SİYASƏT


Mərakeşdə Azərbaycan diplomatik xidmət orqanlarının 100 illiyi münasibətilə rəsmi qəbul təşkil edilib

Rabat, 24 iyun, AZƏRTAC

Rabatda Azərbaycanın Mərakeşdəki səfirliyi tərəfindən 28 May - Respublika Günü və Azərbaycan Respublikası diplomatik xidmət orqanlarının 100 illik yubileyi münasibətilə rəsmi qəbul təşkil edilib.

AZƏRTAC xəbər verir ki, tədbirdə Mərakeş rəsmiləri, Rabatda akkreditə olunmuş diplomatik korpusun və ISESCO da daxil olmaqla, beynəlxalq təşkilatların nümayəndələri, Mərakeş-Azərbaycan Dostluq Cəmiyyətinin üzvləri, jurnalistlər, yerli incəsənət xadimləri, iş adamları iştirak ediblər.

Rəsmi qəbul hər iki ölkənin dövlət himnlərinin səslənməsi ilə başlayıb.

Tədbirdə çıxış edən səfir Oktay Qurbanov Azərbaycan Respublikasının Xarici İşlər Nazirliyinin yaranma tarixindən və diplomatiyamızın inkişaf mərhələlərindən danışıb. Azərbaycan Prezidentinin 2007-ci il 24 avqust tarixli Sərəncamı ilə 9 iyul tarixinin Azərbaycan diplomatik xidmət orqanları əməkdaşlarının peşə bayramı günü elan edildiyini diqqətə çatdıran səfir 2019-cu ildə Azərbaycan diplomatik xidmət orqanlarının 100 illik yubileyinin qeyd edildiyini vurğulayıb.

Səfir bildirib ki, ümummilli lider Heydər Əliyevin Azərbaycana rəhbərlik etdiyi dövrdə gördüyü əvəzsiz işlər nəticəsində Azərbaycan beynəlxalq arenada böyük nüfuza malik ölkəyə çevrilib. 1994-cü il sentyabrın 20-də “Əsrin müqaviləsi”nin imzalanması Azərbaycanın müasir tarixində dönüş nöqtəsi olub.

Azərbaycan səfiri ulu Öndər Heydər Əliyev irsinə və xarici siyasət kursuna sadiq qalan Prezident İlham Əliyevin rəhbərliyi ilə Azərbaycanın bugünkü dinamik inkişafı və ölkədəki sabit demokratik və iqtisadi islahatlar barədə danışıb. Azərbaycanın son nailiyyətlərindən bəhs edərkən səfir 40 milyard dollar sərmayə tələb edən ən böyük infrastruktur layihəsi olan “Cənub Qaz Dəhlizi”, nəqliyyat sahəsində strateji əhəmiyyətə malik Bakı-Tbilisi-Qars dəmir yolu layihələri barədə qonaqlara məlumat verib.

Azərbaycan-Mərakeş əlaqələrinə toxunan Oktay Qurbanov təməli ümummilli lider Heydər Əliyev və Mərakeş Kralı II Həsən tərəfindən qoyulan ikitərəfli dostluq münasibətlərinin Azərbaycan Prezidenti İlham Əliyev və Kral VI Məhəmməd tərəfindən uğurla davam etdirildiyini qeyd edib.

Səfir Ermənistanın Azərbaycana qarşı hərbi təcavüzü ilə bağlı Mərakeşin Azərbaycanın ədalətli mövqeyinə verdiyi dəstəyə görə minnətdarlığını ifadə edərək, iki ölkə arasında siyasi münasibətlərin və qarşılıqlı anlaşmanın yüksək səviyyədə olduğunu, BMT, İslam Əməkdaşlıq Təşkilatı və digər beynəlxalq qurumlar çərçivəsində səmərəli əməkdaşlığın həyata keçirildiyini vurğulayıb. Ölkələrimiz arasında əlaqələrin daha da genişləndirilməsi üçün böyük imkanların olduğunu bildirib.

Qəbul zamanı Azərbaycan Xalq Cümhuriyyətinə həsr edilmiş foto sərgi təşkil edilib, Azərbaycan Respublikası diplomatik xidmət orqanlarının 100 illik yubileyi ilə bağlı sənədli film nümayiş olunub. Azərbaycan bəstəkarları Üzeyir Hacıbəyov, Qara Qarayev və Fikrət Əmirovun əsərlərindən parçalar səsləndirilib, qonaqlara “İrs-Heritage” jurnalının Azərbaycan diplomatiyasının 100 illik yubileyinə həsr olunmuş xüsusi buraxılışı təqdim edilib.

Tədbir Azərbaycan milli mətbəxinin dolma, ləvəngi, düşbərə və plov kimi ləziz nümunələrindən ibarət ziyafətlə başa çatıb.

Nigar Cəfərli

AZƏRTAC-ın xüsusi müxbiri

Rabat

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.