MƏDƏNİYYƏT
Nizami Kino Mərkəzində yeni filmlərin nümayişinə başlanılıb
Bakı, 21 aprel, AZƏRTAC
Aprelin 21-də Nizami Kino Mərkəzində Azərbaycan istehsalı olan “Pərdə”, Rusiyanın 3D formatında çəkilmiş “Ekipaj”, Türkiyənin “Kolpaçino 3. Devre”, Böyük Britaniya və ABŞ-ın “Cinayətkar” bədii filmlərinin nümayişinə başlanılıb.
“Ekipaj” filminin ssenari müəllifi Tixon Kornev, rejissoru Nikolay Lebedevdir. Film dram, triller və macəra janrında çəkilib. Film gənc və bacarıqlı təyyarəçi Aleksey Quşinin həyatından bəhs edir. Aleksey avtoritet tanımır, həmişə öz şərəf kodeksinə uyğun qərarlar alır. Absurd bir tapşırığı yerinə yetirmək istəmədiyinə görə o, hərbi aviasiyadan kənarlaşdırılır.
Filmdə baş rollara Danila Kozlovskiy, Vladimir Maşkov, Aqne Qrudite, Katerina Şpitsa, Serqey Qazarov, Elena Yakovleva, Serqey Şakurov, Vera İvanova, Tatyana Novik, Yan Qe və başqaları çəkilib.
“Art Film Baku” kinoşirkətinin çəkdiyi “Pərdə” filmi dram janrındadır. Filmin ssenari müəllifi və rejissoru Emil Quliyevdir.
Ata məsləhəti, el adət-ənənəsi ilə evlənərək sonradan bədbəxt olan Zaur, hazırda seçim qarşısındadır. O, öz bacısı Lalənin sevdiyi oğlan Eminlə xoşbəxt olmasını istəyir. Bunun üçün Zaur, bacısının qaçırılmasına icazə verməlidir. Cəmiyyətin, dostların, qonşuların bu işə münasibəti necə olacaq kimi fikirlər Zauru çıxılmaz vəziyyətdə qoyur. Onun seçimindən bir ailənin taleyi asılıdır...
Filmdə aktyorlardan Tural Əhməd, Vüsal Mehrəliyev, Azər Aydəmir, Zaur Şəfiyev, Könül Cəfərzadə və başqaları rol alıblar.
“Cinayətkar” filmini rejissor Ariel Vromen Duqlas Kukun ssenarisi əsasında fantastika, döyüş, detektiv, kriminal və dram janrında ekranlaşdırıb. Film Azərbaycan dilində subtitrlərlə nümayiş edilir.
Dünya miqyaslı fəlakətin qarşısını almaq üçün genetiklər çox çətin və inanılmaz əməliyyata əl atırlar. Onlar ölmüş kəşfiyyatçısının beynini və bacarığını təhlükəli caninin beyninə yerləşdirərək onun agentin başa vurmadığı missiyanı yekunlaşdırmasına ümid edirlər.
Baş rollara Kevin Kostner, Qari Oldman, Tommi Li Cons, Rayan Reynolds, Elis İv, Qal Hadot, Xordi Molya, Maykl Pitt, Amori Nolasko,Antye Traue və başqaları çəkilib.
“AF Media” şirkətinin təqdim etdiyi “Kolpaçino 3. Devre” komediyasının rejissoru və ssenari müəllifin Şafak Sezerdir.
Ozgür əri Sabrinin xəyanətindən sonra ondan ayrılır və yaşadığı villanı kino çəkilişlərində istifadə üçün kirayə verərək dolanır. Bir dartışmada Ozgürün telefonu bir mafiya üzvünün telefonu ilə qarışır. Ev kirayəsinin pulunu gözləyən Ozgürə içində iyirmi ədəd bir milyon dollarlıq zərf gəlir. Ozgür pulların üzərinə planlar qurarkən mafiya başçısı ona və dostlarına bunu bağışlamayaçağını çatdırır.
Filmdəki obrazları aktyorlar Şafak Sezer, Erkan Petekkaya, Aydemir Akbaş, Ebubekir Öztürk, Volkan Başaran, Serkan Şengül, Ali Çatalbaş, Burak Öncü və başqaları canlandırıb.
Filmlər haqqında daha ətraflı məlumatı Nizami Kino Mərkəzinin “facebook” səhifəsindən öyrənmək mümkündür.