ELM VƏ TƏHSİL
Özbək rektor Əlişir Nəvainin Əlyazmalar İnstitutunda qorunan ən qədim nüsxələri ilə tanış olub
Bakı, 30 iyun, AZƏRTAC
Azərbaycan Milli Elmlər Akademiyasının (AMEA) Məhəmməd Füzuli adına Əlyazmalar İnstitutunda Əlişir Nəvai adına Daşkənd Dövlət Özbək Dili və Ədəbiyyatı Universitetinin rektoru, professor Şöhrət Siracəddinov ilə görüş keçirilib. Bu barədə AZƏRTAC-a Əlyazmalar İnstitutundan məlumat verilib.
Görüşdə Əlyazmalar İnstitutunun direktor müavinləri, filologiya üzrə elmlər doktorları Aybəniz Əliyeva-Kəngərli və Paşa Kərimov təmsil etdikləri elm müəssisəsinin yaranma tarixi, burada qorunan əlyazmalar, onların bərpası və elektronlaşdırılması, aparılan elmi-tədqiqat işləri barədə məlumat veriblər.
Söhbət zamanı Əlyazmalar İnstitutunda Azərbaycan-Özbəkistan ədəbi əlaqələri mövzusunda aparılan tədqiqat işlərindən də bəhs olunub.
Ş.Siracəddinov təmsil etdiyi universitetin fəaliyyətindən, ixtisas istiqamətlərindən danışıb, bu ali təhsil ocağının ölkə əhəmiyyətli bir ideoloji mərkəz və Özbəkistanda mövcud əlyazma abidələrinin toplandığı vahid məkan olduğunu diqqətə çatdırıb. O deyib: “Ötən il universitetimiz ilə M.Füzuli adına Əlyazmalar İnstitutu arasında imzalanmış memorandum çərçivəsində iki elm-tədqiqat müəssisəsi birgə layihə icra edə bilər. Əlyazmalar İnstitutunda qorunan Əlişir Nəvainin “Divan”ının Bakı nüsxəsinin fotofaksimelesinin çap olunması xalqlarımızın mədəniyyətinin təbliği baxımından əhəmiyyətlidir”.
Sonra Əlyazmalar İnstitutunun ekspozisiya zalı ilə tanış olan qonağa burada mühafizə edilən nadir əlyazmalar haqqında məlumat verilib. O, Əlişir Nəvainin institutda qorunan əsərlərinin siyahısı və ən qədim nüsxələri ilə tanış olub.