CƏMİYYƏT
“Qafqaz Türk-İslam Ordusunun Bakı zəfərinin 100 illiyi” adlı “dəyirmi masa” keçirilib
Bakı, 12 sentyabr, AZƏRTAC
“Türkiyə Universitetləri Məzunları” İctimai Birliyi (TUMİB) sentyabrın 12-də Azərbaycanda Atatürk Mərkəzində “Qafqaz Türk-İslam Ordusunun Bakı zəfərinin 100 illiyi” adlı “dəyirmi masa” keçirib.
AZƏRTAC xəbər verir ki, tədbiri açan İctimai Birliyin sədri Çingiz Bayramov 1918-ci il 15 sentyabr tarixinin Azərbaycan-Türkiyə dostluğu və qardaşlığında müstəsna əhəmiyyətə malik olduğunu bildirib. O, Nuru Paşanın rəhbərlik etdiyi Qafqaz İslam Ordusunun Azərbaycana gələrək işğalçı erməni-bolşevik qüvvələri ilə mübarizə apardığını, nəticədə Bakının düşməndən azad edildiyini söyləyib.
İctimai Birliyin sədri gənclər arasında Qafqaz İslam Ordusu və onun Bakının azad edilməsi istiqamətində apardığı mübarizə barədə məlumatlılığı artırmağın önəmli olduğunu vurğulayıb.
Prezident Administrasiyasının ictimai-siyasi məsələlər şöbəsinin sektor müdiri Qafar Əliyev tədbirdə çıxış edərək Qafqaz İslam Ordusunun Bakını daşnak-bolşevik işğalından azad etməsinin tarixi barədə danışıb. O deyib ki, bu hadisə Azərbaycan xalqının tarixində böyük dəyərə malik səhifə kimi əbədiləşib və daim xatırlanır. Sovet dövründə bu önəmli tarix həmişə gizlədilirdi, Nuru Paşanın adı heç bir mənbədə çəkilmirdi. Lakin Azərbaycan xalqına qarşı soyqırımı həyata keçirən Stepan Şaumyana Bakıda heykəl qoyulmuşdu. Amma bu gün Azərbaycan müstəqil ölkədir, tarixi həqiqətlər olduğu kimi deyilir, yazılır, göstərilir.
Qafar Əliyev vurğulayıb ki, Azərbaycan ilə Türkiyə arasında dostluq, qardaşlıq münasibətləri gündən-günə daha da möhkəmlənir. Türkiyədən başlayan, Azərbaycanda, Bakıda başa çatan bu möhtəşəm tarixi hadisənin mahiyyətini zaman getdikcə daha dərindən dərk edirik.
“Dəyirmi masa”nın digər iştirakçıları çıxış edərək bildiriblər ki, Avropa dövlətlərinin türk qoşunlarının Azərbaycana gəlməsinə etiraz etmələrinə baxmayaraq, Osmanlı Türkiyəsi qardaş köməyini əsirgəmədi və Nuru Paşanın komandanlığı ilə Qafqaz İslam Ordusu öz tarixi vəzifəsini şərəflə yerinə yetirdi. Nuru Paşanın və türk əsgərlərinin xatirəsi bu gün də Azərbaycanda ehtiramla anılır.