REGİONLAR


Sabirabadda "İki yad adam" filmi nümayiş olunub VİDEO

Sabirabad, 27 aprel, A.Yavərzadə, AZƏRTAC

Sabirabad Rayon İcra Hakimiyyətinin dəstəyi, Sabirabad Regional Mədəniyyət İdarəsinin təşəbbüsü ilə rayon Mədəniyyət Mərkəzində görkəmli yazıçı və ədəbiyyatşünas Mir Cəlal Paşayevin anadan olmasının 114-cü ildönümü münasibətilə tədbir təşkil keçirilib.

Tədbirdə Sabirabad Rayon İcra Hakimiyyətinin rəhbərliyi və ictimaiyyət nümayəndələri iştirak ediblər.

AZƏRTAC-ın bölgə müxbiri xəbər verir ki, tədbir çərçivəsində Sabirabad rayon Mərkəzi kitabxanasının fondunda yer alan Mir Cəlal Paşayevin əsərlərindən, onun haqqında yazılmış bioqrafiyalardan ibarət kitab sərgisinə baxış keçirilib.

Sonra “Addım” Gənclər Təşkilatının sifarişi ilə yazıçının "Kəmtərovlar ailəsi" hekayəsinin motivləri əsasında lentə alınmış "İki yad adam" filmi nümayiş olunub. Film tamaşaçılar tərəfindən böyük maraqla qarşılanıb.

Film həm də Çin Xalq Respublikasının paytaxtı Pekin şəhərində keçirilən World Cultural Open Organizationun dəstəyi ilə keçirilən Grand Asian Film Festivalının final gecəsində nümayiş etdirilib. Film "Ən yaxşı sosial mövzu" və "Ən yaxşı aktyor oyunu" nominasiyasında mükafatlara layiq görülüb.

Əməkdar artist Gülşad Baxşıyeva film haqqında təəssüratlarını bölüşərkən bildirib ki, Mir Cəlal Paşayevin əsərini canlandıran film 35 dəqiqə olsa da, çox dəyərli alınıb. Çünki filmdə bu gün üçün aktual problemlər işıqlndırılıb. "Bəzən gənclərin fikri, meyili, sadəcə, biznes qurmağa, pul qazanmağa yönəlir və bu zaman ailəyə önəm vermək ikinci planda qalır. Burada diqqəti çəkən məqam Mir Cəlal Paşayevin illər öncə bu kimi problemləri qələmə almasıdır. Çox aktual əsər olmaqla yanaşı, həm də klassikadır. Bu filmlə gənclərə mesaj göndərilir ki, onlar öz həyat yoldaşlarına, ailələrinə önəm versinlər, - deyə Gülşad Baxşıyeva qeyd edib.

Filmdə Leyla obrazını canlandıran Duyğu Dəvəli film haqqında danışarkən vurğulayıb ki, qısametrajlı film olmasına baxmayaraq, məna yükü çox dərin olan bir filmdir. "Uzun illər öncə yazılmış olsa da günümüzlə çox səsləşir. Çünki günümüzdə də sosial şəbəkələr, internet dünyası həyatımızın gerçəkliyi olsa belə, bizləri real həyatın gerçəkliyindən müəyyən qədər də olsa ayırır. Ümumiyyətlə ailədə sevdiklərimizlə ən əsas sayılan amil ünsiyyətdir, çünki ünsiyyət yoxdursa, heç nə yoxdur və bu film birbaşa ünsiyyətin olmamasının nələrə gətirib çıxardığını sərgiləyir. Əgər sevdiklərimizin yanımızda olmasını istəyiriksə, ailəmizi qorumaq istəyiriksə, bu dəyərə önəm verməliyik" - deyə Duyğu Dəvəli bildirib.

Filmdə Qulam obrazının ifaçısı Riyad Abdul isə film haqqında bu fikirləri söyləyib: "Bildiyimiz kimi, bu film artıq bir neçə ölkədə, bir çox festivallarda - Vyanada, Pekində, Qazaxıstanda, Gürcüstanda nümayiş etdirilib. Film haqqında yaranan fikirlər isə hər zaman müsbət olub. Çünki bu filmin dəyəri, mənası var. Ümumiyyətlə, Mir Cəlal Paşayevin əsərlərində belə dərin mənalar öz əksini tapır".

 

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.