ELM VƏ TƏHSİL


Nəsiminin yaradıcılığı Azərbaycan poeziyasının və ədəbi dilinin inkişafında mühüm mərhələdir

Bakı, 21 oktyabr, AZƏRTAC

Zaqatala Rayon İcra Hakimiyyəti, AMEA-nın Şəki Regional Elmi Mərkəzi (ŞREM) və Azərbaycan Dövlət Pedaqoji Universitetinin Şəki filialının birgə təşkilatçılığı ilə dahi Azərbaycan şairi İmadəddin Nəsiminin 650 illik yubileyinə həsr edilən elmi-praktik konfrans keçirilib.

Konfrans iştirakçıları əvvəlcə Ulu Öndərin Zaqatala şəhər Heydər Əliyev Mərkəzinin önündə ucaldılmış abidəsi qarşısına gül dəstələri qoyub, xatirəsini ehtiramla yad ediblər.

AMEA-dan AZƏRTAC-a bildirilib ki, Heydər Əliyev Mərkəzində keçirilən tədbirdə ŞREM-in direktoru, fizika-riyaziyyat üzrə fəlsəfə doktoru, dosent Yusif Şükürlü çıxış edərək Prezident İlham Əliyevin Sərəncamı ilə 2019-cu ilin “Nəsimi ili” elan edilməsini böyük mütəfəkkirin yaradıcılığına verilən yüksək dəyər və ehtiramın göstəricisi olduğunu bildirib. Diqqətə çatdırılıb ki, şairin yubileyi münasibətilə elmi mərkəz tərəfindən silsilə tədbirlər keçirilir.

Dahi mütəfəkkirin zəngin ədəbi irsi, Azərbaycan ədəbiyyatında mövqeyi barədə məlumat verən direktor bildirib ki, lirik şair olan Nəsimi mürəkkəb yaradıcılıq yolu keçib. O, həyat və cəmiyyət haqqında açıq tənqidi fikirlərini aşiqanə və ya təbiət təsvirləri içərisində söyləyib. Nəsiminin yaradıcılığı Azərbaycan poeziyasının və ədəbi dilinin inkişafında mühüm mərhələdir.

Elmi-praktik konfrans plenar məruzələrlə davam etdirilib.

Konfransda Azərbaycan Yazıçılar Birliyinin Şəki bölməsinin rəhbəri Vaqif Aslanın “Nəsimi yaradıcılığında sufi rəmzləri”, tarix üzrə fəlsəfə doktoru Vüsal Baxışovun “Nəsimi dövrünün tarixi-siyasi aspektdən özəllikləri”, filologiya üzrə fəlsəfə doktorları - Kamil Adışirinovun “Nəsimi Azərbaycan elmində və bədii ədəbiyyatda” və Həşim İsmayılovun “Nəsimi obrazı musiqi, incəsənət və bədii ədəbiyyatda”, ŞREM-in doktorantı Pakizə Zakirovanın “Orta əsrlər hürufizm” mövzularında məruzələri dinlənilib, müzakirələr aparılıb.

Sonda ŞREM-in rəhbərliyi tərəfindən Zaqatala şəhər Heydər Əliyev Mərkəzinə kitablar hədiyyə olunub.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.