REGİONLAR
Ötən il Füzuli rayonunda ümumi məhsul buraxılışının həcmi 151 milyon manatdan çox olub
Füzuli, 4 fevral, Tahir Ağaməmmədov, AZƏRTAC
2016-cı ildə Füzuli rayonunda ümumi məhsul buraxılışının həcmi 151,8 milyon manat olub. Rayonun iqtisadi və sosial sahələrinin inkişafına bütün maliyyə mənbələri hesabına 52,7 milyon manat vəsait qoyulub ki, onun da 49,8 milyon manatı və ya 89,7 faizi tikinti-quraşdırma işlərinə yönəldilib.
AZƏRTAC xəbər verir ki, bu faktlar 2016-cı ilin yekunları ilə bağlı Füzuli rayonunda keçirilən yığıncaqda səsləndirilib.
Yığıncaq iştirakçıları əvvəlcə ümummilli lider Heydər Əliyevin Horadiz şəhərindəki abidəsi önünə gül-çiçək düzüb, rayonda istehsal edilən məhsulların sərgisinə baxıblar.
Rayon icra hakimiyyətinin başçısı Alı Alıyevin məruzəsində bildirilib ki, hesabat dövründə rayonda iqtisadiyyatın əsas sahələri üzrə uğurlu nəticələr qazanılıb, “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”nda nəzərdə tutulmuş tədbirlər, tikinti-quruculuq işləri davam etdirilib.
Diqqətə çatdırılıb ki, 2016-cı il füzulililər üçün Prezident İlham Əliyevin noyabrın 12-də Füzuli rayonuna səfəri və aprel ayında Azərbaycan Ordusunun Lələtəpə yüksəkliyini işğaldan azat etməsi ilə yaddaqalan və əlamətdar olub. Dövlətimizin başçısı səfər zamanı Horadiz şəhərində xalça kombinatının, avtovağzal kompleksinin, Dövlət Rəsm Qalereyasının, 1-ci və 11-ci Qayıdış qəsəbələrini birləşdirən avtomobil yolunun açılışında iştirak edib, məcburi köçkünlər üçün salınan yeni qəsəbədə görülən işlərlə və ön xətdə yerləşən komanda idarəetmə məntəqəsində əməliyyat şəraiti ilə tanış olub. Səfərdən sonra Horadiz şəhərində çoxmənzilli binaların əsaslı təmiri ilə bağlı tədbirlər haqqında Sərəncam imzalanıb.
Hesabat dövründə Horadiz şəhərində işğal zamanı yandırılmış və dağıdılmış Qurban Namazəliyev küçəsi yenidən qurulub, rayon statistika və kənd təsərrüfatı idarələri üçün inzibati binalar, Əhmədbəyli kəndində 30 çarpayılıq xəstəxana tikilərək istifadəyə verilib. Hazırda 3-cü Zobucuq qəsəbəsində kənd təsərrüfatı məhsullarının satışı üçün bazarın, Horadiz-Arayatılı avtomobil yolunun kənarında istixana kompleksinin tikintisi davam etdirilir.
Yığıncaqda aqrar sahədə əldə olunan uğurlardan danışılarkən bildirilib ki, son illər rayonda strateji məhsul olan taxılçılığın intensiv inkişafına xüsusi diqqət yetirilir. Artıq altıncı ildir ki, Füzuli rayonu respublikanın 100 min tondan çox taxıl istehsal edən rayonları sırasındadır. Füzuli taxılçıları ötən il 35 min 818 hektar sahədən 121,1 min ton taxıl əldə ediblər. Keçən il rayonda hər biri 1000 hektar olan 4 iri taxılçılıq təsərrüfatı yaradılıb, aqroparkın yaradılması istiqamətində isə iş aparılır.
2016-cı ildə rayonda ənənəvi təsərrüfat sahələri olan pambıqçılığın və baramaçılığın inkişaf etdirilməsi istiqamətində də mühüm addımlar atılıb. 520 tona yaxın pambıq, 3 tondan artıq barama istehsal olunub. Əkin sahələrinin suvarma suyu ilə təminatının yaxşılaşdırılması məqsədilə rayon ərazisində 12 subartezian quyusu qazılıb.
Yığıncaqda rayonun təhsil, səhiyyə, mədəniyyət, əhalinin elektrik enerjisi, təbii qazla təminatı məsələləri də ətraflı müzakirə edilib, sahibkarlığın və aqrar sahənin inkişafından danışılıb.
Məruzə və çıxışlarda uğurlarla yanaşı, problemlər də sadalanıb, onların həlli üçün təkliflər irəli sürülüb. Qeyd edilib ki, rayon mərkəzi xəstəxanası üçün binanın tikilməsi, Horadiz şəhərində çoxmənzilli binaların fasadlarının təmir olunması, rayonda aqroparkın yaradılması 2017-ci ildə qarşıda duran əsas vəzifələrdir.
Prezident Administrasiyasının məsul əməkdaşı Əflatun Rufiyev çıxış edərək, 2016-cı ildə respublikada sosial-iqtisadi sahədə görülən işlərdən, qarşıda duran vəzifələrdən danışıb.