REGİONLAR


Qusarın superintensiv alma bağlarından yığılan məhsul Rusiya bazarlarına göndəriləcək VİDEO

Qusar, 1 sentyabr, Elxan Yusifli, AZƏRTAC

Qusarın müasir tipli superintensiv alma bağlarından məhsul yığımına başlanılıb.

AZƏRTAC-ın bölgə müxbiri xəbər verir ki, rayonun Kuzunqışlaq kəndində 100 hektardan çox sahədə salınan superintensiv meyvə bağlarında almanın “Royal qala”, “Golden”, “Jonagold”, “Red Chief”, “Granny Smith”, “Fuji”, “Brebrun” və digər növləri becərilir.

Bağların ilk məhsulu avqust ayında toplanılıb. Tezyetişən “Royal qala” sortlardan bol məhsul əldə olunub. Hazırda isə “Golden”, “Jonagold”, “Granny Smith” sortlarının becərildiyi bağların məhsulu toplanılır.

Aqronom Həmid Bayraqdarov bildirib ki, superintensiv alma bağlarında məhsul yığımı oktyabrın sonlarına kimi davam edəcək. Burada becərilən sortlar ənənəvi alma bağlarından 3-4 dəfə çox məhsuldardır. Belə ki, ənənəvi bağların hər hektarından 20-25 ton məhsul toplanılırsa, intensiv bağçılıqda bu göstərici 60-80 ton arasında dəyişir.

İntensiv bağların becərilməsi ilə yanaşı, yığımı və qablaşdırılması da müasir üsullarla həyata keçirilir. Meyvə toplanan zaman cərgələr arasında kiçikqoşqulu traktor hərəkət edir. Yığılan almalar birbaşa qoşqudakı böyük taralara tökülür. Bu taralar isə soyuducu anbarlara daşınır. Meyvələr bu üsulla toplananda zədə almadığından itki də az olur.

Toplanan almanın bir qismi soyuducu anbarlarda saxlanılır. Hazırda məhsul yerli bazarlarda satılır. Kütləvi yığım zamanı toplanan məhsulun böyük hissəsi isə satış üçün Rusiya bazarlarına göndəriləcək.

Təsərrüfatçı Ümid Şalbuzov bildirib ki, intensiv bağlarda alma ağaclarının ara məsafəsi 1 metrdən az olur. Ağaclara il ərzində müxtəlif aqrotexniki qulluq - dərmanlama, gübrələmə, budama işləri görülür. İntensiv bağçılığın əsas üstünlüklərindən biri də meyvə tinginin elə əkilən il məhsula düşməsidir. İllər keçdikcə, məhsuldarlıq da yüksək olur.

Ümumilikdə, Qusar rayonunda intensiv üsulla becərilən 1200 hektara yaxın meyvə bağı mövcuddur. Bu bağların təxminən 800 hektarında alma yetişdirilir. Hər il bu bağlardan orta hesabla 50 min ton məhsul toplanır.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.