İQTİSADİYYAT


Sığortaçılar Assosiasiyası Milli Avtomobil Klubu ilə əməkdaşlıq edəcək

Bakı, 8 sentyabr, AZƏRTAC

“Azərbaycan Sığortaçılar Assosiasiyası” (ASA) İctimai Birliyi ilə Azərbaycan Milli Avtomobil Klubu (AMAK) arasında anlaşma memorandumu imzalanıb.

ASA-dan AZƏRTAC-a bildirilib ki, əldə olunan razılığa əsasən, tərəflər Prezident İlham Əliyevin 2018-ci il 27 dekabr tarixli Sərəncamı ilə təsdiq edilmiş “Azərbaycan Respublikasında yol hərəkətinin təhlükəsizliyinə dair 2019–2023-cü illər üçün Dövlət Proqramı” çərçivəsində və eləcə də “Sığorta fəaliyyəti haqqında” Qanuna uyğun olaraq təsdiq edilmiş “Qarşısıalınma tədbirləri fondunda yığılan vəsaitlərin istifadə olunması təyinatları haqqında Qaydalar”a əsasən, Azərbaycan Respublikasında yol hərəkətinin təhlükəsizliyi səviyyəsinin artırılması vasitəsilə yol-nəqliyyat hadisələrinin sayının və bu hadisələr nəticəsində ölkəyə dəyən sosial-iqtisadi zərərin azaldılması istiqamətində tədbirlərlə bağlı sosial layihələrin həyata keçirilməsində əməkdaşlıq edəcək.

Sosial məsuliyyətin aşılanmasının təbliğ və təşviq edilməsi, insanlar arasında maarifləndirmə layihələrinin həyata keçirilməsi memorandumun qarşısındakı əsas hədəfdir. Əldə olunan razılığın növbəti mərhələ üzrə başlıca məqsədləri isə ölkə vətəndaşları arasında yol-nəqliyyat hadisələrinin, xüsusilə də ölümlə və sağlamlığa zərər vurulma ilə nəticələnən yol-nəqliyyat hadisələrinin sayının, habelə ölkə iqtisadiyyatına və ekologiyaya dəyən zərərin həcminin minimallaşdırılması, eləcə də yol hərəkətinin təhlükəsizliyi sahəsində maarifləndirmə, təbliğat və təşviqat işinin təkmilləşdirilməsi üzrə tədbirlərin həyata keçirilməsi, yol hərəkəti təhlükəsizliyi sahəsində müasir innovativ metodların tətbiqinin, eyni zamanda, yol hərəkəti iştirakçılarının davranış və mədəniyyət səviyyəsinin artırılmasının vacibliyi istiqamətində birgə tədbirlərin həyata keçirilməsidir.

Qeyd edək ki, ASA ümumi maraqlar əsasında birləşmiş, könüllülük, üzvlərin hüquqi bərabərliyi prinsipləri əsasında yaradılan, öz fəaliyyətinin əsas məqsədi kimi gəlir əldə etməyi nəzərdə tutmayan qeyri-hökumət təşkilatıdır. Azərbaycanın sığorta bazarında fəaliyyət göstərən 19 sığorta şirkəti və bir təkrarsığorta şirkəti Azərbaycan Sığortaçılar Assosiasiyasının üzvüdür.

Azərbaycan Milli Avtomobil Klubu 2009-cu ildə yaradılmış qeyri-hökumət təşkilatıdır və 2015-ci ildən Beynəlxalq Avtomobil Federasiyasının üzvüdür. AMAK Azərbaycanda yol hərəkəti təhlükəsizliyi üzrə bir sıra tədris-maarifləndirmə, tədqiqat və təşviqat layihələri həyata keçirir.

© Materiallardan istifadə edərkən hiperlinklə istinad olunmalıdır
Mətndə səhv varsa, onu qeyd edib ctrl + enter düyməsini basaraq bizə göndərin

MÜƏLLİFLƏ ƏLAQƏ

* işarəsinin olunduğu yerləri doldurun.

Zəhmət olmasa, yuxarıdakı şəkildə göstərilən hərfləri daxil edin.
Hərflərin böyük və ya balaca olmasının fərqi yoxdur.