş strukturu ilə yaxından tanış edib. Bildirib ki, zavodda il ərzində təxminən 500 min ton tullantı yandırılır. Müəssisə 7 gün 24 saat işləyir, 8 saatdan bir növbə dəyişir. Zavodda sistem tam avtomatlaşdırılıb, bu səbəbdən də əl əməyindən istifadə olunmur.
Magistrlər ziyarətçi qalereyası otağından tullantıların daşınması və hissə-hissə yandırılması prosesini canlı izləyiblər. Zavodun idarəetmə otağından isə monitorlar vasitəsilə tullantıların yandırılması prosesinə baxıblar.
Gəzinti zamanı tələbələri maraqlandıran bütün suallar şirkət nümayəndələri tərəfindən cavablandırılıb.