Maliyyəçilər 10 ildə 1 milyon ağac əkəcəklər - Anlaşma Memorandumu imzalandı

Bakı, 13 mart, AZƏRTAC

Ətraf mühitin qorunması istiqamətində genişmiqyaslı işlərin görülməsi və ekoloji vəziyyətin yaxşılaşdırılmasına yönəlmiş dövlət siyasəti ölkəmizin uzunmüddətli inkişaf strategiyasının mühüm tərkib hissəsidir. Yeni meşələrin, yaşıllıq zonalarının salınması bu sahədə mühüm vəzifələr kimi icra olunmaqdadır. Ümummilli Lider Heydər Əliyevin anadan olmasının 100-cü ildönümü münasibətilə həyata keçirilən silsilə tədbirlər çərçivəsində Ekologiya və Təbii Sərvətlər Nazirliyi, Azərbaycan Respublikasının Mərkəzi Bankı (AMB), Azərbaycan Banklar Assosiasiyası (ABA), Azərbaycan Sığortaçılar Assosiasiyası (ASA), Azərbaycan Mikromaliyyə Assosiasiyası (AMA), Azərbaycan Fond Bazarı İştirakçıları Assosiasiyası (AFBİA) və Azərbaycan Fintex Assosiasiyası (AFA) arasında Anlaşma Memorandumu imzalanıb.

AMB-dan AZƏRTAC-a bildirilib ki, memorandumun məqsədi tərəflərin iştirakı ilə 2023-cü ildən başlayaraq 10 il ərzində hər il 100 min ağac olmaqla, ümumilikdə 1 milyon ağacın əkilməsi ilə əlaqədar müvafiq işlərin görülməsindən ibarətdir. Bu əməkdaşlıq sosial və ekoloji yönümlü fəaliyyətin sistemli şəkildə, institusional əsasda davam etdirilməsinə yönələn könüllü davranış mədəniyyətinin inkişafına, ətraf mühitin qorunmasına dəstək istiqamətində korporativ məsuliyyətin daha dərindən dərk edilməsinə, bütövlükdə ölkədə yüksəkkeyfiyyətli ekoloji mühitin yaradılması istiqamətində qoyulan hədəflərə nail olunmasına töhfə verəcək.