İQTİSADİYYAT
TÜRKİYƏ VƏ AZƏRBAYCAN QƏTİ ETİRAZLARINI BİLDİRMİŞLƏR
Sessiyanın gündəliyinə çıxarılmış yeni vaxt məhdudiyyəti, Ermənistan yük daşıyıcılarının qeyd-şərtsiz digər ölkələrin ərazisindən keçmələri, inteqrasiya, büdcə və digər məsələlər nümayəndələr tərəfindən geniş müzakirə olunmuşdur. Ölkəmizi bu sessiyada Nəqliyyat Nazirliyi Avtonəqliyyat Servis Departamentinin rəisi Çingiz Baxışov və Baş Nəqliyyat Müfəttişliyi İdarəsinin rəis müavini Yaqub Novruzəliyev təmsil etmişlər.
2004-cü ildə tətbiq edilməsi nəzərdə tutulmuş vaxt məhdudiyyəti məsələsi ətrafında qızğın müzakirələr olmuşdur. Nazirlər Şurasının Brüsseldə keçirilmiş toplantısında bu məsələ geniş müzakirəyə səbəb olmuş, onun eksperiment kimi, 2004-cü ildə həyata keçirilməsi qərara alınmışdır. Bu o deməkdir ki, hər bir yük daşıyıcısı hansısa ölkəyə yükdaşımanı həyata keçirdikdən sonra 6 həftə ərzində həmin dövlətin ərazisini tərk etməlidir. İki ildən çoxdur ki, bu məsələni dəstəkləyən Almaniya və Avstriya nümayəndələrinin təkidi ilə gündəliyə salınmış həmin yenilik bir çox ölkələrin nümayəndələrinin ciddi müqaviməti ilə qarşılanmış və onlar buna razı olmamışlar.
Qeyd-şərtsiz bu quruma tam səlahiyyətli üzv seçilən Ermənistan sessiyada ilk dəfə səsvermə hüququna malik olmuşdur. Bu isə 1958-ci ildə qəbul olunmuş nizamnaməyə tamamilə ziddir. Qaydaya görə ANNK-ya üzv olan ölkələr qeyd-şərtsiz bir ölkənin ərazisindən keçməklə digər ölkələrə maneəsiz yük apara bilərlər. Türkiyə və Azərbaycan nümayəndələri xüsusi bəyanat verərək, bu məsələyə qəti şəkildə etiraz etmiş və bildirmişlər ki, Ermənistan bu beynəlxalq təşkilata üzv qəbul olunsa da, Türkiyənin və Azərbaycanın ərazisinə daxil ola bilməyəcəkdir. Azərbaycan tərəfi Ermənistanın işğalçı dövlət kimi ölkəmizin ərazisinin 20 faizini zəbt etdiyini, bir milyondan artıq qaçqın və məcburi köçkünün dözülməz şəraitdə yaşadığını bir daha nümayəndələrin nəzərinə çatdırmışdır.