CƏMİYYƏT
Şollar-Bakı su qurğuları kompleksinin yaranmasının 100 illiyi ilə bağlı yazı müsabiqəsinin nəticələri açıqlanıb
Bakı, 17 mart, AZƏRTAC
Martın 17-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) və "Azərsu" ASC-nin birgə təşkil etdikləri "Şollar-Bakı su qurğuları kompleksi - 100 il: əbədi həyat mənbəyi" mövzusunda fərdi jurnalist yazıları müsabiqəsinin nəticələri açıqlanıb, qaliblər mükafatlandırılıb.
KİVDF-dən AZƏRTAC-a bildirilib ki, bu münasibətlə keçirilən tədbirdə ölkənin 20-dək aparıcı kütləvi informasiya vasitələrinin rəhbərləri və qalib jurnalistlər iştirak ediblər.
"Azərsu" ASC-nin sədri Qorxmaz Hüseynov media nümayəndələrini Novruz Bayramı münasibətilə təbrik edib, rəhbəri olduğu qurumun media ilə əməkdaşlığa xüsusi əhəmiyyət verdiyini vurğulayıb. Q.Hüseynov "Azərsu" ASC-nin təşkilatçılığı ilə martın 14-dən 18-dək Bakıda "Su nəinki həyat mənbəyidir, hətta həyatın özüdür" devizi altında keçirilən I Bakı Beynəlxalq Su Həftəsi barədə qonaqlara ətraflı məlumat verib. O bildirib ki, I Bakı Beynəlxalq Su Həftəsi çərçivəsində keçirilən tədbirlər qlobal miqyasda insanların keyfiyyətli və davamlı olaraq sudan istifadəsinin təmini, su çatışmazlığı ilə bağlı təhdidlərin aradan qaldırılması, ətraf mühit və iqlim dəyişiklikləri kimi məsələlərin geniş müzakirəsi baxımından mühüm əhəmiyyət kəsb edir. ASC sədri su həftəsi çərçivəsində Bakıda və regionlarda keçirilən tədbirlərə dünyanın 40-a yaxın ölkəsindən, beynəlxalq təşkilatlardan, işgüzar dairələrdən nüfuzlu qonaqların iştirak etməsini mötəbər tədbirə yüksək marağın əyani təcəssümü kimi dəyərləndirib.
Q.Hüseynov həftə çərçivəsində Şollar-Bakı Su Qurğuları Kompleksinin 100 illiyinin də təntənəli şəkildə qeyd olunduğunu bildirərək kəmərin ölkəmiz üçün strateji əhəmiyyətindən söz açıb. O vurğulayıb ki, əgər 100 il əvvəl Şollar-Bakı su kəməri Avropanın nəhəng layihələrindən biri sayılırdısa, Prezident İlham Əliyevin xüsusi diqqət və qayğısı ilə son illər əsaslı şəkildə müasirləşən Ceyranbatan Ultrasüzgəcli Sutəmizləyici Qurğular Kompleksi hazırda belə bir yüksək statusa malikdir.
Q.Hüseynov Bakı şəhərinin keyfiyyətli və fasiləsiz içməli su təchizatında böyük paya malik olan Şollar-Bakı Su Qurğuları Kompleksinin 100 illiyi münasibətilə KİVDF ilə birgə keçirilən fərdi jurnalist yazıları müsabiqəsinin əhəmiyyətini xüsusi qeyd edib. Müsabiqəyə təqdim olunan yazıların əksəriyyətini şəxsən oxuduğunu və razı qaldığını deyib.
Fondun icraçı direktoru Vüqar Səfərli tədbir iştirakçılarını Novruz Bayramı münasibətilə təbrik edib, onlara xoş arzularını çatdırıb. İcraçı direktor Şollar-Bakı Su Qurğuları Kompleksinin 100 illiyinin respublikamız üçün tarixi əhəmiyyətli hadisə olduğunu vurğulayaraq, müxtəlif maneələrə baxmayaraq ötən əsrin əvvəllərində böyük messenat Hacı Zeynalabdin Tağıyevin dəstəyi ilə kəmərin tikintisinin uğurla başa çatdığını bildirib.
V.Səfərli, həmçinin ölkə rəhbərliyinin diqqət və qayğısı ilə "Azərsu ASC"nin son illər Bakı şəhərinin və respublikamızın regionlarının fasiləsiz və keyfiyyətli içməli su təchizatı sahəsində gördüyü işləri yüksək dəyərləndirib. V.Səfərli qeyd edib ki, fondun "Azərsu ASC" ilə birgə keçirdiyi müsabiqənin məqsədi Şollar-Bakı Su Qurğuları Kompleksinin Bakı şəhərinin içməli su təchizatındakı müstəsna rolunun ictimaiyyətə dolğun şəkildə çatdırılmasıdır. İcraçı direktor yanvarın 12-dən martın 1-dək davam edən fərdi jurnalist yazıları müsabiqəsinə 32 kütləvi informasiya vasitəsindən 56 yazının təqdim olunduğunu bildirib: "Yazılar fondun 3 eksperti, o cümlədən "Azərsu" ASC-ni təmsil edən ekspert tərəfindən qiymətləndirilib. Müsabiqənin elanında göstərilmiş şərtlərə əsasən, 6 jurnalist əsas, 15-i isə həvəsləndirici mükafatlara layiq görülüb.
Sonra müsabiqənin qaliblərinə diplom və mükafatlar təqdim edilib.
Qalibləri təbrik edən icraçı direktor V.Səfərli eyni zamanda media ilə səmərəli əməkdaşlığa görə "Azərsu" ASC-nin rəhbərliyinə təşəkkürünü bildirib.
Tədbiri yekunlaşdıran "Azərsu" ASC-nin sədri Qorxmaz Hüseynov qurumun media ilə əlaqələrinin inkişafına verdiyi töhfəyə görə fondun rəhbərliyinə, eləcə də müsabiqədə iştirak edən jurnalistlərə təşəkkürünü bildirərək belə müştərək layihələrin gələcəkdə də davam etdiriləcəyini vurğulayıb.