CƏMİYYƏT


“Səngərdən səhnəyə musiqi” layihəsində uğurla iştirak edən Azərbaycan Ordusunun nümayəndələri Vətənə qayıdıblar VİDEO

Bakı, 2 sentyabr, AZƏRTAC

Türkiyə Respublikasının Milli Müdafiə Nazirliyinin təşəbbüsü və təşkilatçılığı ilə qardaş ölkədə Böyük Taarruzun (Avqust Zəfərinin) 100-cü ildönümü və Türkiyə Silahlı Qüvvələri Günü münasibətilə keçirilən “Səngərdən səhnəyə musiqi” (“Siperden Sahneye Müzik”) layihəsində uğurla çıxış edən Azərbaycan Ordusunun nümayəndə heyəti Vətənə qayıdıb.

Yaradıcı qrupun rəhbəri, Əməkdar incəsənət xadimi, Prezidentin fərdi təqaüdçüsü polkovnik Abdulla Qurbani AZƏRTAC-a bildirib ki, hər dəfə olduğu kimi yenə də qardaş Türkiyənin Milli Müdafiə Nazirliyinin rəsmiləri nümayəndə heyətimizi böyük səmimiyyətlə qarşılayıblar. “Türkiyə, Azərbaycan, Şimali Kipr Türk Respublikası, Qazaxıstan, Özbəkistan və Qırğızıstan respublikaları ordularının hərbi musiqi kollektivlərinin üzvləri ilə birlikdə avqustun 27-dən 31-dək davam edən bu möhtəşəm layihə çərçivəsində bir çox tədbirlərə qatıldıq. Ankarada Anıtqəbri ziyarət edərək Türkiyə Cümhuriyyətinin qurucusu Mustafa Kamal Atatürkün məzarını ziyarət edib qarşısına gül dəstələri düzdük, xatirəsini ehtiramla yad etdik. Türkiyə Milli Müdafiə Nazirliyinin şəxsi heyətinin mənəvi-psixoloji hazırlığının, vətənpərvərlik tərbiyəsi işinin, mədəni istirahətinin təşkili məsələləri ilə yaxından tanış olduq. Türkdilli ölkələrin ordularının yaradıcı kollektivləri ilə təcrübə mübadiləsi apardıq”, - deyə polkovnik qeyd edib.

Abdulla Qurbani bildirib ki, Türkiyənin paytaxtı Ankarada və İstanbul şəhərində təşkil edilən konsertlərdə altı qardaş türkdilli ölkənin təqdim etdikləri dostluq, qardaşlıq nəğmələri, milli musiqi və rəqs nümunələri yüzlərlə tamaşaçı tərəfindən maraqla izlənilib. Azərbaycan Ordusunun yaradıcı heyətinin çıxışları da böyük marağa səbəb olub.

Tədbir ərəfəsində Azərbaycan Ordusunun Laçın şəhərinə daxil olaraq 30 ildən sonra tarixi yurd yerlərimizdə bayrağımızı qaldırması və ətraf yaşayış məntəqələrinin nəzarətə alınması xəbəri alqışlarla qarşılanıb.

Konsertdən sonra milli müdafiə naziri Hulusi Akar səhnəyə qalxaraq yaradıcı kollektivlərə təşəkkür edib. Bu kimi tədbirlərin davamlı olacağını vurğulayıb.

A.Qurbani qeyd edib ki, İstanbulda Milli Müdafiə Universitetinin 800 nəfərlik Atatürk salonunda türkdilli xalqların hərbi qulluqçularının, musiqi kollektivlərinin iştirakı ilə keçirilən konsertdə Türkiyənin milli müdafiə naziri Hulusi Akar, Azərbaycan Respublikasının müdafiə naziri Zakir Həsənov, Şimali Kipr Türk Respublikasının daxili işlər naziri Tahsin Ertoğruloğlu, Qazaxıstan, Özbəkistan və Qırğızıstan respublikalarının müdafiə nazirlərinin müavinləri də iştirak ediblər.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.