REGİONLAR


Masallı: 50 hektarda çay bitkisi əkilib, 100 hektar sahə isə əkin üçün hazır vəziyyətə gətirilib

Masallı, 13 oktyabr, Bağır Əliyev, AZƏRTAC

Masallıda bu ilin doqquz ayında sosial-iqtisadi inkişaf sahəsində görülmüş işlər və qarşıda duran vəzifələr müzakirə edilib.

AZƏRTAC xəbər verir ki, yığıncaqda rayon icra hakimiyyətinin başçısı Rafil Hüseynov hesabat məruzəsi ilə çıxış edib. Bildirib ki, 2017-ci ilin doqquz ayında sosial-iqtisadi inkişafın göstəricilərinə görə ölkəmizin bütün regionlarında olduğu kimi, Masallı rayonunda da uğurlu nəticələr qazanılıb, yeni iş yerlərinin yaradılması, tikinti-quruculuq və abadlıq işlərinin davam etdirilməsi istiqamətində ardıcıl tədbirlər həyata keçirilib.

Qeyd olunub ki, regionların sosial-iqtisadi inkişafına dair Dövlət Proqramında nəzərdə tutulmuş tədbirlərə müvafiq olaraq rayonda bir sıra yeni obyektlər tikilərək istifadəyə verilib. Prezident İlham Əliyevin müvafiq Sərəncamı ilə ayrılmış vəsait hesabına Masallı şəhərində 27 kommunal yaşayış binasının fasad və dam örtüklərində əsaslı təmir işləri başa çatdırılıb, binaların zirzəmilərinin təmiri və kanalizasiya xətlərinin yeni sistemə qoşulması işləri isə davam etdirilir. Bundan əlavə, 18 binanın dam örtüyünün və 5 binanın fasadının əsaslı təmiri başa çatdırılıb. Rayonda 100 yerlik uşaq bağçası tikilib istifadəyə verilib. Masallı “Cümə” məscidində əsaslı təmir işləri aparılır. Bundan başqa, Bilik Günü 60 şagird yerlik Kubin, 80 şagird yerlik Meşəkənarı, 60 şagird yerlik Mololon və 35 şagird yerlik Ləngan ümumi orta məktəbləri və Kolatan kənd uşaq bağçası istifadəyə verilib. Yaxın günlərdə Xallıcallı və Təkdam kəndlərində modul tipli məktəblərin tikintisinə başlanılacaq.

Məruzədə bildirilib ki, hesabat dövründə Masallı Sənaye Məhəlləsinin tikintisi davam etdirilib. Sənaye məhəlləsinin tikintisi rayonun iqtisadiyyatının sürətli inkişafına və təkmilləşməsinə təkan verəcək.

Diqqətə çatdırılıb ki, rayon üzrə məhsul istehsalı və göstərilən xidmətlərin həcmi ötən ilin müvafiq dövrü ilə müqayisədə 1,2 faiz artaraq 478,8 milyon manat təşkil edib. Hesabat dövründə sənaye məhsullarının həcmi ötən ilin müvafiq dövrü ilə müqayisədə 21,1 faiz artaraq 41,3 milyon, kənd təsərrüfatı məhsullarının həcmi 4,2 faiz artaraq 83,1 milyon, əhaliyə göstərilən pullu xidmətlərin həcmi 1,4 faiz artaraq 56,7 milyon manata çatıb.

Masallı Rayon Məşğulluq Mərkəzində qeydiyyata alınan 1044 nəfərdən 637-si işlə təmin olunub.

Aqrar sahədən danışılarkən bildirilib ki, rayonda ənənəvi əkin sahələrindən olan çəltikçiliyin, tütünçülüyün, baramaçılığın, sitrusçuluq və subtropik meyvəçiliyin inkişafı üçün geniş imkanlar mövcuddur. Artıq çəltik sahələrində biçin başa çatıb, 572 ton məhsul yığılıb, orta məhsuldarlıq 29,4 sentner təşkil edib. Bu il rayonda 32,5 hektar sahədə tütün əkini aparılıb. İndiyədək 32,9 ton tütün qurudularaq qəbul məntəqələrinə təhvil verilib. Tütünün toplanması və qurudulması davam etdirilir.

Beş hektarda çay sahəsi bərpa edilib, Kolatan kəndi ərazisində “Azərsun Holdinq” şirkəti tərəfindən 100 hektar sahə çay əkini aparılması üçün hazır vəziyyətə gətirilib və 50 hektar sahədə çay bitkisi əkilib. Qızılağac kəndində “Azərsun Holdinq” tərəfindən 150 hektar sahədə müasir texnologiyalarla tərəvəz bitkiləri əkilib, rayonda çiyələk əkini sahələri 120 hektara çatdırılıb.

Həmçinin bu il Sığdaş kəndi ərazisində 0,5 sahədə naringi, Güllütəpə kəndi ərazisində isə 3,2 hektarda yeni fındıq bağları salınıb.

Sonra rayon Təhsil Şöbəsinin müdiri Tariyel Əkbərov, 47 nömrəli Yol İstismar İdarəsinin rəisi Əlirahim Kazımov, Banbaşı kənd bələdiyyəsinin sədri Böyükxan Rəhimov və başqaları çıxış edərək, bu ilin doqquz ayında görülən işlərdən və qarşıda duran vəzifələrdən danışıb, mövcud problemlərlə bağlı təkliflərini bildiriblər.

Yığıncağın sonunda müzakirə edilən məsələ ilə bağlı müvafiq qərar qəbul olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.