REGİONLAR


Qubadlı sakinləri şəhid məzarlarını ziyarət ediblər

Sumqayıt, 27 sentyabr, Ətrabə Rzayeva, AZƏRTAC

Qubadlı rayonu üzrə 27 Sentyabr - Anım Gününə həsr olunmuş silsilə tədbirlər təşkil edilir. Rayon icra hakimiyyətinin təşkilatçılığı ilə sentyabrın 27-də Bakı şəhərində II Fəxri xiyabanda, daha sonra Sumqayıt şəhərindəki Şəhidlər xiyabanında Vətən müharibəsi şəhidlərinin xatirəsinə həsr onunmuş anım tədbirləri keçirilib. Tədbirlərdə Qubadlı Rayon İcra Hakimiyyətinin başçısı Malik İsaqov, hüquq-mühafizə orqanları, YAP rayon təşkilatının, idarə və müəssisələrin rəhbərləri, şəhidlərin ailə üzvləri, yaxınları, qazilər, ziyalılar, ictimaiyyət nümayəndələri iştirak ediblər.

AZƏRTAC xəbər verir ki, tədbirlər torpaqlarımızın bütövlüyü uğrunda canından keçmiş Vətən oğullarının xatirəsinin bir dəqiqəlik sükutla yad edilməsi ilə başlayıb.

Əvvəlcə iştirakçılar Bakıdakı II Fəxri xiyabanda dəfn olunan Vətən müharibəsində qəhrəmancasına şəhid olmuş Vətən Müharibəsi Qəhrəmanı, polkovnik-leytenant Qasımov Faiq Qaçay oğlu, Milli Qəhrəman, şəhid polkovnik Həmidov Şükür Nəriman oğlu, mayor Alıyev Elçin Bayram oğlu, Vətən Müharibəsi Qəhrəmanı, mayor Ağayev Vüqar Əhməd oğlu və əslən Qubadlı rayonundan olan mayor Əsgərov Rüfət Mürvət oğlunun məzarlarını ziyarət edib, üzərinə gül dəstələri və əklillər qoyublar. Şəhidlərin ruhuna dualar oxunub.

Çıxışlarda qeyd edilib ki, Vətən müharibəsinin ilk şəhidlərindən olan Qubadlı rayon Qayalı kənd sakini, Vətən Müharibəsi Qəhrəmanı, şəhid polkovnik-leytenant Qasımov Faiq Qaçay oğlu 2020-ci il sentyabrın 27-də “Ohanyan səddi”ni ilk yaran hərbçilərimizdən olub və rəhbərlik etdiyi qrupu ilə birgə Füzuli rayonu ərazisində düşmənin bir neçə post və səngərini dağıdaraq 300-ə yaxın düşmən əsgərini və zabitini məhv edib, özü də qəhrəmancasına şəhid olub. Prezident İlham Əliyevin müvafiq sərəncamları ilə şəhid polkovnik-leytenant Qasımov Faiq Qaçay oğluna ölümündən sonra “Vətən Müharibəsi Qəhrəmanı” adı verilib, “Vətən uğrunda”, “Xocavəndin azad olunmasına görə” və “Füzulinin azad olunmasına görə” medalları ilə təltif edilib.

Bildirilib ki, 44 günlük müharibə nəticəsində Azərbaycan Ordusu Müzəffər Ali Baş Komandan, Prezident İlham Əliyevin rəhbərliyi ilə ölkənin ərazi bütövlüyünü, tarixi ədaləti, beynəlxalq hüququ bərpa etdi. Xalq öz ordusuna arxa oldu, rəhbəri ətrafında “dəmir yumruq”tək birləşərək işğalçıya sarsıdıcı zərbə vurdu. Vətən müharibəsində qəhrəmancasına döyüşmüş, Azərbaycan Bayrağını işğaldan azad edilən torpaqlarımızda dalğalandırmış, ölkəmizin ərazi bütövlüyü uğrunda canlarını fəda etmiş əsgər və zabitlərimizə, bütün şəhidlərimizə dərin ehtiram əlaməti olaraq Prezident İlham Əliyev sentyabrın 27-sinin Anım Günü kimi qeyd olunması ilə bağlı Sərəncam imzalayıb.

Qeyd olunub ki, 30 ilə yaxın həsrətində olduğumuz Qubadlı rayonu da 2020-ci il oktyabrın 25-də şəhidlərimizin qanı və canı bahasına işğaldan azad edildi. Vətən müharibəsində Qubadlı rayonundan 11 şəhid və 40-dan çox yaralı öz adlarını tarixə yazdılar. Həmçinin rayondan olan 100-dən çox Vətən müharibəsi iştirakçısı Prezidentin sərəncamları ilə orden və medallarla təltif olunub. Ümumiyyətlə, rayon üzrə 275 nəfər könüllü olaraq Vətən müharibəsində iştirak edib.

Sonra Azərbaycanın Milli Qəhrəmanı, şəhid polkovnik Şükür Həmidovun atası Nəriman Həmidov və Vətən Müharibəsi Qəhrəmanı, şəhid polkovnik-leytenant Faiq Qasımovun qardaşı Gəray Qasımov göstərilən diqqət və qayğıya görə Ali Baş Komandan Prezident İlham Əliyevə, Birinci vitse-prezident Mehriban xanım Əliyevaya minnətdarlıqlarını bildiriblər.

Daha sonra Sumqayıt şəhərində yerləşən Şəhidlər xiyabanında Rəhimli Orxan Elxan oğlu, Abışov Sirac Abış oğlu, Həsənzadə Məhəmmədəli Hörmət oğlu, Allahverdiyev Vüsal Tahir oğlu, İsgəndərov İlkin Camal oğlu, Məhərrəmov Ülvi Tahir oğlu və Mustafayev Rüfət Zöhrab oğlunun məzarları ziyarət olunub, ruhlarına dualar oxunub.

Şəhid məzarlarının ziyarəti zamanı vətənpərvərlik mövzusunda şeirlər səsləndirilib.

Qubadlı rayonundan Abşeron rayonu st.Sumqayıt yaşayış massivində müvəqqəti məskunlaşan məcburi köçkünlərin yaşadıqları ərazidə yerləşən istirahət parkında şəhidlərimizin xatirəsinə həsr olunmuş ağacəkmə aksiyası da keçirilib.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.