Göyçay, 10 dekabr, Şahnəzər Bəşirov, AZƏRTAC

Ötən əsrin 90-cı illərinin əvvəllərində Ermənistanın Azərbaycana qarşı hərbi təcavüzü başlayanda, qəhrəman oğullarımız silaha sarılaraq Vətənin müdafiəsinə qalxdı. Ölkəmizin ərazi bütövlüyü və suverenliyi uğrunda xalqımızın qeyrətli, mübariz oğulları “Təki vətən sağ olsun” deyib canlarını fəda etdilər. Torpaqlarımızın bütövlüyü uğrunda şəhid olan vətənpərvər oğullarımızdan biri də Milli Qəhrəman Rizvan Rəhman oğlu Teymurovdur.

AZƏRTAC xəbər verir ki, şəhidliyi ilə ölümsüzlüyə qovuşan Milli Qəhrəman Rizvan Teymurov 1967-ci ildə Şuşanın Quşçular kəndində ziyalı ailəsində anadan olub. 1984-cü ildə doğma kəndində orta məktəbi bitirdikdən sonra 1985-ci ildə ordu sıralarına çağrılır, əsgəri xidmətini Rusiyanın Omsk şəhərində başa vurduqdan sonra 1987-ci ildə Vətənə dönür. 1990-cı ildə Şuşa rayon Daxili İşlər Şöbəsinin nəzdində Xüsusi Təyinatlı Polis Dəstəsi yaradılanda o, tərəddüd etmədən bu dəstəyə daxil olur. Qorxu bilməz, cəsur döyüşçülərdən ibarət olan bu dəstə Qaradağlı, Sırxavənd, Umudlu, Meşəli, Cəmilli kəndlərində, habelə Xankəndində erməni yaraqlılarının zərərsizləşdirilməsində və tərki-silah edilməsində qəhrəmanlıq göstərib. Əməliyyatların birində ağır yaralanması onu odlu-alovlu cəbhədən uzaqlaşdıra bilməmişdi.

Milli Qəhrəmanın yaxın qohumu Zabil Babayevin sözlərinə görə, 1991-ci ilin məhz bu günü, dekabrın 10-da Rizvan Teymurov öz silahdaşları ilə birgə Xankəndi yaxınlığında azğın erməni təxribatının qarşısını alıblar. Elə bu vaxt xain ermənilər Rizvanı və silahdaşlarını gözlənilmədən atəşə tutublar. Dekabrın 10-da Xankəndi-Kərkicahan ətrafında gedən qanlı döyüşdə qəhrəmancasına şəhid olan Rizvan Şuşa rayon Quşçular kənd qəbiristanlığında dəfn olunub. Göstərdiyi qəhrəmanlıq və rəşadətə görə, Azərbaycan Respublikası Prezidentinin 1992-ci il 8 oktyabr tarixli Fərmanı ilə Rizvan Teymurova ölümündən sonra Azərbaycanın Milli Qəhrəmanı adı verilib.

Zabil Babayev deyib: “Qarabağ uğrunda gedən döyüşlər zamanı Ağa körpüsü adlanan yerdə minaya düşən Rizvan bədəninin müxtəlif nahiyələrindən, eləcə də başından ağır xəsarətlər almışdı. O, bir müddət müalicə olunduqdan sonra yenidən döyüşə getdi. Rizvan və hərbçi yoldaşları döyüş postuna yaxınlaşanda həmin ərazinin ermənilər tərəfindən bir qədər əvvəl işğal olunmasından xəbərsiz idi. Onlar mühasirəyə düşərək ermənilərlə ölüm-dirim savaşına başladılar. Hərbçi yoldaşının sözlərinə görə, döyüş zamanı Rizvan təkbaşına 15-ə yaxın erməni əsgərini öldürərək qəhrəmancasına şəhid olub”.

Rizvan Teymurovun bacısı Zəminə Babayeva bildirib ki, ermənilər 1992-ci il fevralın 11-də Rizvanın doğma kəndini də işğal edib. Rizvanın atası, anası, bacısı və yaxın qohumları yurd-yuvalarından didərgin düşərək Göyçay rayonu Qaraməryəm kəndində məskunlaşıblar. Şəhidin hər iki valideyni artıq dünyalarını dəyişib. Milli Qəhrəman Rizvan Teymurovun bacısı və digər qohumları hər il dekabrın 10-da bir yerə toplaşaraq onun vəfatının ildönümünü qeyd edirlər.

Zəminə Babayeva deyib: “25 il keçməsinə baxmayaraq elə bilirəm ki, qardaşım Rizvan indi şəhid olub. Onu hər an xatırlayırıq. Rizvan qorxmaz və mərd oğlan idi, onun ölümü bizim nəsli, ailə üzvlərimi çox sarsıtdı. Fəxr edirəm ki, belə cəsur qardaşım olub”.

İndi ailənin ən böyük arzusu torpaqlarımızın işğaldan azad olunması, Rizvanın qəbrini ziyarət etmək və Quşçular kənd məktəbinə onun adının verilməsidir.