Azərbaycan Respublikasının Ankaradakı səfiri Məmməd Əliyev Azərbaycanın və Türkiyənin bəzi kütləvi informasiya vasitələrində yayılan xəbərlərin yalan olduğunu bildirir. AZƏRTAC-ın Türkiyədəki xüsusi müxbirinə müsahibə verən səfir demişdir:

- Son günlər Azərbaycanın və Türkiyənin bəzi qəzetlərində yayılan xəbərləri böyük narahatlıqla izləyirəm. Bəzi məsuliyyətsiz türk və azərbaycanlı jurnalistlər müəyyən şayiələrin, dedi–qoduların kökünü öyrənmədən sensasiya yaratmaq arzusu ilə yazılar çap edirlər. Faktlara əsaslanaraq bunlara cavablar vermişik. Türkiyənin nüfuzlu siyasi şərhçiləri, politoloqları da öz məqalələrində bir sıra məsələlərə aydınlıq gətirirlər. Lakin bir qəzetdə təəssüf ki, yenə də yoxlanmamış xəbər dərc olunmuşdur. Bizim müxalifət mətbuatı da dərhal bu mövzunu qəzet səhifələrinə çıxardı.

Bilirsiniz ki, Ankaranın səfalı guşələrinin birində ümummilli liderimiz, türk dünyasının böyük oğlu, Azərbaycan dövlətçiliyinin qurucusu Heydər Əliyev adına böyük bir park salınmışdır.

Azərbaycan Respublikasının Prezidenti İlham Əliyevin Ankaraya rəsmi səfəri zamanı bu parkın təntənəli açılış mərasimi keçirilmişdir. Burada 81000 ağac əkilmişdir. Parkın ümumi sahəsi isə 75 hektardır. Türk qəzetlərindən biri burada əkilən ağacların çıxarılması barədə səhv məlumat yaymışdır.

Qəzetin bu xəbəri ilə əlaqədar Türkiyənin meşə təsərrüfatı və ətraf mühitin qorunması naziri Osman Pepe ilə görüşdüm. Mənə rəsmən bildirildi ki, qəzetin bu məsuliyyətsiz yazısı bütün hökumət üzvləri arasında böyük narazılıq yaratmışdır. Yalan xəbərə görə qəzetin 500 milyard türk lirəsi (təxminən 360 min ABŞ dolları) məbləğində cərimə ödəməsi barədə məhkəmə işi qaldırılmışdır.

Nazirin dediyinə görə, diqqətsizlik ucbatından parkdakı 81000 ağacın 250-si, həqiqətən də, parka ayrılan sahədən kənarda əkilmişdir. Bu ərazinin sahibi də həmin ağacların yerini dəyişərək, parkın sahəsində yenidən əkmişdir.

Bu faktı sensasiya kimi qələmə vermək eyibdir. Ankaradakı Heydər Əliyev parkında qolf, basketbol, voleybol meydançaları, uşaq əyləncə mərkəzləri yaradılacaqdır. Burada Azərbaycan adından bir heykəl qoymaq, bulaq və ya hər hansı tikili inşa etmək yaxşı olardı. Bu təşəbbüsə iş adamlarımızı da dəvət edirəm. Mayın 8-də səfirliyimizin işçiləri, Türkiyə Böyük Millət Məclisinin bəzi deputatları, burada təhsil alan tələbələrimiz, Ankarada yaşayan, işləyən professor və müəllimlərimiz bu parka gələrək ümummilli liderimiz, ulu öndər Heydər Əliyevin anadan olmasının 81-ci ildönümü münasibətilə könüllü iməcilik keçirəcəklər. Burada yeni ağaclar əkiləcək, abadlıq işləri görüləcəkdir. Türkiyənin Meşə Təsərrüfatı və Ətraf Mühitin Qorunması Nazirliyinin, Ankara Böyük Şəhər Bələdiyyəsinin üzvləri də təşəbbüsümüzə dəstək verəcəklər. Bir daha təkrar etmək istəyirəm ki, jurnalistlərimiz hər hansı bir xəbəri ictimaiyyətə çatdırmazdan əvvəl onun kökünü araşdırsınlar ki, bu yalanlar ortaya çıxanda utanmasınlar.