Naxçıvan, 7 may, AZƏRTAC

Azərbaycan çempionatının Bakıda keçirilməyinə artıq öyrənmişdik. Naxçıvanda təşkil olunması isə həm sürpriz, həm də xoş oldu. Bilirdik ki, burada təşkil olunan bütün yarışlar yüksək səviyyədə olur. Bundan öncə dəfələrlə Naxçıvan Beynəlxalq Şahmat Festivalında iştirak etmişəm və 2018-ci ildə qalib adını qazanmışam. Hər zaman gözəl və yüksək səviyyədə təşkil olunub. Buna görə Naxçıvan Muxtar Respublikası Şahmat Federasiyasına öz minnətdarlığımı bildirirəm.

Bu sözləri AZƏRTAC-ın Naxçıvan bürosuna müsahibəsində şahmat üzrə kişilər arasında Azərbaycan çempionatında iştirak edən beynəlxalq qrossmeyster, Əməkdar məşqçi Nicat Məmmədov deyib.

Əslən muxtar respublikanın Kəngərli rayonunun Yurdçu kəndindən olan Nicat Məmmədov deyib: “Naxçıvanda olmaq mənim üçün ikiqat xoşdur. Çünki bu diyar mənim üçün çox doğma bir yerdir. Burada şahmatçılar üçün də ideal şərait yaradılıb. Təşkilatçılıq çox yüksək səviyyədədir. Bütün bunlar şahmatçılar üçün vacib amillərdir. May ayında yaşıl libasa bürünən Naxçıvan daha da cazibədar məkana çevrilir. Yaşıllıq, hava, gözəl təbiət şahmatçının dincəlməsinə müsbət təsir edir”.

O vurğulayıb ki, Naxçıvanda pandemiyanın yaratdığı çətinliklər müşahidə olunmur. Görünür, burada həyata keçirilən qabaqlayıcı tədbirlər öz nəticəsini verib. Yaranan bu şərait Naxçıvanda istənilən istiqamətdə yarışların keçirilməsinə imkan verir.

Nicat Məmmədov qeyd edib ki, Azərbaycan çempionatında zəif rəqiblər iştirak etmir. Burada seçilmiş 12 zəka sahibi mübarizə aparır və şahmat tariximizdə ilk dəfədir ki, bir yarışda 8 qrossmeyster və 4 beynəlxalq usta iştirak edir. “Hər bir oyun mürəkkəb keçir və buna artıq alışmışıq. Hələ ki, qələbə və “sülh” ilə oyunları davam etdirirəm. Digər turlarda da uğurlu nəticələr əldə etməyə çalışacağam”, - deyən qrossmeyster bildirib ki, şahmat daha çox psixologiyanın üzərində qurulan oyundur. Rəqibin bir anlıq səhvi, diqqətsizliyi və ya həyəcanı oyunun gedişatına çox böyük təsir edə bilər. Hər şahmatçı oyunla bağlı zəif cəhətlərini turnirlərdə görür və növbəti məşqlərini daha çox o istiqamətə yönəldir. Şahmat üzrə on birinci dünya çempionu Robert Ceyms Fişer də müsahibəsində bildirmişdi ki, rəqibə ən yaxşı təsir vasitəsi güclü, düzgün gedişlər etməkdir. Belə ki, ardıcıl düzgün gedişlər bir müddət sonra rəqibin “müdafiə sistemini dağıdır”.

Azərbaycan dilində şahmat ilə bağlı ikicildlik kitabın müəllifi olduğunu deyən qrossmeyster diqqətə çatdırıb ki, bundan sonra da şahmat ilə bağlı yeni kitablar yazmağı düşünür.