CƏMİYYƏT
Polis Akademiyasının təmsilçiləri respublika və beynəlxalq səviyyəli bilik və idman yarışlarında uğurlara imza atırlar
Bakı, 14 noyabr, AZƏRTAC
Daxili İşlər Nazirliyinin (DİN) Polis Akademiyasında kursantlara peşə vərdişlərinin aşılanması, onlarda dövlətə, dövlətçiliyə, anda, xidməti vəzifə borcuna sədaqət hisslərinin formalaşdırılması, nizam-intizama və qanunçuluğa ciddi əməl edilməsi ilə bağlı tədbir keçirilib.
DİN-in mətbuat xidmətindən AZƏRTAC-a bildiriblər ki, nazirliyin Veteranlar Şurasının sədri, istefada olan polis polkovniki Fərhad Süleymanov çıxışında Azərbaycanda həyata keçirilən gənclər siyasətinin, gənclərə göstərilən diqqət və qayğının əsasında ölkəyə layiqli vətəndaş və sağlam nəslin yetişdirilməsinin dayandığını qeyd edib.
Qeyd olunub ki, müstəqilliyinin üçüncü onilliyinə qədəm qoymuş Azərbaycana məhz milli şüura malik, vətənpərvər gənclər lazımdır. Ümummilli lider Heydər Əliyevin əsasını qoyduğu müstəqil Azərbaycanın gənclər siyasəti məhz bu amala xidmət edir.
Ulu Öndərin qayğısı ilə inkişaf yoluna çıxan bu təhsil ocağı da ölkə və DİN rəhbərliyinin xüsusi diqqəti və tələbkarlığı sayəsində tərəqqi və təkmilləşmə dövrünü yaşayır. Akademiyada aparılan geniş abadlıq və quruculuq işləri, həmçinin yeni tədris korpusunun, əlavə dərs və məşğələ otaqlarının inşası, bu istiqamətdə bütün imkanların səfərbər edilməsi sevindirici haldır. Məhz yaradılan şəraitin nəticəsidir ki, Akademiyanın təmsilçiləri respublika və beynəlxalq səviyyəli bilik və idman yarışlarında uğurlara imza atırlar.
Bakı Şəhər Baş Polis İdarəsinin Veteranlar Şurasının sədri, təqaüddə olan polis polkovnik-leytenantı Emin Məmmədov qeyd edib ki, bu gün ölkəmizdə sabitliyin, əmin-amanlığın bərqərar olunmasında, cinayətkarlıqla mübarizədə digər hüquq mühafizə orqanları ilə yanaşı, Azərbaycan polisinin də üzərinə çox böyük və məsuliyyətli iş düşür. Hələ müstəqilliyimizin ilk illərində erməni təcavüzünə qarşı döyüşənlərin, Vətənin səsinə səs verənlərin içində yüzlərlə polisimizin şəhidlik zirvəsinə ucaldığını, əlil və şikəst olduğunu xatırladan Emin Məmmədov bu gün də polisin daha məsuliyyətlə, inamla dövlətə, xalqa xidmətindən danışıb.
Daha sonra çıxış edən Polis Akademiyası rəisinin böyük köməkçisi, polis polkovnik-leytenantı Osman Vəliyev diqqətə çatdırıb ki, gənclərlə iş sahəsində görülən tədbirlər Azərbaycan gəncliyinin daha da inkişaf etməsinə təkan verir, onların cəmiyyətdə özlərini təsdiqləmələri üçün şərait yaradır. Məhz bu diqqət və qayğının nəticəsi olaraq cari il Akademiyaya qəbul olunanlardan 100 nəfərin 600, 24 nəfərin isə 650-dən yüksək bal topladığını bildirən O.Vəliyev onların gələcək illərdə də təhsildə və təlimdə daha yüksək nəticələr göstərəcəklərinə inamını ifadə etdi.
Tədbirdə Akademiyanın müəllim-komandir heyəti və bu il qəbul olunmuş kursantlar iştirak ediblər.