Bakı, 1 iyun, AZƏRTAC

Nizami Rayon İcra Hakimiyyəti və “Qayğı-Sağlam Nəsil Naminə” İctimai Birliyinin birgə təşkilatçılığı ilə “Heydər Əliyev İli” çərçivəsində 1İyun - Uşaqların Beynəlxalq Müdafiəsi Günü münasibətilə Daun Sindromlu Şəxslərin Reabilitasiya Mərkəzində “Uşaqlar bizim gələcəyimizdir” adlı uşaq yaradıcılıq festivalı keçirilib.

Rayon icra hakimiyyətindən AZƏRTAC-a bildirilib ki, tədbirdə əvvəlcə Azərbaycan Respublikasının Dövlət Himni səsləndirilib.

Tədbirdə çıxış edənlər bildirib ki, əsası Ulu Öndər Heydər Əliyev tərəfindən qoyulan dövlət uşaq siyasətinin əsas tərkib hissəsini təşkil edən istedadlı uşaqların üzə çıxarılması, onların istedadlarının, bilik və bacarıqlarının daha da inkişaf etdirilməsi üçün xüsusi şəraitin yaradılması və həmin uşaqların həvəsləndirilməsi, onlara dövlət qayğısının daim artırılması istiqamətində respublikada böyük işlər həyata keçirilib, yeni yaradıcılıq mərkəzləri yaradılıb, mövcud olan tərbiyə müəssisələri əsaslı təmir olunub, həmçinin bununla bağlı bir sıra dövlət proqramları qəbul edilib, uşaqların arzu və istəklərinə uyğun olaraq dərnəklər açılıb. Eyni zamanda, qeyd edilib ki, Prezident İlham Əliyevin rəhbərliyi və birinci xanım Mehriban Əliyevanın böyük qayğısı və diqqəti sayəsində xüsusi istedadı olan uşaqların bacarıqlarının inkişaf etdirilməsi istiqamətində əməli işlər görülür, yeni layihələr həyata keçirilir.

Xüsusi olaraq vurğulanıb ki, yaradıcılıq festivalının əsas məqsədi istedadlı uşaqların inkişafının təmin edilməsi, bu sahədə onların bilik və bacarıqlarının genişləndirilməsi, yaradıcılığın bütün sahələri və müasir istiqamətləri üzrə istedadlı uşaq və gənclərin üzə çıxarılması, onların bədii-estetik səviyyəsinin yüksəldilməsindən ibarətdir.

Festivalda “Qayğı-Sağlam Nəsil Naminə” İctimai Birliyi təlim-tərbiyə müəssisələrinin və 3 nömrəli Uşaq-Gənclər İnkişaf Mərkəzinin dərnək üzvlərinin müxtəlif nominasiyalar üzrə rəsm, toxuma və tətbiqi sənət işləri nümayiş olunub, həmçinin xüsusi yaradıcılıq qabiliyyətləri olan uşaqlar musiqi, şeir, folklor və mahnı nümunələri ifa ediblər.