AZƏRTAC xəbər verir ki, aprelin 23-də Bakı Dövlət Universitetinin idman meydançasında ümummilli liderimiz Heydər Əliyevin anadan olmasının 81-ci ildönümü münasibətilə kütləvi informasiya vasitələri komandalarının mini futbol turniri start götürmüşdür.

“Şərq” qəzetinin təşkilatçılığı və CCİC şirkətinin sponsorluğu ilə keçirilən turnirdə eyniadlı komandalar, eləcə də AZƏRTAC-ın, Az.TV, ATV, “Space” teleşirkətinin, “Azərbaycan”, “525-ci qəzet”, “Futbol +”, “Olaylar”, “Ədalət”, “168 saat”, “Səhər-JFK” , “Çempion-Zaman” qəzetlərinin və “Səma” mətbuat yayımı firmasının komandaları iştirak edirlər. Turnirin yüksək səviyyədə keçməsi üçün Təşkilat Komitəsi yaradılmışdır.

Yarış iştirakçıları, əvvəlcə, Fəxri xiyabana gedərək, müstəqil Azərbaycanın qurucusu, ümummilli liderimiz Heydər Əliyevin məzarını ziyarət etmiş, onun əziz xatirəsinə hörmət və ehtiram əlaməti olaraq əklil qoymuşlar.

Prezident Administrasiyasının, Nazirlər Kabinetinin, Gənclər, İdman və Turizm Nazirliyinin əməkdaşlarının, Milli Məclisin deputatlarının, idman ictimaiyyəti nümayəndələrinin və veteranların iştirak etdiyi mərasimi “Şərq” qəzetinin baş redaktoru Akif Aşırlı açmışdır. Mərasimdə Prezident Administrasiyasının şöbə müdiri Əli Həsənov, Yeni Azərbaycan Partiyasının icra katibi Əli Əhmədov, BDU-nun rektoru Abel Məhərrəmov, Mətbuat Şurasının sədri Əflatun Amaşov, AFFA İcraiyyə Komitəsinin üzvü və “Dinamo” futbol klubunun baş direktoru Yaşar Seyidov, CCİC-in idarə rəisi Sahib Süleymanov çıxış etmişlər.

Bildirilmişdir ki, müstəqil Azərbaycan dövləti və jurnalistikası ən böyük inkişaf mərhələlərinə məhz ümummilli liderimiz Heydər Əliyevin rəhbərliyi ilə çatmışdır. Müdrik dövlət xadimi Heydər Əliyev bütün sahələrdə olduğu kimi, müasir jurnalistikamızın əldə etdiyi inkişafın, nailiyyətlərin də müəllifidir. Heydər Əliyev həmişə kütləvi informasiya vasitələrinin ən böyük ümid yeri, ən böyük xeyirxahı olmuşdur.

Natiqlər vurğuladılar ki, ölkəmizdə müstəqil mətbuatın yeni inkişaf mərhələsini məhz Heydər Əliyevin prezidentliyi dövründə yaşaması danılmaz faktdır. O, həmçinin mətbuat-hakimiyyət münasibətlərində qarşılıqlı inama, etimada söykənən zəruri bir ənənənin əsasını da qoymuşdur və bu, Azərbaycan jurnalistikasının ən böyük uğurudur.

Ənənəvi xarakter almış bu turnirdə komandalar dörd qrup üzrə yarışacaqlar. Birinci yer üçün 1 milyon, ikinci yer üçün isə 500 min manat mükafat təsis olunmuş, qaliblərə kubok və diplomlar veriləcəkdir.

“Şərq” və “Azərbaycan” qəzetlərinin komandaları arasında keçirilən ilk görüş 3:0 hesabı ilə birincinin xeyrinə başa çatmışdır. “D” qrupunda mübarizə aparan “AZƏRTAC” – “CCİC” komandalarının görüşü isə bazar günü saat 14.00-da keçiriləcəkdir.

Turnir final oyunu ilə ümummilli liderimiz Heydər Əliyevin doğum günündə - mayın 10-da başa çatacaqdır.