MƏDƏNİYYƏT
Moskvada Afaq Şıxlının yaradıcılığına həsr olunmuş poeziya axşamı keçirilib
Moskva, 7 dekabr, AZƏRTAC
Rusiyada Azərbaycan diasporunun Moskva ofisində akademik Fazil Qurbanovun təşkilatçılığı ilə Afaq Şıxlının yaradıcılığına həsr olunmuş poeziya axşamı keçirilib. Həmin gün həmkarları şairəni 50 illik yubileyi münasibətilə də təbrik ediblər.
AZƏRTAC xəbər verir ki, tədbirdə ölkəmizin Rusiyadakı səfirliyinin əməkdaşları, Azərbaycan diasporunun nümayəndələri, şairlər, yazıçılar, jurnalistlər və Afaq Şıxlının dostları iştirak ediblər.
Ənənəyə görə, poeziya axşamının aparıcısı Moskva Dövlət Beynəlxalq Münasibətlər İnstitutunun professoru Abuzər Bağırov olub. O, bu tədbirin təşkilinə şərait yaratdığına, həmçinin Azərbaycan Yazıçılar İttifaqının Moskva bölməsinə göstərilən dəstəyə və sıx əməkdaşlığa görə akademik Fazil Qurbanova təşəkkürünü bildirib.
A.Bağırov şairənin həyat və yaradıcılığından bəhs edib. O qeyd edib: “Afaq çox gözəl insan, istedadlı şairə, həkim, ana və nənədir. Onun əsərlərində sevgi və bədiilik ön plana çıxır. Afaqın poeziya aləmi çoxtərəfli və sevgi ilə doludur. Onun şeirlərinin gözəlliyi forma dəqiqliyində deyil, daha çox əsl səmimilyindədir”.
Moskva Dövlət Beynəlxalq Münasibətlər İnstitutunun professoru Azərbaycan Yazıçılar İttifaqının sədri Anarın təbrik məktubunun mətnini də oxuyub. Məktubda Afaq Şıxlının Azərbaycan və ümumilikdə türk poeziyasına böyük töhfə verdiyi qeyd olunur.
Tədbirdə çıxış edən professor Kamran Rüstəmov qeyd edib ki, şairə öz şeirlərində yaratdığı obrazlara tamamilə uyğundur. O əlavə edib: “Afaq xanım öz yaradıcılığı ilə təkcə doğma Azərbaycan dilində deyil, həm də bizim üçün yaxın olan rus dilində yazmağa marağı artırır”.
Azərbaycanın Rusiyadakı səfirliyinin mədəniyyət attaşesi Nigar Axundova da Afaq Şıxlını yubileyi münasibətilə təbrik edərək qeyd edib ki, şairənin yaradıcılığında tarixi Vətənə sevgi hissləri xüsusi yer tutur, habelə təkcə şairləri deyil, bütün insanları həyəcanlandıran mövzulara toxunulur.
Bütün qonaqlara xoş sözlərə, dəstəyə və onun yaradıcılığına göstərilən diqqətə görə təşəkkürünü bildirən Afaq Şıxlı gördüyü işlər, yaradıcılıq prosesində əldə etdiyi uğurlardan bəhs edib. Şairə vurğulayıb ki, onun ilham pərisi ailəsinin dəstəyidir.
Poetik söz bayramı iki saatdan artıq davam edib. Milli saz alətində ifa edilən musiqi isə poeziya axşamına xüsusi rəng qatıb.
Tədbirdə şairənin dostları və həmkarları onun rus və Azərbaycan dillərində yazdığı dostluq, məhəbbət, sədaqət mövzusunda şeirlərini söyləyiblər.
Fəridə Abdullayeva
AZƏRTAC-ın xüsusi müxbiri
Moskva