REGİONLAR
Qobustan rayonunda Milli Qurtuluş Günü qeyd olunub
Qobustan, 14 iyun, AZƏRTAC
Qobustanlılar 15 iyun - Milli Qurtuluş Gününü təntənəli surətdə qeyd ediblər.
AZƏRTAC-ın bölgə müxbiri xəbər verir ki, rayon rəhbərliyinin, ziyalıların, ağsaqqalların və gənclərin qatıldıqları tədbirin iştirakçıları əvvəlcə dahi şəxsiyyət Heydər Əliyevin abidəsini ziyarət edib, önünə əklil və tər qərənfillər düzüblər.
Sonra tədbir Gənclər Mərkəzində davam etdirilib. Rayon icra hakimiyyətinin başçısı Adil Məmmədov təntənəli yığıncağı açaraq Milli Qurtuluş Günü münasibətilə iştirakçıları təbrik edib, görkəmli dövlət və siyasi xadim Heydər Əliyevin Azərbaycan xalqı qarşısındakı misilsiz xidmətlərindən danışıb. Qeyd olunub ki, Milli Qurtuluş Günü sadəcə təqvim bayramı deyil, böyük ictimai, siyasi və tarixi əhəmiyyətə malik bir gündür. Vətənini, xalqını sevən, həmin çətin, ağrılı günlərin dəhşətlərini yaşayan, hadisələri gözləri ilə görən insanlar üçün 15 iyun xalqımızın qurtuluş tarixi, Azərbaycanın ölüm-qalım mübarizəsinin tarixidir. Bu tarixi yaradan isə Azərbaycanın müstəqilliyində, inkişafında, gələcəyində müstəsna rol oynayan, daim xalqına arxalanan və xalqına arxa, dayaq olan bir insan - Heydər Əliyevdir.
Təntənəli yığıncaqdakı çıxışlarda ötən əsrin 90-cı illərinin əvvəllərində Azərbaycanın düşdüyü çətin vəziyyətdən, ölkənin parçalanmaq təhlükəsi ilə üz-üzə qalmasından danışılıb. Bildirilib ki, belə bir vəziyyətdə Azərbaycan dövlətçiliyinin gələcəyindən narahatlıq keçirən ziyalılar ulu öndər Heydər Əliyevə müraciət etdilər. Xalqın təkidli tələbi ilə ikinci dəfə hakimiyyətə qayıdan görkəmli dövlət və siyasi xadim Heydər Əliyev Azərbaycanı bu bəlalardan xilas etdi. Tezliklə siyasi gərginlik aradan qaldırıldı, müstəqillik üçün möhkəm təminat yaradıldı, ölkə inkişaf yoluna çıxarıldı.
Çıxışlarda ulu öndər Heydər Əliyevin şah əsəri olan müstəqil Azərbaycanın Prezident İlham Əliyevin rəhbərliyi ilə əldə etdiyi böyük uğurlardan, regionun lider dövlətinə çevrilməsindən iftixarla danışılıb.
Tədbir konsert proqramı ilə davam etdirilib.