Bakı, 9 avqust, AZƏRTAC

Əsası ulu öndər Heydər Əliyev tərəfindən qoyulan müasir müstəqil Azərbaycan Respublikasının mədəniyyət siyasəti daha geniş miqyasda və uğurla həyata keçirilir. Prezident İlham Əliyevin rəhbərliyi ilə bütün sahələrdə olduğu kimi mədəniyyət sahəsində də əsaslı islahatlar aparılıb. Ümumiyyətlə, Azərbaycan mədəniyyətinin və ədəbiyyatının inkişafına xidmət edən hər bir fəaliyyətə Prezident xüsusi diqqət göstərir.

Bu fikirləri AZƏRTAC-a müsahibəsində AMEA-nın Nizami Gəncəvi adına Ədəbiyyat İnstitutunun Mətbuat tarixi və publisistika şöbəsinin müdiri filologiya elmləri doktoru, professor Vüqar Əhməd deyib. Prezident İlham Əliyevin son illərdə mədəniyyətimizlə bağlı imzaladığı sənədlərin əhəmiyyətini vurğulayan professor qeyd edib ki, XII əsr klassiklərindən Nizami Gəncəvi, XIX əsr klassiklərindən Mirzə Fətəli Axundzadə, Xurşidbanu Natəvan, XX əsrdə yaşayıb-yaratmış Mirzə Ələkbər Sabir, Hüseyn Cavid, Cəlil Məmmədquluzadə və Əbdürrəhim bəy Haqverdiyev, sonrakı mərhələnin klassiklərindən olan Rəsul Rza və İlyas Əfəndiyev və digər görkəmli şair və yazıçıların yubileylərinin keçirilməsi haqqında verilən sərəncamlar və həmin sərəncamlara uyğun olaraq mədəniyyət tədbirlərinin təşkil olunması xalqımız, ədəbi ictimaiyyət tərəfindən sonsuz sevinc hissləri ilə qarşılanıb.

Prezident İlham Əliyevin və birinci xanım Mehriban Əliyevanın mədəni irsimizə diqqət və qayğısı sayəsində muğam sənəti, aşıq sənəti, Novruz bayramı, xalçaçılıq, Azərbaycan kəlağayı sənəti və s. UNESCO-nun Qeyri-Maddi Mədəni İrs üzrə Reprezentativ Siyahısına daxil edilib.

Azərbaycan Prezidentinin müvafiq sərəncamları ilə ölkəmizdə 2020-ci ilin “Nəsimi İli”, 2021-ci ilin isə “Nizami Gəncəvi İli” elan edilməsi, böyük mütəfəkkirlərimizin yubileylərinin dövlət səviyyəsində keçirilməsi qüdrətli söz və fikir ustadlarına verilən qiymətin təzahürüdür.

Müstəqil ölkəmizdə həyatın müxtəlif sahələrində aparılan islahatlar içərisində latın qrafikalı Azərbaycan əlifbasının bərpa edilməsi böyük tarixi əhəmiyyət kəsb edir. Dövlətimizin başçısının “Azərbaycan dilində latın qrafikası ilə kütləvi nəşrlərin həyata keçirilməsi haqqında” 12 yanvar 2004-cü il tarixli sərəncamı ilə Azərbaycan klassiklərinin əsərlərinin latın qrafikası ilə çap etdirilməsi xüsusi əhəmiyyət kəsb edir.

Kino, teatr, musiqi tətbiqi sənət, tarixi abidələrin qorunması və bərpası ilə bağlı qəbul olunan dövlət proqramları və Prezidentin ölkədə bu mədəniyyət sahələrinin inkişafı ilə bağlı sərəncamları bir daha təsdiq edir ki, respublikamızda mədəniyyətə, mənəvi dəyərlərin qorunub saxlanılmasına həqiqətən böyük qayğı göstərilir. Azərbaycan Dövlət Akademik Milli Dram Teatrı, Azərbaycan Dövlət Gənc Tamaşaçılar Teatrı, S.Vurğun adına Azərbaycan Dövlət Rus Dram Teatrı və Azərbaycan Dövlət Akademik Musiqili Teatrında aparılan əsaslı təmir işləri, onların bəzilərinin yenidən qurulması, bərpası göz önündədir.

Prezident İlham Əliyevin rəhbərliyi ilə son 10 ildə Azərbaycan mədəniyyətinin müxtəlif sahələrinin inkişafı istiqamətində həyata keçirilən tədbirlər, o cümlədən yeni muzeylərin açılması, mədəniyyət mərkəzlərinin yaradılması, müqəddəs ocaqların, tarixi-mədəni abidələrin, məscidlərin əsaslı təmiri və bərpası, möhtəşəm Heydər məscid kompleksinin inşa edilməsi çox böyük əhəmiyyət kəsb edir.

Azərbaycan Prezidenti, Ali Baş Komandan İlham Əliyevin rəhbərliyi ilə müzəffər Ordumuz torpaqlarımızı işğaldan azad etdi. Qəsbkar ermənilərin 30 ildən bəri vurduğu yaraları sağaltmaq, Qarabağı gözəl çağlarına qaytarmaq üçün indi dövlətimiz, xalqımız böyük quruculuq tədbirləri görür. Prezident 2021-ci il 7 may tarixli sərəncamı ilə Şuşa şəhərini ölkənin mədəniyyət paytaxtı elan etdi. Mayın 12-13-də “Xarıbülbül” festivalı düzənləndi. Prezident İlham Əliyevin təşəbbüsü və Heydər Əliyev Fondunun təşkilatçılığı ilə Şuşanın Cıdır düzündə “Xarıbülbül” musiqi festivalının keçirilməsindən hər birimiz qürur duyuruq.

Festivalın açılışında çıxış edən Prezident İlham Əliyev fikrini bu cümlələrlə yekunlaşdırdı: ”İndi isə biz burada, Cıdır düzündə - hər bir azərbaycanlı üçün müqəddəs olan yerdə yığışmışıq və bu musiqi bayramını, bu birlik bayramını, bu qayıdış bayramını, bu ləyaqət bayramını qeyd edirik. Yaşasın Şuşa! Yaşasın Qarabağ! Yaşasın Azərbaycan!”.

Bu Böyük Qələbəni xalqımıza bəxş edən hər bir Vətən övladının, şəhidlərimizin ruhu qarşısında baş əyirik. Bir xalq olaraq Qələbəmizdən daxilən sonsuz qürur hissləri keçiririk, şanlı Ordumuz və Ali Baş Komandanımızla fəxr edirik.

“Böyük Qələbəmiz, hər sahədə qazanılan uğurlarımız ədəbiyyat, mədəniyyət və incəsənət nümayəndələrinə yeni-yeni ideyalar, mövzular verəcək”, - deyə professor Vüqar Əhməd bildirib.