Bakı, 29 may, AZƏRTAC

Azərbaycanın Estoniyadakı səfirliyi Azərbaycan Xalq Cümhuriyyətinin 100 illik yubileyi münasibətilə “Hilton Tallinn Park” mehmanxanasında rəsmi qəbul təşkil edib.

Səfirlikdən AZƏRTAC-a bildiriblər ki, əvvəlcə Azərbaycanın və Estoniyanın dövlət himnləri səsləndirilib.

Tədbirdə çıxış edən səfir Murad Nəcəfbəyli Azərbaycan Xalq Cümhuriyyətinin yaradılması, əhəmiyyəti və tarixi haqqında danışıb. Bildirilib ki, Azərbaycan Xalq Cümhuriyyəti 23 ay ərzində böyük işlər görüb, mühüm qərarlar qəbul edib. Onların arasında qadınlara səsvermə hüququnun verilməsi xüsusi yer tutub.

1991-ci ildə Azərbaycanın dövlət müstəqilliyini bərpa etdiyini qeyd edən səfir ilk illərdə ölkəmizin çətinliklərlə üzləşdiyini, müstəqilliyini itirmək təhlükəsi ilə üz-üzə qaldığını diqqətə çatdırıb. Bildirib ki, bu illər ərzində Ermənistanın Azərbaycana qarşı hərbi təcavüzü nəticəsində torpaqlarının 20 faizi işğal olunub, etnik təmizləmə nəticəsində bir milyondan çox azərbaycanlı qaçqın və məcburi köçkünə çevrilib. Xalqın təkidli tələbi ilə ulu öndər Heydər Əliyevin 1993-cü ildə Azərbaycanda hakimiyyətə gəlişindən sonra ölkəmizin siyasi, iqtisadi, sosial və diplomatik sahələrdə böyük nailiyyətlər əldə etdiyini söyləyən diplomat Azərbaycanın qazandığı bütün uğurların Ümummilli Liderin adı ilə bağlı olduğunu vurğulayıb.

Səfir bildirib ki, hazırda Prezident İlham Əliyev tərəfindən aparılan uğurlu siyasi-iqtisadi islahatlar ölkəmizin davamlı inkişafını təmin edir. Həyata keçirilən tədbirlər ulu öndər Heydər Əliyevin uzaqgörən müdrik siyasətinin məntiqi davamıdır. O, müstəqil siyasət aparan Azərbaycanın son 27 il ərzində beynəlxalq aləmdə özünü etibarlı tərəfdaş kimi göstərdiyini və regional inkişafa, təhlükəsizliyə, sabitliyə, eləcə də multikulturalizmə töhfə verdiyini qeyd edib.

Enerji təhlükəsizliyi baxımından Azərbaycan nəinki regionda, dünya miqyasında önəmli ölkəyə çevrildiyini söyləyən səfir Azərbaycanın təşəbbüsü və iştirakı ilə reallaşdırılan layihələr barədə ətraflı məlumat verib. Qeyd edib ki, açıq dənizlərə çıxışı olmayan Azərbaycan bu gün dünyanın nəqliyyat mərkəzlərindən birinə çevrilib. Diplomat Bakı-Tbilisi-Qars dəmir yolunun istifadəyə verilməsindən, nəqliyyat infrastrukturu ilə bağlı digər layihələrdən, Xəzərin ən böyük limanı olan Ələt Limanının fəaliyyətə başlamasından, habelə Şimal-Cənub nəqliyyat dəhlizinin yaradılması istiqamətində atılan addımlardan danışıb.

Azərbaycanın Avropa İttifaqı, o cümlədən Estoniya ilə əlaqələrinə toxunan səfir, Estoniya və Azərbaycan arasında siyası və iqtisadi münasibətlərin davamlı inkişafından məmnunluğunu ifadə edib, ikitərəfli münasibətlərin yüksələn xətlə inkişaf etdiyini vurğulayıb.

Sonra tədbir ziyafətlə davam etdirilib.

Tədbirdə Estoniyanın sabiq Prezidenti Arnold Rütel, Estoniya parlamentinin üzvləri, ölkənin hökumət və dövlət orqanlarının rəhbərləri və nümayəndələri, Tallin şəhərinin vitse-merləri, Estoniya Diplomatiya Məktəbinin rektoru, Estoniya Elmlər Akademiyasının rəhbərliyi, Tallində akkreditə olunmuş diplomatik korpusun rəhbərləri və əməkdaşları, Estoniyanın milli televiziya və radio şirkətinin rəhbərliyi və əməkdaşları, aparıcı media qurumlarının nümayəndələri, jurnalistlər, alimlər, görkəmli ictimai və mədəniyyət xadimləri, iş adamları, o cümlədən Estoniyanın Yəhudi, Tatar, Gürcü, Litva, Azərbaycan icmalarının təmsilçiləri və Estoniyada ali təhsil alan Azərbaycan tələbələri iştirak ediblər.

Tədbirdə ölkəmizin zəngin mədəniyyətini əks etdirən müxtəlif videoçarxlar nümayiş olunub. Həmçinin Azərbaycan Xalq Cümhuriyyətinin 100 illik yubileyinə həsr olunmuş nəşrlər paylanılıb və Azərbaycan musiqisi səsləndirilib.