SİYASƏT
Prezident İlham Əliyevin Münhendə işğalçı Ermənistanın təxribat xarakterli informasiya siyasətinə vurduğu zərbə hər zaman qürurla xatırlanacaq
Bakı, 15 fevral, AZƏRTAC
Prezident İlham Əliyevin “Valday” Beynəlxalq Diskussiya Klubunda və Bişkekdə MDB Dövlət Başçılarının Sammitində, eləcə də 2020-ci il fevralın 15-də Münhen Təhlükəsizlik Konfransı çərçivəsində Ermənistan-Azərbaycan münaqişəsinə həsr olunmuş panel müzakirələrdəki çıxışları ilə 44 günlük Vətən müharibəsinin tarixi nəticələri bir-birini tamamlayan uğurlardır. Bu mənada, Prezident İlham Əliyevin həmin çıxışlarında qətiyyətlə söylədiyi “Qarabağ Azərbaycandır və nida” fikri torpaqlarımızın işğaldan azad olunması missiyasının ideya əsasına çevrilmişdi.
Bunu AZƏRTAC-a açıqlamasında Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.
Sədaqət Vəliyeva bildirib ki, Münhen Təhlükəsizlik Konfransı çərçivəsində Prezident İlham Əliyevin işğalçı ölkənin qlobal miqyasda dövlətimizə qarşı apardığı yalan və təxribat xarakterli informasiya siyasətinə vurduğu həlledici zərbə hər zaman qürurla xatırlanacaq. Çünki Prezident İlham Əliyev Münhen Təhlükəsizlik Konfransında Ermənistanın baş nazirinə siyasi və tarixi dərs vermişdi. Biz eyni prosesi “Valday” Beynəlxalq Diskussiya Klubunda və MDB dövlət başçılarının Aşqabadda keçirilən Zirvə görüşündə də müşahidə etmişdik. Zaman və məkan fərqi olmadan görürük ki, Prezident İlham Əliyev müxtəlif platformalarda Ermənistanın işğalçılıq siyasətini daim konkret faktlarla ifşa etmişdi.
Sədaqət Vəliyeva əlavə edib ki, Prezident İlham Əliyevin “Qarabağ Azərbaycandır və nida” fikri Azərbaycan xalqının öz torpaqlarının azadlığı uğrunda milli mübarizəsinin simvoluna çevrilmişdi. Prezident İlham Əliyevin istər “Valday” Beynəlxalq Diskussiya Klubunda, istərsə də Münhen Təhlükəsizlik Konfransında çıxışları xalqımızın döyüş ruhunun dirçəldilməsində, vahid milli hədəf uğrunda mübarizə naminə birliyimizin, həmrəyliyimizin daha da möhkəmləndirilməsində müstəsna rol oynamışdı.
Sədaqət Vəliyeva diqqətə çatdırıb ki, Prezident İlham Əliyev sözü ilə əməlinin bir olduğunu bütün dünyaya nümayiş etdirdi və möhtəşəm Qələbə ilə tarix yazdı. “Qarabağ Azərbaycandır və nida” deyən Azərbaycan Prezidentinin dəmir məntiqi, xalqımızın milli birliyi döyüş meydanında “dəmir yumruğa” çevrilərək xalqımıza tarixi Zəfər qazandırdı.