Bakı, 12 iyul, AZƏRTAC

Bakı Ali Neft Məktəbinin və Əmək və Əhalinin Sosial Müdafiəsi Nazirliyinin (ƏƏSMN) birgə təşkilatçılığı ilə iş yerlərində bədbəxt hadisələrin qarşısının alınması sahəsində profilaktik tədbirlərə dair təqdimat keçirilib.

BANM-dən AZƏRTAC-a bildirilib ki, bu ali məktəbdə təşkil olunan tədbirin əsas məqsədi əməyin təhlükəsizliyi məsələsinə diqqətin artırılması və ölkəmizdə fəaliyyət göstərən iri şirkətlərin iştirakı ilə Beynəlxalq Sosial Təminat Assosiasiyasının (ISSA) təbliğ etdiyi “Vision Zero” təşəbbüsü üzrə təqdimatın keçirilməsi olub.

Tədbirdə BANM-in rektoru Elmar Qasımov, əmək və əhalinin sosial müdafiəsi nazirinin müavini Mətin Kərimli, ISSA-nın prezidenti, Almaniyanın İş Yerində Bədbəxt Hadisələrdən Sosial Sığorta Təşkilatının (DGUV) baş direktoru Yoakim Bröyer, ƏƏSMN-in aidiyyəti struktur bölmələrinin rəhbərləri, ölkədə fəaliyyət göstərən müxtəlif transmilli şirkətlərin nümayəndələri, müəllimlər və tələbələr iştirak ediblər.

Müxtəlif səbəblərdən iş yerlərində baş verən bədbəxt hadisələrdən danışan E.Qasımov bildirib ki, bu cür hallar nəticəsində müəssisələrə və onların əməkdaşlarına ciddi zərər dəyir. Hər bir şirkətdə və müvafiq qurumlarda belə hadisələrin qarşısını almaq istiqamətində təlimlərin və maarifləndirmə işlərinin həyata keçirilməsi vacibdir.

M.Kərimli istehsalatda baş verən bədbəxt hadisələrin əməyin təhlükəsizliyi tələblərinin yerinə yetirilməməsindən, bir çox hallarda isə əməyin mühafizəsi normalarının tətbiqinə biganə münasibətdən və ya bu sahədə məlumatlılığın aşağı səviyyədə olmasından irəli gəldiyini deyib. Diqqətə çatdırılıb ki, belə hadisələrin baş verməməsinin mümkünlüyü, ilk növbədə, hər bir işçinin sağlam və təhlükəsiz əmək şəraiti ilə təmin olunmasından, istehsalatda qəza hallarının qarşısının alınması üçün lazımi önləyici tədbirlərin görülməsindən asılıdır. Bu baxımdan ISSA-nın “Vision Zero” təşəbbüsünün praktik müstəvidə geniş şəkildə reallaşdırılması xüsusi önəm kəsb edir. Əməyin təhlükəsizliyinə nəzarət sisteminin innovativ üsullar əsasında təkmilləşdirilməsi ƏƏSMN-in əsas hədəflərindəndir.

“Vision Zero” təşəbbüsü ilə bağlı təqdimatla çıxış edən Y.Bröyer bildirib ki, bu layihənin məqsədi iş proseslərində baş verə biləcək bütün qəzaların və xəstəliklərin qarşısını almaqdır. O, həmçinin müəssisələrdə ölüm hadisələrinin sıfıra endirilməsi, ciddi xəsarət və peşə xəstəliklərinin qarşısının alınması üçün təcrübədə istifadə edilən “qızıl qaydalar”dan və atılması vacib olan praktik addımlardan danışıb.

Sonra E.Qasımov Y.Bröyeri BANM-in “Fəxri qonaq” plaketi ilə təltif edib.

Sonda Y.Bröyer əməyin təhlükəsizliyi və bədbəxt hadisələrin qarşısının alınması ilə bağlı iştirakçıları maraqlandıran sualları cavablandırıb. Qonaq, həmçinin BANM-in kampusunu gəzərək burada tələbələr üçün yaradılmış şəraitlə tanış olub.

Qeyd edək ki, 1927-ci ildə əsası qoyulmuş ISSA sosial təminat sahəsində vahid prinsiplərin və qabaqcıl standartların hazırlanması və təşviqi, bu sahədə beynəlxalq əməkdaşlığın həyata keçirilməsi, milli, regional və beynəlxalq səviyyələrdə sosial təminat siyasətlərinin təkmilləşdirilməsi, tədqiqatların aparılması, bilik və məlumat mübadiləsinin reallaşdırılması, üzv təşkilatlara texniki yardımın göstərilməsi ilə məşğul olan təşkilatdır.