CƏMİYYƏT
Övladlığagötürmənin yeni qaydalarında həm valideynin, həm də uşağın istəklərinə cavab vermək məqsədi əsas götürülüb
Bakı, 28 fevral, AZƏRTAC
Övladlığa götürülən uşağa uyğun valideyn və valideyn-namizədin ögey ata (ögey ana), habelə yaxın qohumlar (bacı-qardaş, nənə-baba, valideynlərinin bacıları, qardaşları, onların övladları) istisna olmaqla, övladlığa götürmək istəyən nikahda olan şəxslərdən biri (ər-arvad) üçün aşağı yaş həddi 25, nikahda olmayanlar üçün 30 yaşdır və yaxın qohumlar istisna olmaqla övladlığa götürmək istəyən nikahda olmayan şəxslə övladlığa götürülən uşağın yaş fərqi 18-dən az olmamalıdır. Eyni zamanda, nikahda olan şəxslər üçün azı 3 il və yaşı 35-dən yuxarı olan ər-arvad üçün 1 il müddətində nikahda olan ölkə vətəndaşlarına və azı 5 il müddətində nikahda olan əcnəbilər və vətəndaşlığı olmayan şəxslərə, habelə yuxarı yaş həddi 55-dək olan şəxslərə üstünlük verilir.
AZƏRTAC xəbər verir ki, DOST Agentliyinin departament direktoru Cavid Şahmaliyev övladlığa götürmədə tətbiq edilən yeni qaydaları şərh edərək deyib: “Övladlığa uşaq götürmək istəyənlər e-sosial.az portalına ərizə əsasında müraciət edirlər. Müraciətdə ilkin olaraq sistem vasitəsilə verilən sualları cavablandıraraq qeydiyyata düşürlər. Sonra valideyn-namizədlərin uçot məlumatları dəqiqləşdirilir və uçot məlumatları təsdiq edilən valideyn-namizəd (uçota alındıqdan sonra 10 iş günü müddətində sosial işçi valideyn-namizədlə onun yaşayış yerində müsahibə keçirir və 3 iş günü müddətində müsahibənin nəticələri barədə qərar qəbul edilir. Müsahibədən keçmiş valideyn-namizəd 10 iş günü müddətində təşkil edilən və müddəti 30 gündən çox olmayan təlimlərə cəlb edilir.
İlkin mərhələləri uğurla keçmiş valideyn-namizədə uşaqların psixoloji özəllikləri və birgə yaşayış zamanı qarşılaşa biləcəkləri problemlər haqqında məlumat verilir. Departament direktoru deyib: “Növbəti mərhələ uyğunlaşmadan ibarətdir. Təlimin nəticələri müsbət qiymətləndirildikdə valideyn-namizəd və valideyn himayəsindən məhrum olmuş uşağın istək və mənafeyi nəzərə alınmaqla, altsistem övladlığa götürülən uşağa uyğun valideyn və valideyn-namizədə uyğun uşaq seçir və uşağın yerləşdiyi müəssisədə sosial işçinin iştirakı ilə onların görüşünü təşkil edir. Valideyn himayəsindən məhrum olmuş uşağa uyğun valideyn-namizədin uşaqla tanışlıq və ailə bağlarının qurulması məqsədilə uşağın yerləşdirildiyi müəssisədə 2 ay müddətində ayda ən azı 40 saat olmaqla görüşü təşkil edilir. Müəssisədə görüş mərhələsini uğurla keçən valideyn-namizəd növbəti mərhələyə adlayır. Növbəti mərhələdə valideyn himayəsindən məhrum olan uşaq valideyn-namizədin ailəsində 3 ay sınaq müddətində müvəqqəti olaraq yerləşdirilir. Bütün mərhələləri uğurla keçən valideyn-namizəd haqqında övladlığagötürmənin uşağın mənafeyinə uyğunluğu haqqında rəy bununla əlaqədar məhkəməyə müraciət edən şəxsin ərizəsinə əlavə olunur. Məhkəmə tərəfindən övladlığagötürmə haqqında müsbət qərar çıxdıqda və uşağın övladlığa götürülməsi qərara alındıqda övladlığagötürmə ilə bağlı məhkəmənin qərarı qanuni qüvvəyə mindikdən sonra uşaq 18 yaşına çatanadək övladlığagötürmənin ilk ilində hər rüb, növbəti illərdə isə ildə bir dəfə övladlığa götürülən uşağın ailədəki vəziyyəti, əqli, fiziki, psixoloji inkişaf səviyyəsinin öyrənilməsi məqsədilə Əmək və Əhalinin Sosial Müdafiəsi Nazirliyi tərəfindən monitorinqlər aparılır”.