REGİONLAR


“Naxçıvan təbiəti” albom-kataloqu çapdan çıxıb

Naxçıvan, 19 avqust, AZƏRTAC

Muxtar respublikada “Naxçıvan təbiəti” albom-kataloqu işıq üzü görüb.

AZƏRTAC xəbər verir ki, “Əcəmi” Nəşriyyat-Poliqrafiya Birliyində çapdan çıxan albom-kataloqda muxtar respublikanın zəngin təbiətini, flora və faunasını əks etdirən bir-birindən maraqlı fotoşəkillər oxuculara təqdim olunur.

Fotoşəkillərdə əks olunan ərazilər barədə Azərbaycan, rus və ingilis dillərində məlumat verilir. Yeni nəşrin giriş hissəsində Naxçıvan Muxtar Respublikasının ərazisi, coğrafi mövqeyi, qədim tarixi və müasir inkişafı barədə üç dildə məlumat yer alır. Qeyd olunur ki, muxtar respublika ərazisində olan 1200-dən çox qədim tarixi abidə xalqımızın zəngin mədəni irsindən xəbər verir. Beş min illik şəhər mədəniyyətinə malik Naxçıvan 2018-ci ildə İslam mədəniyyətinin paytaxtı seçilib. Qədim tarixi, müasir inkişafı, zəngin mədəniyyəti və təhlükəsiz həyat şəraiti Naxçıvanda turizmin inkişafına səbəb olub.

Albom-kataloqda qədim diyarın coğrafi mövqeyi barədə oxucuları maraqlandıran faktlar diqqətə çatdırılaraq bildirilib ki, Naxçıvan Muxtar Respublikası Cənubi Qafqaz yaylasının cənub-şərqində yerləşir. Dəniz səviyyəsindən orta yüksəkliyi 1450 metrdir. Mövcud 11 iqlim tipinin 9-na muxtar respublika ərazisində təsadüf olunur. Muxtar respublika ərazisinin çox hissəsini Kiçik Qafqazın Zəngəzur və Dərələyəz dağ silsilələri əhatə edir. Ən hündür zirvəsi Qapıcıq dağıdır (3904 metr). Ərazinin üçdəbir hissəsini Arazboyu düzənliklər təşkil edir. 200-dən çox mineral su bulağı, 400-dək böyük və kiçik çayı var. Naxçıvan Muxtar Respublikasında Azərbaycanın nadir fauna və florası yerləşir. Ərazidə olan flora və faunanın nadir növləri Naxçıvan Muxtar Respublikasının “Qırmızı Kitabı”na daxil edilib və xüsusi mühafizəyə alınıb. Akademik Həsən Əliyev adına Zəngəzur Milli Parkı, Şahbuz Dövlət Təbiət Qoruğu, Arazboyu, Ordubad və Arpaçay Dövlət Təbiət yasaqlıqları hesabına xüsusi mühafizə olunan təbiət əraziləri muxtar respublika ərazisinin 28 faizini təşkil edir.

Naxçıvan təbiəti” albom-kataloqunun elektron variantı ilə də tanış olmaq mümkündür.

AZƏRTAC-ın Naxçıvan Muxtar Respublikasındakı bürosu

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.