AZƏRTAC xəbər verir ki, oktyabrın 12-də Bakı Dövlət Universitetində Rumıniya Prezidenti Trayan Beseskuya BDU-nun Fəxri doktoru diplomunun təqdim edilməsi mərasimi olmuşdur.

Rumıniya Prezidentini universitetdə səmimiyyətlə qarşıladılar. Tələbələr ali qonağa gül təqdim etdilər.

BDU-nun rektoru, MEA-nın müxbir üzvü, Milli Məclisin deputatı Abel Məhərrəmov mərasimi açaraq, Rumıniya Prezidentinin həyat və fəaliyyətinin əsas mərhələlərindən danışdı. Rumıniya dövlətinin başçısına Şərqdə ilk dəfə yaradılan dünyəvi ali məktəbin - Bakı Dövlət Universitetinin tarixi barədə məlumat verildi, bildirildi ki, hazırda BDU-nun 16 fakültəsində 17 minədək tələbə təhsil alır. Onların min nəfərdən çoxu 15 xarici ölkənin nümayəndələridir. Universitetdə 1300-dən çox müəllim işləyir, onların təxminən 300 nəfəri elmlər doktoru, professor, 14 nəfəri Milli Məclisin deputatıdır.

Rektor Abel Məhərrəmov BDU-nun geniş beynəlxalq əlaqələrindən söhbət açaraq dedi ki, bu təhsil ocağı Avropa Universitetlər Assosiasiyasının üzvüdür, Bolonya prosesi çərçivəsində keçirilən tədbirlərdə fəal iştirak edir. BDU Rumıniya Universitetinin təşəbbüsü ilə yaradılmış Qara Dəniz Universitetləri Şəbəkəsinə də daxildir. 2002-ci ildən 2004-cü ilədək BDU həmin qurumda sədrlik etmişdir. Rumıniyanın bir sıra ali məktəbləri ilə BDU arasında sıx əlaqələr yaradılmışdır, birgə layihələr həyata keçirilir.

Rektor Rumıniyaya səfərindən aldığı təəssüratını bölüşərək dedi ki, bu ölkənin rəhbərliyi elm və təhsilə, habelə Qara Dəniz Universitetləri Şəbəkəsinin fəaliyyətinə böyük diqqət yetirir. A.Məhərrəmov Rumıniya Prezidentini Avropa İttifaqının öz üzv ölkələri üçün maliyyələşdirdiyi beynəlxalq təhsil proqramlarında Azərbaycan ali məktəblərinin iştirak etməsinə kömək göstərməyə çağırmışdır.

Abel Məhərrəmov çıxışında Azərbaycanın başlıca problemi olan Dağlıq Qarabağ münaqişəsinə də toxundu. Eyni zamanda bildirildi ki, müstəqil Azərbaycan dövlətinin memarı və qurucusu, ümummilli lider Heydər Əliyevin müəyyənləşdirdiyi və Prezident İlham Əliyevin uğurla davam etdirdiyi xarici siyasət xətti Avropa qurumlarına və Avratlantik birliyinə inteqrasiyadan ibarətdir.

Rektor Rumıniya ilə Azərbaycan arasında ənənəvi dostluq münasibətlərinin inkişafında və möhkəmlənməsində xidmətlərinə görə Rumıniya dövlətinin başçısına Fəxri doktor adı verilməsi haqqında BDU Elmi Şurasının 2006-cı il 11 oktyabr tarixli qərarını oxudu.

Rektor Rumıniya dövlətinin başçısına BDU-nun Fəxri doktoru diplomunu, doktor mantiyasını, habelə xatirə hədiyyələrini təqdim etdi.

Prezident Trayan Besesku mərasimdə çıxış edərək, Rumıniya dövlətinin təşəkkülünün əsas mərhələlərindən, yeni ictimai-siyasi formasiyaya keçid dövründə rumın xalqının qarşılaşdığı çətinliklərdən danışdı.

O dedi ki, hazırda Rumıniya NATO-nun üzvüdür, gələn ilin yanvarından Avropa İttifaqının tamhüquqlu üzvü olacaqdır. Ölkənin xarici siyasət xətti Qara dəniz və Xəzər dənizi hövzələrinin dövlətləri ilə münasibətlərin möhkəmlənməsinə yönəldilmişdir.

Trayan Besesku bu regiondakı münaqişələrə toxunaraq vurğuladı ki, onun ölkəsi Rumıniyanın təhlükəsizliyinə müəyyən dərəcədə təsir göstərə biləcək belə qarşıdurmaların mövcudluğuna biganə qalmayacaqdır. Rumıniya rəhbəri dedi ki, ayrılıqda öz xüsusiyyətləri olan münaqişələrdən hər birinə beynəlxalq hüquq normalarına, dövlətlərin ərazi bütövlüyü prinsiplərinə əməl edilməsi mövqelərindən yanaşmaq lazımdır.

Rumıniya-Azərbaycan münasibətlərinin perspektivlərindən bəhs edən ali qonaq regionda lider ölkə olan Azərbaycanın yüksək iqtisadi potensialını vurğuladı. Rumıniya lideri bildirdi ki, Azərbaycanda həyata keçirilən qlobal enerji layihələri Xəzər neftinin nəqlinin alternativ yollarının müəyyən edilməsinə gətirib çıxarmalıdır.

Mərasimdən sonra Rumıniya Prezidenti BDU-nun Fəxri doktorlarının fotoşəkillərinə baxdı.