REGİONLAR
Tur-aksiyalar məktəblilərə ölkəmizin bu gününü və keçmişini daha dərindən öyrənmək imkanı verir
Salyan, 18 noyabr, Mahir Babayev, AZƏRTAC
“Ölkəmizi tanıyaq” layihəsi çərçivəsində növbəti maarifləndirici tur-aksiyanın Salyan rayonundan olan iştirakçıları noyabrın 18-də Qəbələ-Şəki-Zaqatala marşrutu istiqamətində yola çıxıblar.
AZƏRTAC-ın bölgə müxbiri xəbər verir ki, bu münasibətlə rayonun rəhbər işçilərinin, müəllimlərin, valideynlərin və ictimaiyyət nümayəndələrinin iştirakı ilə şəhərdəki Heydər Əliyev parkında yolasalma mərasimi keçirilib.
Tur-aksiya iştirakçıları parkda Ümummilli Liderin abidəsi önünə gül dəstələri düzərək dahi rəhbərin xatirəsini ehtiramla yad ediblər. Sonra səfərə çıxanlar rəqs edib, nağaraçılar qrupunun ifalarına baxıblar.
Qrup rəhbəri, rayon icra hakimiyyətinin əməkdaşı Qalib İbrahimov bildirib ki, dövlətimizin başçısının təşəbbüsü ilə keçirilən tur-aksiyanın iştirakçıları - Salyan rayon ümumtəhsil məktəblərinin IX–XI sinif şagirdləri Qəbələ şəhərinə yola düşürlər. Dörd gün davam edəcək aksiyanın iştirakçıları Qəbələ, Şəki və Zaqatala rayonlarının tarixi abidələri, görməli yerləri ilə yaxından tanış olacaqlar.
Mərasim başa çatdıqdan sonra məktəblilər onlar üçün ayrılmış avtobusla Qəbələ şəhərinə yollanıblar.
X X X
Noyabrın 18-də səhər saatlarında Neftçala şəhərindəki Heydər Əliyev Mərkəzinin qarşısında böyük izdiham vardı. Rayonun rəhbər işçiləri, müəllimlər, valideynlər və ictimaiyyət nümayəndələri “Ölkəmizi tanıyaq” layihəsi çərçivəsində təşkil olunmuş maarifləndirici tur-aksiyanın Neftçaladan olan iştirakçılarını Qəbələ-Şəki-Zaqatala marşrutu üzrə yola salmaq üçün buraya toplaşmışdılar.
Tur-aksiyanın iştirakçıları ümummilli lider Heydər Əliyevin abidəsi önünə gül dəstələri düzərək xatirəsini ehtiramla yad ediblər. Sonra məktəblilər şəhərin Heydər Əliyev prospekti boyunca ağac və gül kolları əkiblər.
Qrupun müşayiətçisi, rayon icra hakimiyyətinin əməkdaşı Fəridə Əhmədova bildirib ki, Prezident İlham Əliyevin tövsiyəsi ilə keçirilən maarifləndirici tur-aksiyanın iştirakçıları - Neftçala rayonunun ümumtəhsil məktəblərinin IX-XI sinif şagirdləri dörd gün ərzində Qəbələ, Şəki və Zaqatala rayonlarının tarixi abidələri, sosial-iqtisadi inkişafı, görməli yerləri ilə yaxından tanış olacaqlar. Bölgələrimizlə tanışlıq şagirdlərin dünyagörüşünün formalaşmasında mühüm rol oynayacaq.
Şəhər 1 nömrəli tam orta məktəbin X sinif şagirdləri Bayram Quluzadə, Əli Ağakişiyev və başqaları layihənin təşkilindən razılıqlarını bildirərək, diqqət və qayğıya görə dövlətimizin başçısına təşəkkür ediblər.
Meydana toplaşanların xeyir-duası ilə avtobus Qəbələ-Şəki-Zaqatala marşrutu istiqamətində yola düşüb.
X X X
“Ölkəmizi tanıyaq” devizi ilə keçirilən maarifləndirici tur-aksiyaya qoşulan məktəblilər arasında Hacıqabul rayonunun təmsilçiləri də var. Rayonun ümumtəhsil məktəblərinin IX-XI sinif şagirdləri Qəbələ-Şəki-Zaqatala marşrutu üzrə ekskursiyaya yollanıblar.
Rayon icra hakimiyyəti və təhsil şöbəsinin məsul işçiləri, valideynlər 40 şagird və 5 nəzarətçi müəllimdən ibarət olan qrupu icra hakimiyyətinin binası qarşısındakı meydandan yola salıblar.
Tədbir iştirakçıları əvvəlcə ulu öndər Heydər Əliyevin abidəsi önünə gül dəstələri düzərək, xatirəsini ehtiramla yad ediblər. Sonra məktəblilər Heydər Əliyev Mərkəzində Ümummilli Liderin həyat və fəaliyyətini əks etdirən fotoşəkil və sənədlərlə tanış olub, dahi rəhbərin adını daşıyan prospekt boyunca ağac və gül kollar əkiblər.
Qrupun rəhbəri Turanə İmanova bildirib ki, Prezident İlham Əliyevin təşəbbüsü ilə keçirilən tur-aksiyanın iştirakçıları dörd gün ərzində Qəbələ, Şəki və Zaqatalanın görməli yerləri ilə tanış olacaq, dünyagörüşlərini artıracaqlar.
Hacıqabul şəhər 4 nömrəli tam orta məktəbin müəllimi Məryəm Məhərrəmova deyib ki, tur-aksiya təkcə regionlarla tanışlıq məqsədi daşımır, həm də səfər zamanı şagirdlər və müəllimlər təcrübə mübadiləsi etmək imkanı da qazanacaqlar.
Tur-aksiyanın iştirakçısı, dərs əlaçısı, Hacıqabul şəhər 10 nömrəli tam orta məktəbin IX sinif şagirdi Riat Səfərov sevincini belə ifadə edib: “Bizi maraqlı ekskursiya gözləyir. Qəbələ, Şəki və Zaqatala rayonlarının qədim tarixi, adət-ənənələri, mədəniyyəti ilə tanış olmaq imkanı yaratdığı üçün dövlətimizin başçısına minnətdarlığımızı bildiririk. Azərbaycanın dilbər guşələrinə səyahət etmək çoxdankı arzum idi.”
Sonra məktəblilər onlar üçün ayrılmış avtobusla Qəbələyə yola düşüblər.
X X X
“Ölkəmizi tanıyaq” layihəsi çərçivəsində təşkil edilən tur-aksiyanın İmişlidən olan iştirakçıları da noyabrın 18-də sübh tezdən rayondakı Heydər Əliyev parkına toplaşmışdılar. Lənkəran-Masallı-Astara marşrutu üzrə cənub bölgəsinə səfər edən imişlili məktəbliləri rayon icra hakimiyyəti və təhsil şöbəsinin rəhbər işçiləri, valideynlər yola salıblar.
Məktəblilər əvvəlcə ümummilli lider Heydər Əliyevin abidəsi önünə gül dəstələri qoyaraq, xatirəsini ehtiramla yad ediblər. Sonra aksiya iştirakçıları şəhərdəki Heydər Əliyev Mərkəzində Ulu Öndərin həyat və fəaliyyətinin ayrı-ayrı məqamlarını əks etdirən fotoşəkil və sənədlərlə tanış olublar.
Qrup rəhbəri, rayon icra hakimiyyətinin əməkdaşı Namiq Ağacanov səfər proqramı barədə məlumat verərək deyib: “Prezident İlham Əliyevin tövsiyəsi ilə keçirilən maarifləndirici tur-aksiya çərçivəsində İmişlinin ümumtəhsil məktəblərinin IX-XI sinif şagirdləri dörd gün ərzində Lənkəran-Masallı-Astara rayonlarının tarixi abidələri, sosial-iqtisadi inkişafı və əsrarəngiz təbiəti ilə yaxından tanış olacaqlar. Azərbaycanın regionları ilə tanışlıq məktəblilərdə vətənpərvərlik hissinin formalaşmasında əvəzsiz rol oynayır. Dövlətimizin başçısı təhsilimizin inkişafına, onun maddi-texniki bazasının möhkəmləndirilməsinə həssaslıqla yanaşdığı kimi, məktəblilərin dünyagörüşünün formalaşmasının, onların asudə vaxtlarının səmərəli keçməsinin qayğısına da qalır. Şagirdlərimizə bu imkanı yaradan dövlətimizin başçısına minnətdarıq”.
Tur-aksiyanın iştirakçısı, İmişli şəhər 1 nömrəli tam orta məktəbin IX sinif şagirdi Miralim Kərimov ekskursiyadan zəngin təəssüratla qayıdacaqlarına əmin olduğunu bildirib.
Sonda şagirdlər xüsusi avtobusla Lənkəran-Masallı-Astara marşrutu istiqamətində yola çıxıblar.
X X X
Noyabrın 18-də səhər saatlarında Sabirabad şəhərindəki Heydər Əliyev Mərkəzinin qarşısındakı meydanda böyük canlanma vardı. Rayon icra hakimiyyəti və təhsil şöbəsinin məsul işçiləri, valideynlər “Ölkəmizi tanıyaq” maarifləndirici tur-aksiyasının Lənkəran-Masallı-Astara marşrutunun iştirakçıları olan sabirabadlı şagirdləri yola salırdılar.
Əvvəlcə aksiya iştirakçıları Heydər Əliyev Mərkəzindəki eksponatlarla tanış olublar. Sonra məktəblilər Ümummilli Liderin adını daşıyan parkda ağac və gül kolları əkib, yaşıllıqlara qulluq ediblər.
Sabirabad şəhər 1 nömrəli tam orta məktəbin XI sinif şagirdi Elnaz Mirzəyeva sevincini bölüşərək deyib: “Tur-aksiyada iştirak edəcəyimi eşidəndə çox sevindim. Azərbaycanın regionlarını gəzmək, şəhər və rayonların tarixi yerləri, mədəniyyət abidələri ilə tanış olmaq çoxdankı arzum idi. Artıq bu istəyim reallığa çevrilib. Tur-aksiyalar məktəblilərə ölkəmizi, onun bu gününü və keçmişini daha dərindən öyrənmək imkanı verir. Bizə bu imkanı yaradan Prezidentimizə minnətdaram”.
Ulacalı kənd tam orta məktəbin X sinif şagirdi Mehin Aslanova fikirlərini belə ifadə edib: “Bu gün Azərbaycanın dilbər guşələrindən olan Lənkəran, Masallı və Astara rayonlarına yola düşürük. Ölkəmizin qədim tarixi, mədəniyyəti və incəsənəti barədə çox oxumuşam. Bu gün isə mənə bütün bunları görmək imkanı yaradılıb”.
Sonda Lənkəran-Masallı-Astara marşrutu üzrə tur-aksiyada iştirak edən sabirabadlı məktəblilər yola düşüblər.
X X X
“Ölkəmizi tanıyaq” layihəsi çərçivəsində təşkil olunmuş tur-aksiyanın Saatlı rayonundan olan iştirakçıları - IX və XI sinif şagirdləri də Lənkəran-Masallı-Astara marşrutu ilə cənub bölgəsinə yola çıxıblar.
Əvvəlcə ümummilli lider Heydər Əliyevin abidəsi önünə gül dəstələri düzülərək xatirəsi ehtiramla yad edilib. Sonra şagirdlər rayondakı Heydər Əliyev Mərkəzində Ulu Öndərin həyat və fəaliyyətinin ayrı-ayrı məqamlarını əks etdirən fotoşəkil və sənədlərlə tanış olub, rayon mədəniyyət və incəsənət ustalarının çıxışlarını dinləyiblər.
Qrup rəhbəri, rayon icra hakimiyyətinin əməkdaşı Əlimuxtar Məmmədov deyib: “On ikinci dəfədir ölkəmizdə məktəblilər üçün belə bir aksiya təşkil edilir. Maarifləndirici tur-aksiya təkcə regionlarla tanışlıq məqsədi daşımır. Səfər zamanı şagird və müəllimlər müxtəlif maraqlı tədbirlərdə iştirak etmək imkanı da əldə edəcəklər”.
Tur-aksiyanın digər iştirakçıları – Sarıcalar kənd tam orta məktəbinin direktor müavini Ramil Mehdiyev, şəhər 1 nömrəli ümumi orta məktəbin IX sinif şagirdi Ələkbər Qasımov və başqaları bu səyahətin təşkilindən razılıqlarını bildirib, şagirdlərin zəngin təəssüratla qayıdacaqlarına əmin olduqlarını vurğulayıblar.
Valideyn Eynulla Mahmudov ürək sözlərini belə ifadə edib: “Dövlətimizin başçısı gələcəyimiz olan uşaqlara xüsusi qayğı göstərir. Hər yerdə yeni-yeni məktəblər, uşaq bağçaları, idman kompleksləri tikilib istifadəyə verilir. Bu tur-aksiya həmin qayğının daha bir təzahürüdür. Övladımın da bu aksiyada iştirak etməsindən çox məmnunam”.
Sonra məktəblilər xüsusi avtobusla yola salınıblar.