ŞALBUZDAĞA ZİYARƏTİN QIZĞIN ÇAĞIDIR

Adətən, iyul ayının ortalarından avqust ayının sonunadək Dağıstan dindarları Doqquzpara rayonuna - Şalbuzdağdakı müqəddəs yerlərə ziyarətə gedirlər.

AZƏRTAC “Dagestanskaya pravda” qəzetinə istinadla bildirir ki, Dağıstanda ağızdan-ağıza ötürülərək bu günə qədər gəlib çıxan bir əfsanə yaşayır. Əfsanədə deyilir ki, nə vaxtsa bu rayona iki qardaş ərəb gəlib, Mikrah kəndində məskən salıbmış. Qardaşlardan biri ölür. Bir dəstə göyərçin uçaraq gəlib cənazəni Şalbuzdağa qaldırır. Kəndin sakinləri dağa qalxıb onun cəsədini tapır və burada basdırır, üzərində abidə ucaldırlar. Elə o vaxtlardan da mərhum ərəb xalqın nəzərində müqəddəsləşir. Bu, söylənilən əfsanələrdən yalnız biridir. Lakin ziyarətə gələnlərin hamısı bir fikirdə - bu yerlərin müqəddəs olması fikrində yekdildirlər. Odur ki, müqəddəs Şalbuzdağa insan axınının ardı-arası kəsilmir.

Bu il də belə olmuşdur. İndi ziyarətin ən qızğın çağıdır. Əlini müqəddəs ocağa vurmaq üçün təkcə bir gündə Şalbuzdağın ətəyinə 500 insan gəlmişdir. Buraya təkcə Dağıstandan yox, Azərbaycandan və Kabarda-Balkariyadan da ziyarətçilər gəlirlər.

Ziyarətgahda onlar üçün hər cür şərait yaradılmışdır. Miskincə kəndindən Şalbuzdağadək 25 kilometrlik yol çəkilmişdir. Dağın ətəyində düşərgə salınmış, hər cür rahatlığı olan mehmanxana, yeməkxana və dəstəmaz almaq üçün xüsusi yerlər tikilmişdir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.